Pandemiya yalnız Azərbaycanda deyil, bütün dünyada fəsadlar yaradıb. Təhsil sahəsində də koronavirusun böyük fasilələr yaratdığı məlumdur. Başqa ölkələrdən fərqli olaraq, Azərbaycan dövləti təhsildə boşluqların yaranmasına imkan vermədi və operativ şəkildə onlayn, virtual tədris metodları ilə bu prosesin davam etdirilməsini təmin etdi.
Dövlət tərəfindən bu istiqamətdə görülən işlər təqdirəlayiqdir. Azərbaycan Respublikası ərazisində təhsilin fasiləsizliyinin təmin olunması üçün Təhsil Nazirliyi müvafiq addımlar atdı. Bu addımlardan biri də “Mədəniyyət” TV-də yayımlanan “Dərs vaxtı” telelayihənin həyata keçirilməsidir.
Ekspertlər qeyd edirlər ki, pandemiyadan əziyyət çəkən dövlətlərin çoxu ilk bir ayda, ay yarımda təhsil haqqında düşünmədilər, onları daha çox qəfil yaxalandıqları pandemiya ilə mübarizə düşündürürdü. Azərbaycan dövlətinin isə pandemiya ilə mübarizə şəraitində belə təhsili unutmadığını və təhsillə bağlı maraqlı layihələr, proqramlar ortaya qoyduğunu deyən ekspertlər bunun təqdirəlayiq olduğunu vurğulayırlar. Onu da bildirək ki, Azərbaycan dövlətinin hazırladığı teledərs modelini başqa ölkələr də olduğu kimi tətbiq etməyə başlayıb. Böyük Britaniya və Ukrayna kimi elm-təhsil tutumlu ölkələr artıq bu modeli bir örnək kimi tətbiq edirlər.
“Kütləvilik və əlçatanlıq baxımından ən sərfəli və effektli olanı məhz teledərslərdir”
Tanınmış təhsil eksperti Nadir İsrafilov baki-xeber.com-a bildirdi ki, Azərbaycan dövlətinin pandemiya dövründə təhsilin fasiləsizliyinin təmin edilməsi üçün təqdim etdiyi modellər öz maraqlı cəhətlərinə görə seçilir: “Məlum olduğu kimi, təhsil müəssisələrinin müvəqqəti olaraq bağlanması ilə təlim-tədris prosesində yaranmış geriliyin aradan qaldırılması üçün Təhsil Nazirliyinin müvafiq ehtiyat variantları mövcuddur və bunun bir nümunəsi də teledərslərdir. Kütləvilik və əlçatanlıq baxımından ən sərfəli və effektli olanı məhz teledərslərdir. Vəziyyətin nəzarətdə saxlanması baxımından teledərslərin müvafiq dəstəkləyici resurslar - video, qrafika, səs və digər multimedia vasitələri, elektron mənbələr, vizuallaşdırılmış dərs formaları, “Virtual məktəb” layihəsinə start verilməsi, kifayət qədər dərslik, dərs vəsaiti, sinifdənxaric oxu materialı yerləşdirilmiş portallar, internet üzərindən bu kimi və digər mövcud olan mexanizmlərdən əsas və başlıca üstünlüyü odur ki, daha geniş auditoriyanı əhatə edir, bir neçə kanalda yayımlanır”.
Artıq, martın ortalarından etibarən rus bölməsi üzrə təhsil alan şagirdlər, eləcə də məktəbəhazırlıq qruplarında oxuyan uşaqlar üçün də teledərslər təşkil olunduğunu deyən ekspert hesab edir ki, bütün bu nümunələr müsbətdir: “Ekran qarşısında baxa bilməyənlər bu imkanı Təhsil Nazirliyinin elektron resursları ilə qazana bilərlər. Teledərslərin cədvəli gündəlik olaraq açıqlanır və hamı xəbərdar edilir. Təhsil naziri Ceyhun Bayramov da Azərbaycan Respublikasının Nazirlər Kabineti yanında Operativ Qərargahda keçirilən brifinq zamanı koronavirus pandemiyası ilə əlaqədar olaraq təhsil sahəsində dövlət tərəfindən verilən qərarlardan, Təhsil Nazirliyi tərəfindən atılan addımlardan, həyata keçirilən layihələrdən danışarkən, təhsil sektorunda fəaliyyətin dayandırılması ilə yaranan mövcud vəziyyətin mənfi təsirlərinin aradan qaldırılmasında, yaranmış boşluğun doldurulmasında teledərslərin əhəmiyyətini xüsusi vurğulayıb, hazırda təxminən 1 milyon 600 min şagirdin teledərslərdən yararlanmaq imkanına malik olmasına diqqət çəkib. Heç şübhəsiz ki, teledərslərin 1000-ci buraxılışının efirdə yayımlanması təhsil salnaməmizdə özünə yaddaqalan yer tutacaq. Distant təhsil, “Virtual məktəb”, digər layihələr və onlayn platformalar müəllim və şagirdlər arasında interaktiv ünsiyyətin formalaşmasına nə qədər şərait yaratsa belə, forma, məzmun və mahiyyət etibarilə teledərslərin yerini verə bilməz.
Bu Azərbaycan nümunəsinin, modelinin xarici ölkələrdə də tətbiq edilməsi çox müsbət haldır” - deyə N.İsrafilov vurğuladı.
İradə SARIYEVA
