Bildiyimiz kimi, 190 manat birdəfəlik yardım alan vətəndaşların sırası genişlənir. Artıq 400 min nəfərə işsizliyə görə birdəfəlik yardım verilib. Belə ki, Əmək və Əhalinin Sosial Müdafiəsi Nazirliyi işsizlər və xüsusi karantin rejiminə görə işini itirən qeyri-formal məşğul şəxslərdən ibarət aztəminatlıların daha 50 min nəfəri üçün birdəfəlik vəsaiti (190 manat) aidiyyəti üzrə köçürüb.
Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən verilən məlumata görə, Prezident İlham Əliyevin tapşırığına əsasən, birdəfəlik ödəmə proqramının əhatə dairəsi 3 dəfə artırılıb və proqram üzrə 600 min şəxs üçün birdəfəlik ödəniş edilməsi nəzərdə tutulub. Aprelin 9-dan gündəlik olaraq ödəniş prosesi həyata keçirilir. Artıq birdəfəlik ödəmə vəsaiti köçürülənlərin sayı 400 minə çatıb. Onlara, ümumilikdə, 76 milyon manat vəsait köçürülüb.
Birdəfəlik ödəmə vəsaiti köçürülən şəxsin bu ödəməni almaq üçün müraciət edərkən qeyd etdiyi telefon nömrəsinə bu barədə SMS göndərilir. O, mesajı aldıqdan sonra evdən çıxmaq üçün müvafiq qaydada icazə alaraq, mesajda “Azərpoçt” MMC qeyd edildiyi halda istənilən poçt şöbəsinə, bank göstərildiyi halda həmin bankın istənilən filialına şəxsiyyət vəsiqəsi ilə müraciət edərək birdəfəlik ödəməni əldə edir.
Əli Əlirzayev: “Fikrimcə, tam olaraq 600 min nəfərə birdəfəlik yardımlar verilib başa çatdıqdan sonra yenidən bu məsələyə qayıdılacaq və...”
Tanınmış iqtisadçı-alim, professor Əli Əlirzayev hesab edir ki, Prezidentin bu tapşırığının da operativ şəkildə həll edilməsi müsbət haldır.
Ə.Əlirzayev Prezidentin son iclasda nazir S.Babayevə bununla bağlı xüsusi tapşırıq verdiyini və ortaya 190 manat birdəfəlik yardım alacaq şəxslərin sayının 200 mindən 600 min nəfərə çatdırılması tələbini qoyduğunu bildirir. O hesab edir ki, qısa müddətdə operativ şəkildə 400 min vətəndaşa işsizliyə görə 190 manat məbləğində yardım edilməsi Prezidentin tapşırığının tez şəkildə icra edilməsi deməkdir: “İşsizliyə görə birdəfəlik sosial yardım verilən insanların sayının az və çox olması real vəziyyətdən asılıdır. Ola bilsin ki, bu gün birdəfəlik yardım almaq kriteriyalarına uyğun gələn şəxslər çoxdur, sadəcə, sənəd məsələsində olan problemlər buna imkan vermir, yaxud o adamın adına torpaq sahəsi, avtomobil, filan var, özü işləmirsə, evində başqa işləyən varsa, onda bu istiqamətdə say artımı elə də baş verməyəcək. Amma gəliri olmadan yaşayırsa, bu insanları işsiz kimi qəbul etmək olar. Bir alim kimi uzun illər bu sahədə tədqiqatlar aparmışam. Bir adamın bir aylıq gəliri yoxdursa belə, o demək ki, işsizdir. Yaxud kiminsə torpağı var, amma o ondan gəlir götürmürsə, demək, işsizdir. Hesab edirəm ki, 190 manat birdəfəlik yardım ehtiyacı olanlara verilməlidir. Düşünürəm ki, proses belə də həyata keçirilir. Prezident 600 min nəfərə işsizliyə görə birdəfəlik yardım edilməsi ilə bağlı tələb qoyub, artıq 400 min nəfər yardımla təmin olunub, bu, Prezidentin tapşırıqlarının operativ şəkildə icra edildiyini göstərir. Fikrimcə, tam olaraq 600 min nəfərə birdəfəlik yardımlar verilib başa çatdıqdan sonra yenidən bu məsələyə qayıdılacaq və birdəfəlik yardım alanların sayı daha da artırılacaq. Çünki buna ehtiyac var. Düşünürəm ki, birdəfəlik yardım təyin edilərkən əhalinin ehtiyacı olan təbəqəsi, həqiqətən də işsiz, dolanışığı olmayan insanlar nəzərə alınmaldır” - deyə Ə.Əlirzayev qeyd etdi.
İradə SARIYEVA
