Məlum olduğu kimi, koronavirus pandemiyası Cənubi Qafqaz regionundan da yan keçməyib. Gürcüstan, Azərbaycan və Ermənistanda minlərə insan COVİD-19-dan müalicə alır. Bu ölkələrin koronavirusla mübarizədə əldə etdiyi nəticələr müxtəlifdir.
İstər ərazi (29,8 min kv. km), istərsə də əhali sayı baxımından (2,9 milyon) Cənubi Qafqazın ən kiçik ölkəsi Ermənistan pandemiyanın mənfi göstəricilərinə görə regional liderdir. Təkcə son sutkada ölkədə 163 nəfər virusa yoluxub. Bu günə qədər Ermənistanda 2782 nəfər koronavirusa yoluxub. Onlardan 1135 nəfər sağalaraq evə buraxılıb. Ötən müddətdə 40 nəfər virusun qurbanı olub. Hazırda Ermənistanda 1600 aktiv COVİD-19 xəstəsi var. Qafqaz ölkələri arasında ən az koronavirus testi də Ermənistanda (26 929) keçirilib.
69,7 min kvadrat kilometr sahəsi və 3,7 milyon sakini olan Gürcüstanda koronavirusla bağlı mayın 22-nə qədər fövqəladə vəziyyət mövcud olacaq. Ölkədə bu gün koronavirusa yoluxanların sayı 610 nəfərə çatıb. Onlardan 269 nəfər sağalsa da, 9 pasient dünyasını dəyişib. Hazırda 332 COVİD-19 xəstəsi müalicəsini davam etdirir. Gürcüstanda 20 579 koronavirus testi keçirilib.
Ərazisinin böyüklüyünə (86,6 min kvadrat kilomter) və əhalisinin çoxluğuna görə (10 milyon) Cənubi Qafqazın lider ölkəsi Azərbaycan virusla mübarizədə də ön pillədədir. Belə ki, istər koronavirusdan sağalanların çoxluğuna, istərsə də ölü sayının azlığına görə Azərbaycan Ermənistan və Gürcüstanı geridə qoyur. Ümumilikdə, Azərbaycanda 2127 nəfər koronavirusa yoluxub. Onlardan 1536 nəfər sağalıb, 28 nəfər vəfat edib. Hazırda 563 aktiv koronavirus xəstəsi müalicəsini davam etdirir. Ölkəmizdə koronavirusdan ölüm faizi dünya üzrə orta göstəricidən 5,5 dəfə azdır.
Maraqlıdır, Azərbaycanın koronavirusla mübarizədə regional lider olmasının kökündə nə dayanır?
“...koronavirusla mübarizədə ön mövqedəyik”
Məsələyə münasibət bildirən şərqşünas Seyid Camal Əzimbəylinin sözlərinə görə, Azərbaycanın bu sahədə ciddi nəticələr əldə etməsinin kökündə bir sıra faktorlar dayanır: “Ölkəmizdə pandemiya ilə bağlı vəziyyətin nəzarət altına alınmasını şərtləndirən əsas həlledici amil dövlətin vaxtında gördüyü qabaqlayıcı tədbirlərlə bağlıdır. Məsələ ondadır ki, koronavirusla mübarizə məsələsində ölkədə bütün qabaqlayıcı tədbirlər kompleks şəkildə həyata keçirildi. Yoluxucu xəstəliyin yayılmasının qarşısının alınması məqsədilə hökumət tərəfindən Nazirlər Kabineti yanında Operativ Qərargah yaradıldı. Təxirəsalınmaz tədbirlər nəticəsində Azərbaycan fevralın 29-dan etibarən İranla məhdudlaşdırıcı rejim əsasında sərhədləri bağladı. Ardınca bu qərar Gürcüstan, Türkiyə və Rusiya ilə dövlət sərhədlərinə də tətbiq edildi. Təhsil müəssisələrində tədris dayandırıldı. Martın 20-dən rayonlardan paytaxta giriş məhdudlaşdırıldı. Əhalinin sıx istifadə etdiyi və virusun yayılma risqinin böyük olduğu metroda hərəkət məhdudlaşdırıldı. Aprelin 5-dən etibarən isə koronavirus infeksiyasının Azərbaycan ərazisində geniş yayılmasının qarşısının alınması məqsədilə həyata keçirilən xüsusi karantin rejimi çərçivəsində ölkədə hərəkət məhdudiyyətlərinin tətbiqinə başlandı. Prezident İlham Əliyevin rəhbərliyilə həyata keçirilən çevik və düşünülmüş siyasətin nəticəsidir ki, koronavirusla mübarizədə ön mövqedəyik. Dövlət tərəfindən vaxtında və düzgün qərarların qəbul edilməsi sayəsində bu bəlanın ölkədə geniş yayılmasının qarşısı alındı”.
Vidadi ORDAHALLI
