Koronavirusla mübarəzə tədbirləri çərçivəsində xarici ölkələrə getmiş və qayıda bilməyən Azərbaycan vətəndaşları da hökumətin diqqətindən kənarda qalmırlar.
Yaranan məlum vəziyyətlə əlaqədar olaraq Türkiyədə təhsil alan azərbaycanlı tələbələr, bu ölkəyə turist kimi, yaxud səhhəti ilə bağlı müvəqqəti gələn və geri qayıda bilməyən Azərbaycan vətəndaşlarına yardım edilib. Belə ki, Prezident İlham Əliyevin tapşırığına uyğun olaraq, bu günə qədər Azərbaycanın Türkiyədəki səfirliyi vasitəsilə 8 mindən çox vətəndaşımıza qida, yataqxana ilə bağlı dəstək, yardım göstərilib. Qısamüddətli gələn Azərbaycan vətəndaşlarının kirayə haqları da ödənilir. İndiyədək 1000-ə yaxın bu kateqoriyadan olan Azərbaycan vətəndaşına kirayə haqları ilə bağlı yardım edilib.
Bundan başqa, ərəb ölkələrində yaşayan soydaşlarımıza da dövlət dəstəyi göstərilib. Birləşmiş Ərəb Əmirliklərinin Dubay şəhərində qalan vətəndaşlarımızın aprelin sonuna qədər ölkəyə qayıdacağı gözlənir. Koronavirus pandemiyası üzündən Dubaydan geri dönə bilməyən 75 azərbaycanlı kömək məqsədilə Diasporla İş üzrə Dövlət Komitəsinə müraciət edib, martın 26-dan bu günə qədər komitə onların otellərdə yerləşdirilməsini təmin edib və digər gündəlik iaşə xərclərini ödəyib.
Görünən odur ki, Azərbaycan dövləti, harada yaşamalarından asılı olmayaraq, bütün vətəndaşlarına sahib çıxır.
“Bu, dövlətimizin qüdrətinin göstəricisidir”
Məsələyə münasibət bildirən şərqşünas Seyid Camal Əzimbəylinin sözlərinə görə, bu, Azərbaycan dövlətinin qüdrətinin göstəricisidir: “Prezident İlham Əliyev başda olmaqla yeridilən siyasət xalqa xidmətə əsaslanır. Bu gün dünyada koronavirus pandemiyası tüğyan edir. Bir sıra dövlətlər bunun öhdəsindən gələ bilmir. Azərbaycanda görülən qabaqlayıcı tədbirlər sayəsində virusun kütləvi yayılmasının qarşısı alındı. Sözügedən tədbirlər görülməsəydi, bu, daha ciddi fəsadlara gətirib çıxaracaqdı. Bununla yanaşı, hökumət çoxsaylı sosial dəstək proqramı qəbul etdi. Bu məqsədlə 3 milyard manat büdcədən vəsait ayrılıb. Digər tərəfdən, xarici ölkələrdə qalan və geri qayıda bilməyən vətəndaşlar da qayğıdan kənardan qalmadılar. Onların kirayə, qida xərclərini dövlət öz üzərinə götürdü. Xarici ölkələrdəki səfirliklərimiz bütün bunları diqqət mərkəzində saxlayırlar. Bu onu göstərir ki, Azərbaycan dövləti, harada yaşamalarından asılı olmayaraq, bütün vətəndaşlarına sahib çıxır. Bu, dövlətimizin qüdrətinin göstəricisidir. Hesab edirəm ki, bu, qürurverici haldır”.
Vidadi ORDAHALLI
