Pandemiya dövründə qida məhsullarının ticarəti ilə məşğul olan müəssisələrdə (topdan və pərakəndə satış obyektləri, bazar, yarmarka və s.) koronavirus infeksiyasının profilaktikasına dair qaydalar müəyyənləşib. Sənəd ərzaq məhsullarının ticarəti ilə məşğul olan müəssisələrdə çalışan əməkdaşlar və əhalinin sağlamlığının qorunması məqsədilə hazırda koronavirus (COVID-19) infeksiyasına dair aparılan elmi araşdırma faktlarına əsaslanaraq tərtib olunub.
Qaydalarda bildirilir ki, istehlakçıları məlumatlandırmaq məqsədilə infoqraf çoxaldılaraq müəssisənin giriş-çıxış qapılarında, soyuducuların qapılarında, rəflərdə, piştaxtalarda və rahat görünən digər yerlərdə asılmalı, həmçinin, ödəniş həyata keçirilən zaman hər bir istehlakçıya təqdim olunmalıdır.
Bununla yanaşı, ərzaq satışı ilə məşğul olan müəssisələrdə insanların ən sıx toplaşdığı yerlərin kassaların qarşısı olduğunu nəzərə alaraq, koronavirus xəstəliyi ilə bağlı vəziyyət normallaşana qədər müəssisənin fəaliyyətdə olduğu saatlarda mövcud olan hər bir kassa fəaliyyət göstərməlidir. Eyni zamanda, kassaların qarşısında növbədə duran insanlar bir-birindən ikimetrlik məsafədə dayanmalıdırlar.
Açıq şəkildə satılan çörək-bulka, unlu-qənnadı məmulatları, quru meyvələr və istehlakdan öncə heç bir termiki emal və yaxud təmizləmə prosesinə məruz qalmayan digər qablaşdırılmamış qida məhsulları xüsusi vitrin arxasında saxlanaraq istehlakçılardan təcrid edilməli və bu məhsullar yalnız xüsusi gigiyenik vasitələrlə (əlcək, maska, başlıq və s.) təmin edilmiş işçi heyət üzvləri tərəfindən istehlakçılara təqdim edilməlidir.
Mütəxəssislər də hesab edirlər ki, pandemiya dövründə qida məhsullarının ticarəti ilə məşğul olan müəssisələr üçün xüsusi qaydaların müəyyənləşməsi düzgün qərardır.
“...əl ilə təmas olunan bütün qida məhsulları qablaşdırılaraq xüsusi vitrin arxasında olmalıdır”
Qida mütəxəssisi Mehman Hüseynov bildirdi ki, karantin dövründə qida məhsullarının satışına xüsusi nəzarətin tətbiq edilməsi təqdirəlayiqdir: “Koronavirusla bağlı gigiyenik qaydalara riayət etmək lazımdır. İnsanların mütəmadi olduğu məkanlardan biri də market, iaşə obyektləridir. Həmin məkanlarda çalışan işçilər gigiyenik qaydalara riayət etməklə yanaşı, qoruyucu vasitələrdən istifadə etməlidirlər. Qoruyucu vasitə deyəndə tibbi maska və əlcək nəzərdə tutulur. Həmçinin, əl ilə təmas olunan bütün qida məhsulları qablaşdırılaraq xüsusi vitrin arxasında olmalıdır. Beləliklə, heç kim çörək və digər təamlarla əl ilə təmas edə bilməyəcək. Əgər fərdi şəxs və ya müəssisə bu qaydalara əməl etməzsə, onlar qanunvericiliyin tələbinə uyğun olaraq cəzalandırılmalıdır”.
Günel CƏLİLOVA
