Prezident İlham Əliyevin siyasətinin mərkəzində vətəndaş amilinin dayanması pandemiya dövründə məşğulluğa və sosial rifaha dəstək yönümündə genişmiqyaslı tədbirlərlə bir daha təsdiqini tapır.
Dövlətin indiki çətin dövrdə də öz vətəndaşının yanında olduğunun bariz nümunəsi olan bu tədbirlər, ilk növbədə, dövlət və özəl sektorda muzdla çalışan 1 milyon 640 minədək işçinin iş yerlərinin və əməkhaqqı gəlirlərinin qorunmasına imkan verdi. Sosial ödənişlərin davamlılığı təmin edilməklə, əsasən həssas qruplardan olan 2 milyon vətəndaşa sosial təminat növləri (pensiya, təqaüd, müavinət) üzrə ödənişlərin davamlılığı təmin edildi.
600 minədək aztəminatlı işsiz şəxsi əhatə edən birdəfəlik ödəmə proqramına, məşğulluq imkanlarının artırılması üçün 90 minədək şəxsin ödənişli ictimai işlərə cəlb olunmasına, özünüməşğulluq proqramı çərçivəsində minimum 12 min ailə kiçik təsərrüfatların qurulmasına başladı. 82 min ailənin 340 minədək üzvü ünvanlı dövlət sosial yardımı ilə, 20 minədək şəxsin işsizlikdən sığorta ödənişi, 100 minədək aztəminatlı ailənin ərzaq yardımı ilə təminatı işləri aparılır.
Beləliklə, pandemiya ilə əlaqədar təkcə Əmək və Əhalinin Sosial Müdafiəsi Nazirliyi tərəfindən həyata keçirilən dəstək tədbirləri 4,8 milyondan çox vətəndaşı və ya ölkə əhalisinin 48 faizini əhatə edir.
Bütövlükdə, sözügedən dəstək proqramlarının əhəmiyyətini ekspertlər necə dəyərləndirirlər?
“Bu, ölkədəki sosial siyasətin uğurudur”
Məsələyə münasibət bildirən ekspert Rəsul Cahangirlinin fikrincə, həyata keçirilən dəstək proqramları əhalinin böyük hissəsini əhatə edir: “Bu da çox böyük sosial əhəmiyyətə malikdir. Martın 19-da Prezident İlham Əliyev sərəncam verdi və ölkənin yaranmış təhlükədən sığortlalanması məqsədilə hökumət strukturları daxilində 4 işçi qrupu yaradıldı. Bunlar İqtisadiyyat Nazirliyinin, Mərkəzi Bankın, Maliyyə Nazirliyinin, bir də Əmək və Əhalinin Sosial Müdafiəsi Nazirliyinin nəzdindədir. Onların hər biri öz istiqamətləri üzrə fəaliyyət göstərir. Məsələn, əhalinin aztəminatlı təbəqəsinin sosial müdafisinin təşkili ilə ƏƏSMN-in tərkibində yaradılan işçi qrupu məşğul olur. Onlar ilkin olaraq analiz etdilər ki, mövcud vəziyyətdən əhalinin hansı qrupu əziyyət çəkir, bunun qarşısını almaq üçün hansı tədbirlər görülməlidir və s. Bu yöndə görülən işlərdən sonra sözügedın məqsədlə böyük məbləğdə vəsait ayrılıb. Pandemiyaya görə öz işini müvəqqəti olaraq itirən 600 mindən çox insan dövlət tərəfindən dəstəklə təmin edilir. Eyni zamanda, işsizlərlə bağlı problemlər öz həllini tapır. Əhalinin sosial rifahını qorumaq üçün digər mühüm addımlar çərçivəsində işsiz qalan şəxslərə dəstək mexanizmləri həyata keçirilir. Bunlardan ən mühümü 190 manat məbləğində birdəfəlik ödəmənin həyata keçirilməsidir. Prezidentin tapşırığı ilə birdəfəlik ödəmə 600 min şəxsə ödəniləcək və aprel-may aylarını əhatə edəcək. İki ay müddətində 190 manat birdəfəlik müavinət verilməsi üçün dövlət büdcəsindən əlavə olaraq 70 milyon manat vəsait ayrılıb. Karantin müddəti uzandığı halda birdəfəlik ödəmə - 190 manat növbəti aylarda da veriləcək. Görünən odur ki, məlum tədbirlər sayəsində tək ƏƏSMN xətti ilə yarım milyonadak insan sosial paketdən yararlanacaq. Əhalinin digər hissəsi isə başqa qurumların xətti ilə bu imkandan faydalanacaq. Bu, ölkədəki sosial siyasətin uğurudur”.
Vidadi ORDAHALLI
