Azərbaycan turizminin mövcud vəziyyəti, həmçinin, karantindən sonrakı və postpandemiya dövründə daxili turizmin inkişafını sürətləndirən amillər nəzərdən keçirilib. Ölkənin bütün turizm qurumlarının səyi ilə yaxın günlərdə daxili turizmin fəaliyyəti və inkişaf perspektivlərinin dəqiq mexanizmi işlənib hazırlanaraq müvafiq qurumlara təqdim olunacaq.
Azərbaycan Turizm Assosiasiyasının yaydığı məlumatda qeyd olunur ki, assosiasiya nümayəndələri tərəfindən pandemiya dövründə Azərbaycan turizminin mövcud vəziyyəti, həmçinin, karantindən sonrakı və postpandemiya dövründə daxili turizmin inkişafını sürətləndirən amillər nəzərdən keçirilib. Qurumlar arasında Assosiativ Tərəfdaşlıq haqqında Memorandum qəbul edilib. Memorandumun əsas məqsədi vahid platformadan çıxış edərək bütün səyləri bir araya gətirib, turizm qurumları arasında qarşılıqlı, səmərəli və faydalı əməkdaşlığı inkişaf etdirmək, turizmin inkişafında vətəndaş cəmiyyəti nümayəndələrinin fəallığını yüksəltmək, hər bir qurumu təmsil edən mütəxəssislərdən ibarət “beyin mərkəzi”nin yaradılması, zəruri layihələrin birgə işlənməsi, ölkənin turizm potensialının üzə çıxarılması və təbliği kimi məsələlərdir.
“Ramazan bayramından sonrakı dövr üçün insanların ən çox səfər etdikləri Quba, Xaçmaz, Şəki, Qəbələ istiqamətində yeni turizm marşrutları hazırlanır ”
"New Era” turizm şirkətinin rəhbəri, turizm sahəsi üzrə ekspert Elçin Rüstəmov qeyd etdi ki, bu sahədə beynəlxalq təcrübəyə istinadən işlər görülə bilər: "Tendensiya bütün ölkələrdə eynidir. Uçuşların olmadığı bir zamanda bütün dövlətlər əsas gücü daxili turizm potensialının inkişaf etdirilməsinə verib. Bizdə də beynəlxalq təcrübəyə istinadən müəyyən işlər görülür. Xüsusilə də Ramazan bayramından sonrakı dövr üçün insanların ən çox səfər etdikləri Quba, Xaçmaz, Şəki, Qəbələ istiqamətində yeni turizm marşrutları hazırlanır. Üzü yaya doğru getdiyi üçün axının böyük hissəsinin yay istirahət komplekslərinə olacağı gözlənir. Çimərlik mövsümü başladıqdan sonra əsas kütlə bu sahəyə yönələcək. Bu da, təbii ki, həmin ərazilərdə yerləşən turizm obyektlərinin gəlirinin genişlənməsi üçün olduqca əlverişli şərait yaradacaq. İnsanlar qoyulan gigiyenik qaydalara əməl etməklə bütün turizm xidmətlərindən istifadə edə bilərlər”.
Günel CƏLİLOVA
