Bildiyimiz kimi, Nazirlər Kabineti yanında Operativ Qərargah tərəfindən əhali arasında virusa yoluxma sürəti, xəstələrin sağalma dinamikası nəzərə alınaraq, tətbiq edilən bir sıra məhdudiyyətlərin yumşaldılmasına dair qərar verilib.
Mayın 4-dən bir sıra sahələrlə yanaşı, respublikada fəaliyyət göstərən DOST mərkəzlərinin də fəaliyyəti bərpa olunub. Belə ki, DOST mərkəzlərində xidmət göstərdikləri ərazilər üzrə ünvanlı dövlət sosial yardımı və sosial sahə üzrə bank kartlarının təqdim olunması istiqamətlərində fəaliyyətin bərpa edilməsi müsbət haldır. Həm paytaxtda, həm də respublikamızın digər rayon və şəhərlərində bu xidmətlərin yenidən bərpa edilməsi o deməkdir ki, xüsusi karantin rejiminin yumşalma prosesində sosial məsələlər ön plandadır.
“İlk növbədə, ünvanlı dövlət sosial yardımı və sosial sahə üzrə bank kartlarının təqdim olunması prosesinin bərpası təqdirəlayiqdir”
Tanınmış iqtisadçı-alim, professor Əli Əlirzayev bizimlə söhbətində bildirdi ki, DOST mərkəzlərinin fəaliyyətinin bərpa edilməsi və burada vətəndaşlara aidiyyəti xidmətlərin göstərilməsi dövlətin sosial sahəyə verdiyi əhəmiyyətlə bağlıdır. Ə.Əlirzayev qeyd etdi ki, pandemiya ilə əlaqədar olaraq həyata keçirilən tədbirlər nəticəsində özünütəcrid mərhələsində olan vətəndaşlar vaxtı keçmiş müavinət və s. kartlarının bərpa edilməsi sahəsində əziyyət çəkirdilər. “Bilirsiniz ki, pandemiya ilə əlaqədar olaraq ölkədə gerçəkləşdirilən mübarizə tədbirləri səbəbindən bir sıra qurumlar, o cümlədən də DOST mərkəzlərinin fəaliyyəti müvəqqəti dayandırılmışdı. Bunun nəticəsində də vətəndaşlar vaxtı keçmiş və dəyişdirilməsinə ehtiyac olan müavinət və s. kartlarını yeniləyə bilmirdilər. Elə ailələr var ki, onlar müxtəlif yardımlar alırlar, amma kartlarının vaxtı bitdiyi üçün həmin məbləği bankomatdan çıxara bilmirdilər. Əlbəttə, xüsusi karantin rejiminin yumşaldılması ilə bağlı başlanan proses zamanı sosial məsələlərin unudulmaması, ilk növbədə, ünvanlı dövlət sosial yardımı və sosial sahə üzrə bank kartlarının təqdim olunması prosesinin bərpası təqdirəlayiqdir. Çünki saysız vətəndaş bu prosesin başlanmasını gözləyirdi. Artıq vətəndaşlar əziyyət çəkmədən bu problemlərini həll edə biləcəklər”.
Ə.Əlirzayev hesab edir ki, vətəndaşlar heç bir vaxt itkisi ilə üzləşmədən öz işlərini həll etməyə başlayıblar. O, həmçinin, vurğuladı ki, DOST mərkəzlərinin bərpa edilməsi xüsusən də bölgələrdə yaşayan əhalinin rahatlığının təmin edilməsi baxımından çox əhəmiyyətlidir. Müsahibimiz, eyni zamanda, vurğuladı ki, “Mobil etibarnamə” layihəsinin də həyata keçirilməsi dövlətin vətəndaşlara bəslədiyi qayğının təzahürüdür. Bununla belə, Ə.Əlirzayevin bildirdiyinə görə, bundan sonrakı yumşalma mərhələsində də bir sıra məsələlər də öz həllini tapacaq.
İradə SARIYEVA
