Prezident İlham Əliyevin tapşırığına uyğun olaraq, aztəminatlı ailələrin ünvanlı dövlət sosial yardım proqramına əlçatanlığının artırılması üçün növbəti addım kimi sosial yardım üçün müraciət proseduru daha sadə şəkildə qurulur. Belə ki, bu məqsədlə Əmək və Əhalinin Sosial Müdafiəsi Nazirliyi tərəfindən yeni layihə hazırlanıb. Layihəyə əsasən, vətəndaşlar ünvanlı yardım üçün elektron qaydada müraciət edərkən onlardan e-sistemdəki ərizə bəyannamədə qeyd etmələri tələb olunan məlumatların sayı xeyli azaldılacaq.
Müraciət zamanı əməkhaqları, pensiya və müavinətlər, Prezidentin təqaüdləri ilə təmin edilib-edilməmək, məcburi köçkün statusuna malik olma ilə bağlı məlumatların qeyd edilməsi istənilməyəcək. I və II dərəcə əlillik, kommunal xidmətlərə görə illik xərcin məbləği, işsizlik statusunun olub-olmaması, nəqliyyat vasitəsilə bağlı məlumatların da vətəndaşlar tərəfindən daxil edilməsinə ehtiyac qalmayacaq. Həmçinin, ödənişli əsaslarla təhsilalma, xarici ölkədə olma vəziyyəti, fərdi ev və ya mənzilin sahəsi, poçt indeksi kimi məlumatlar vətəndaşlardan istənilməyəcək. Eləcə də ailə üzvlərinin mobil nömrələri (əks əlaqə vasitəsi üçün telefon nömrəsi istisna olmaqla), onlardan istifadə xərcləri və s. kimi məlumatların qeyd edilməsi tələbi aradan qalxacaq. Müraciət zamanı vətəndaşlardan istənilməsi tələb olunmayacaq bütün məlumatlar aidiyyəti orqanların elektron informasiya sistemlərindən əldə ediləcək.
Göründüyü kimi, müraciət zamanı qeyd edilməsi tələb olunan məlumatların sayının xeyli azaldılması aztəminatlı ailələrin proqramdan faydalanmaq üçün daha rahat və sadə şəkildə müraciət edə bilmələrinə şərait yaradacaq. Nəticədə bu, sözügedən kateqoriyadan olan ailələrin proqrama əlçatanlığının artmasına gətirib çıxaracaq.
Maraqlıdır, bəs ekspertlər son yeniliklərin əhəmiyyətini necə dəyərləndirirlər?
“Qısa bir zamanda kasıb insanlar lazım olan sənədləri təqdim edərək yardımdan faydalanacaqlar”
Məsələyə münasibət bildirən ekspert İlqar Hüseynlinin sözlərinə görə, son yeniliklər aztəminatlı ailələrin ünvanlı dövlət sosial yardım proqramına əlçatanlığının artırılmasında mühüm rol oynayacaq: “Məsələ ondadır ki, ölkədə zaman-zaman ünvanlı dövlət sosial yardımı ilə bağlı problem var idi. Buna əlçatanlıq səviyyəsi yaxı vəziyyətdə deyildi. Ehtiyacı olan ailələrin çoxu bu paketdən yararlana bilmirdilər. Bunun səbəblərindən biri də yardım almaqla əlaqədar çoxsaylı sənədin tələb edilməsi idi. Bürokratik maneələr və lazımsız sənədləşmələr yardıma əlçatanlıq səviyyəsini aşağı salırdı. Vətəndaşlarımızın əlçatanlığı aşağı olduğu üçün çoxları bundan məhrum olurdu. O mənada ünvanlı dövlət sosial yardımı ilə bağlı nə qədər prosedurlar sadələşdirilsə, bu bir o qədər ehtiyacı olan ailələrin xeyrinə olacaq. Bu, həqiqətən də yardıma ehtiyacı olan insanların mənafeyinə uyğun olacaq. Qısa bir zamanda kasıb insanlar lazım olan sənədləri təqdim edərək yardımdan faydalanacaqlar. Ona görə də məlum qərarı alqışlayıram. Nəzərə almaq lazımdır ki, koronavirus pandemiyası ilə əlaqədar olaraq bir sıra insanlar işləyə bilmirlər. Belə bir dövrdə prosedurların sadələşdirilməsi onların xeyrinə olacaq”.
Vidadi ORDAHALLI
