Pandemiya ilə bağlı ölkəmizdə tətbiq edilən xüsusi karantin rejiminin qaydalarına uyğun olaraq, vətəndaşlarımız özünütəcrid və “evdə qal” prosesinə qoşuldular. Bu gün də o proses davam etdirilir və vətəndaşlarımızın xeyli hissəsi özünütəcridə üstünlük verir.
Məlum olduğu kimi, artıq Azərbaycan Respublikası ərazisində xüsusi karantin rejiminin yumşaldılmasına başlanıb. Amma, bütövlükdə, hələ də özünütəcrid, “evdə qal” məsələsi aktualdır və vətəndaşlardan bu qaydalara riayət etmələri tələb olunur.
Özünütəcrid və “evdə qal” dövründə biz azərbaycanlıların hansı pis və hansı yaxşı xüsusiyyətləri özünü büruzə verdi?
“Vətəndaşların özünütəcrid mərhələsində məsuliyyətsizliyi, mənfi tərəfləri çox cüzi görsəndi”
Siyasi şərhçi Azər Həsrət “Bakı-Xəbər”ə bildirdi ki, hər şeyin bir pis tərəfi olduğu kimi, yaxşı tərəfi də olur. “İndiki özünütəcrid mərhələsi də o qəbildəndir. Bu mərhələdə bizim yaxşı və pis tərəflərimiz üzə çıxdı. Təbii ki, bəzi insanlarımızın məsuliyyətsizliyini, bir qədər qayda-qanunlara tabe olmaq istəmədiklərini, ümumiyyətlə, onların bu ciddi qlobal bəlaya laqeydliyini, lağ-lağı ilə yanaşmasını müşahidə etdik. Amma yaxşı tərəf ondan ibarətdir ki, vətəndaşların özünütəcrid mərhələsində məsuliyyətsizliyi, mənfi tərəfləri çox cüzi görsəndi və bu cür davranan insanların sayı elə də çox olmadı. Yəni problemi ciddiyə alanların, məsuliyyətlə davrananların, karantin rejiminin qaydalarına tam olaraq riayət edənlərin sayı problemə məsuliyyətsiz yanaşanların sayından qat-qat çox oldu. Bu baxımdan, düşünürəm ki, özünütəcrid və “evdə qal” mərhələsində biz azərbaycanlılar, Azərbaycan vətəndaşları daha çox müsbət xüsusiyyətlərimizlə fərqləndik. Digər tərəfdən də bu mərhələdə dövlətlə xalq nümunəvi bir həmrəylik nümayiş etdirdi”.
A.Həsrətin sözlərinə görə, Prezident İlham Əliyev başda olmaqla, dövlətin rəhbər şəxsləri, ayrı-ayrı strukturları vətəndaşlar üçün mümkün olan hər şeyi artıqlaması ilə həyata keçirdilər ki, onların həyatını, sağlamlığını qorusunlar. O qeyd etdi ki, vətəndaşlarımız da dövlətin çağırışlarına məsuliyyətlə yanaşdılar və böyük hesabla Azərbaycan dövlətinin qoyduğu qayda-qanunlar çərçivəsində davrandılar. “Ona görə də Azərbaycan pandemiyadan az zərər çəkən ölkələr arasında yer tutub. Hətta ən yaxın qonşularımızda yoluxma fəlakət həddindədir. Bilirsiniz ki, İranda yüzminlərlə yoluxan var. Rusiyada, Ermənistanda, Qazaxıstanda çox ciddi yoluxma halları qeydə alınıb. Belə bir coğrfiyada bizim özümüzü qoruya bilməyimizin əsas səbəbi, əlbəttə, dövlətin öz vətəndaşı ilə həmrəylik nümayiş etdirməsi, vətəndaşın qayğısına qalması oldu. Bu baxımdan, insanlarımız bu mərhələdə pozitiv davrana bildilər. Onu da vurğulamaq lazımdır ki, Azərbaycan cəmiyyəti bu problem zamanı küyə düşmədi. Məsələn, ABŞ kimi dünyanın nəhəng bir dövlətində müşahidə etdik ki, insanlar ərzaq dükanlarına hücum çəkdilər, saatlarla növbələrdə durub bir qarın yemək üçün vaxt xərcləməli oldular. Azərbaycanda isə bu mənzərə yaşanmadı, ərzaq dükanlarına hücum çəkilmədi, ehtiyacı olanlara dövlətlə bərabər vətəndaşlar da yardım etdilər, ölkəmizdə könüllülər hərəkatı çox geniş vüsət aldı”.
A.Həsrət qeyd etdi ki, istər Heydər Əliyev Fondu, istərsə də digər qurumlar, sahibkarlar, bəzi millət vəkilləri, icra hakimiyyətləri vətəndaşlara yardım kampaniyasına qoşuldular və bu prosesdə xalqımızın üzünü ağ etməyi bacardılar. “Əlbəttə, yardım kampaniyası zamanı üzümüzü qara edənlər də oldu. Vətəndaşlara göndərilən yardımların mənimsənilməsi ilə bağlı Biləsuvar Rayon İcra Hakimiyyəti başçısının həbsi, ondan əvvəl İsmayıllı Rayon İcra Hakimiyyətinin İsmayıllı şəhəri üzrə icra nümayəndəsinin tutulması, eləcə də bu qəbildən olan insanlarla bağlı açılan cinayət işləri də diqqəti çəkdi. Bu cür hallar da olub. Təbii, bunlar dəryada damladır. Dövlət belə şəxslərə ciddi nəzarət edir və onlar aşkarlanır, barələrində müvafiq tədbirlər görülür. Hesab edirəm ki, özünütəcrid və “evdə qal” mərhələsində azərbaycanlıların daha çox yaxşı, müsbət xüsusiyyətləri üzə çıxdı” - deyə A.Həsrət vurğuladı.
İradə SARIYEVA
