Bu gün koronavirus pandemiyasının ölkəmizdə ikinci dalğasının yaşana biləcəyi ilə bağlı müəyyən ehtimallar və fikirlər mövcuddur. Pandemiyaya qarşı dövlət tərəfindən genişmiqyaslı tədbirlərin görülməsinə baxmayaraq, vətəndaş məsuliyyətsizliyi nəticəsində bu acı prosesin yenidən təkrarlanması təhlükəsinin elementləri görsənməkdədir.
İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Nazirlər Kabineti yanında Operativ Qərargahın brifinqində çıxışı zamanı deyib ki, Azərbaycanda yoluxma halları arasında faiz göstəriciləri Bakı üzrə 45.3, Gəncə-Qazax üzrə 14.1, Lənkəran üzrə 10 faiz təşkil edir.
Qeyd edək ki, Gəncə-Qazax bölgəsi ölkədə koronavirusa yoluxmanın sayına görə paytaxtdan sonra ikinci yerdə gəlir. Zaur Əliyev Operativ Qərargahda qeyd edib ki, ilk yoluxma şəhərə kənardan gələn şəxsdə qeydə alınıb, sonra isə daxildə yayılmağa başlayıb. Onun sözlərinə görə, Gəncədə virusun yayılmasının səbəblərindən biri də ölkənin ikinci böyük şəhərinə giriş-çıxışın çox olmasıdır.
Agentlik sədri vurğulayıb ki, son zamanlar koronavirusa yoluxanların sayının artması siqnallar verir ki, vətəndaşlar tövsiyələrə daha ciddi riayət etməlidirlər
O, həmçinin, deyib ki, ölkədə aprelin ortalarında koronavirusa yoluxma dalğası daha yüksəyə qalxmışdı, sonra isə aşağı düşməyə başlamışdı. Yoluxma sayı 27 apreldən 3 mayadək yenidən artıb. Hazırda dünyada koronavirusla mübarizədə tətbiq edilən bütün dərman və tibbi vasitələr Azərbaycanda da istifadə edilir. Müalicə işinin təşkili üçün bütün yeniliklərdən istifadə edilir.
Qeyd edək ki, şimal bölgəsində də sözügedən virusun yayıldığı qeyd edilib. Belə ki, Rusiyadan keçən bir neçə nəfərdə testlərin nəticəsi pozitiv aşkarlanıb. Eyni zamanda, cənub bölgəsində də İranla gediş-gəliş olduğu üçün orada yoluxma halları çox olub
“Gəncədə mövcud karantin rejiminə ciddi əməl edilməməsi səbəbindən də orada yoluxmalar çoxaldı”
K.Fərəcova adına Elmi-Tədqiqat Pediatriya İnstitutunun direktoru, tibb elmləri doktoru, professor Nəsib Quliyev “Bakı-Xəbər”ə bildirdi ki, bunun səbəbinə aidiyyəti qurumlar aydınlıq gətiriblər. O vurğuladı ki, əvvəllər orada virusa yoluxmuş şəxs olub və bunun nəticəsində də alovlanma ocağı əmələ gəlib, o şəxs ətrafdakıları da yoluxdurub: “Bilirsiniz ki, cənub bölgəsi İranla həmsərhəddir və o ölkə ilə gediş-gəliş çox olduğuna görə burada yoluxma faizi artıqdır. Yoluxan adamlar da ətrafındakıları yoluxdurub. Cənub bölgəsində də infeksiya ilə bağlı bir alovlanma olmuşdu və insanlar qrup şəklində yoluxmuşdular. Ona görə də cənub bölgəsində yoluxanların sayı çoxdur. Azərbaycanda ilk yoluxma halı İranla sərhəd olan cənub bölgəsindən, Lənkərandan başlamışdı. Bunları təyin etmək çox çətindir. Məsələn, ölkədən kənarda kimsə yoluxub gəlib və onun xəstəliyinin ilk əlamətləri olmur, xəstəxanada yatmaq həddinə qədər onda xəstəlik əlaməti diqqət çəkməyib. Onlara bəzən “sağlam virus gəzdirənlər” də deyirlər. Onlar xəstəliyi o qədər yüngül keçirirlər ki, o adamlarda virus olduğunu heç kim hiss etmir, özü də bilmədən əhatəsində olanları yoluxdurmağa başlayır”.
Gəncə-Qazax bölgəsinə gəlincə, N.Quliyev qeyd etdi ki, Gəncə bölgədə böyük şəhərdir və bu səbəbdən də orada yoluxma faizi yüksəkdir: “Bilirsiniz ki, böyük şəhərlərdə sıxlıq olur və sıxlıq olan yerlərdə də təmas say etibarilə daha da çoxalır, nəticədə də yoluxma ehtimalı yaranır. O biri tərəfdən də Gəncədə mövcud karantin rejiminə ciddi əməl edilməməsi səbəbindən də orada yoluxmalar çoxaldı”.
İradə SARIYEVA
