Məlum olduğu kimi, artıq respublika üzrə xüsusi karantin rejiminin yumşaldılması prosesinin növbəti mərhələsinə başlanıb. Mayın 4-dən Azərbaycanın bir sıra şəhər və rayonlarında xüsusi karantin rejimi ilə əlaqədar olaraq tətbiq olunan SMS icazə sistemi ləğv olunub. Qeyd edək ki, bu barədə Nazirlər Kabineti yanında Operativ Qərargah mayın 1-də qərar qəbul edib.
Qərara əsasən, Bakı, Sumqayıt, Gəncə, Lənkəran şəhərləri və Abşeron rayonu istisna olmaqla, respublikanın digər rayon və şəhərlərində və Naxçıvan Muxtar Respublikasında 4 may 2020-ci il saat 00:00-dan etibarən yaşayış yerini SMS icazə ilə, “icaze.e-gov.az” portalında qeydiyyatdan keçməklə, xidməti vəsiqə və ya iş yeri barədə arayış əsasında tərk etmək sistemi ləğv olunub.
Ölkəmizdə hələ pandemiya ilə bağlı mübarizə tədbirləri davam edir və bu bəladan ölkəmiz tam olaraq xilas olmayıb.
Bir sıra rayon və şəhərlərdə, bölgələrdə SMS-lə icazənin ləğv edilməsi bölgə sakinlərinin üzərinə hansı məsuliyyəti qoyur? Onlar pandemiya risqindən uzaq olmaq üçün nələri etməli, hansı qaydalara əməl etməkdən imtina etməməlidirlər?
Nəzərə alsaq ki, pandemiyaya yoluxma risqləri var və vətəndaşlar sanitar-gigiyena, sosial məsafə və s. tələblərə riayət etməsələr, daha da ciddi problemlərlə üzləşə bilərlər.
“Həmin bölgələrin sakinləri daha məsuliyyətli davranmalıdırlar”
“Novoe vremya” qəzetinin baş redaktoru, tanınmış siyasi icmalçı Şakir Ağayev “Bakı-Xəbər”ə bildirdi ki, karantin rejiminin yumşaldılması çərçivəsində bir sıra rayon və şəhərlərdə SMS icazə sisteminin ləğv olunması heç də vətəndaşların necə gəldi hərəkət etməsi, davranması demək deyil. O hesab edir ki, bu gün vətəndaşların üzərinə daha böyük məsuliyyət düşür. Ş.Ağayevin sözlərinə görə, vətəndaşlar unutmamalıdırlar ki, pandemiya hələ bitməyib və bütün gigiyenik, sanitar qaydalara riayət etməlidirlər, sosial məsəfə saxlamağa üstünlük verməlidirlər. Müsahibimizin bildirdiyinə görə, vətəndaşlar tələb olunan qaydalara riayət etməkdə davam etməsələr, pandemiyaya yoluxmaq risqi ilə üz-üzə qalarlar. “Çox aktual bir məsələyə toxunmusunuz. Prezident İlham Əliyevin rəhbərliyilə həyata keçirilən qabaqlayıcı tədbirlər nəticəsində ölkəmizdə koronavirus pandemiyası şükürlər olsun ki, səngimək üzrədir. Bu da vaxtında görülən tədbirlərin, atılan addımların nəticəsidir ki, Azərbaycanda pandemiya öz təsirini elə də yüksək göstərə bilmədi. Amma, təbii ki, bu, vətəndaşlarda heç bir arxayınçılıq yaratmamalı və onlar məsuliyyətsiz davranmamalıdırlar. Pandemiya səngiməyə doğru getsə də, amma tam olaraq məhv olmayıb. Bu gündən hansı bölgələrdə ki, SMS icazə sistemi ləğv olunub, həmin bölgələrin sakinləri daha məsuliyyətli davranmalıdırlar. Demək olar ki, respublika bölgələrinin 95 faizində bu sistem ləğv edilib, parklar, bulvarlar, restoran və kafelər açılıb. SMS icazə sisteminin ləğv edilməsi, kafe və restoranların, parkların, bulvarların, müxtəlif ictimai iaşə yerlərinin açılması, xüsusi karantin rejiminin bu şəkildə yumşaldılması vətəndaşa haqq vermir ki, o bunlardan sui-istifadə etsin. Bir şeyi yaddan çıxarmaq lazım deyil, Nazirlər Kabineti yanında Operativ Qərargah daim elan edir ki, karantin rejimi istənilən vaxt yenidən sərtləşdirilə bilər. Əlbəttə, bu addım yoluxma genişlənərsə, atılacaq. Vətəndaşlar nə etməlidirlər? Bu gün dünyanın elə ölkələri var ki, pandemiya sönmək əvəzinə, pik həddinə doğru gedir, çoxalır. Dünyanın bütün dövlət başçıları, mütəxəssisləri həyəcan təbili çalırlar ki, hələ vaksin tapılmayıb. Çox təəssüflər olsun ki, yaxşı halda vaksinin tapılması 2020-ci ilin sonlarında, 2021-ci ilin əvvəllərində gözlənir. Dünya alimləri də, virusoloqları da elan ediblər ki, vaksin tapılmayana qədər pandemiyaya qarşı mübarizənin müəyyən elementləri saxlanmaldıır. Bu, ilk növbədə, sanitar-gigiyena qaydasıdır, sosial məsafədir, kütləvi yığışmanın, gəzişmənin qarşısının alınmasıdır. Bunlar təkcə bizim deyil, bütün dünyanın qəbul etdiyi və səsləndirdiyi təkliflərdir. SMS icazə sistemi ləğv edilən bölgələrdə vətəndaşlar bundan sui-istifadə etməli deyillər. Onlar hər şeydən əvvəl öz ailələrini, yaxınlarını, bundan əlavə, cəmiyyəti, yaşadıqları mühiti, bütövlükdə, bütün respublikanı düşünməlidirlər. Çünki bu pandemiya elə bir bəladır ki, çox sürətlə yayılır. SMS icazə sistemi ləğv edilən bölgələrdə vətəndaşlar mövcud sanitar-gigiyena, sosial məsafə və sair qaydalara riayət etməsələr, pandemiyanın ikinci dalğası ilə üzləşə bilərlər. Bu təhlükə var və vətəndaşlar bunu bir daha bilməlidirlər. Allah eləməsin, vətəndaşlar qaydalara əməl etməsələr, bunun nəticəsində də yoluxma baş verərsə, bu yoluxma sürətlə yayıla bilər. Bu da ciddi fəsadlar törədə bilər”.
Ş.Ağayev hesab edir ki, Nazirlər Kabinetinin qoyduğu qaydalara, verdiyi tövsiyələrə ciddi əməl olunmalıdır. Müsahibimiz vurğuladı ki, SMS icazə sistemi ləğv edilən rayon və şəhərlərin əhalisi sanitar-gigyena qaydalarına riayət etməklə yanaşı, maskalardan istifadə etməyi yaddan çıxarmamalıdır. “Verilən icazədən sui-istifadə etmək lazım deyil. Çünki biz hələ əvvəlki yaşayış tərzimizə qayıtmamışıq və buna mərhələli şəkildə keçid etməkdəyik. SMS icazə sistemi ləğv edilən bölgələrin sakinləri elə davranmalıdırlar ki, heç bir problem baş verməsin və bütün respublika vətəndaşları əvvəlki həyat tərzinə qayıda bilsinlər. Bunlar baş verməsə, ikinci bir dönüş ola bilər və bu da daha acı nəticələrə səbəb olar. Ona görə də, fikimcə, bölgə əhalisi bütün bu qaydalara riayət edəcək”.
Ş.Ağayevin qənaətinə görə, yumşalma prosesinin başlanmasının əsas səbəbləri həm insanların psixoloji baryeri adlaması, həm onların işləməsi, həm də yaşadıqları rayonlarda təsərrüfat işləri ilə məşğul olması ilə bağlıdır. “Təbii ki, üç ay müddətində işləməyən vətəndaşları sosial-iqtisadi cəhətdən təmin etmək dövlət üçün çətindir. Ona görə də vətəndaşa verilən fürsətdən qəti surətdə sui-istifadə hallarına yol verilməməlidir. Nə qədər ki, dünya həyəcan təbili çalır, bu proseslər davam edir, dünyada hələ bu təhlükə sona çatmayıb, vaksin tapılmayıb, bütün mövcud qaydalara riayət olunmalıdır” - deyə Ş.Ağayev bildirdi.
İradə SARIYEVA
