Azərbaycanda həyata keçirilən sosial paket layihəsi günü-gündən daha çox vətəndaşı əhatə etməkdədir. Prezident İlham Əliyevin göstərişinə əsasən, ünvanlı sosial yardım alan ailələrin sayı artırılıb.
Məlumatlara görə, ünvanlı sosial yardım alan ailələrin sayı 82 minə çatıb. Belə ki, aztəminatlı ailələrə dövlət dəstəyinin artırılması sahəsində aparılan işlərdən biri kimi ünvanlı dövlət sosial yardım proqramının əhatə dairəsi də genişləndirilir.
Aprelin 1-dən ünvanlı sosial yardımı alanların sayı 12 min ailə artaraq 82 minə çatıb. Ünvanlı yardım alan ailə üzvlərinin sayı isə bu ay 50 min nəfər artıb və hazırda 340 min nəfərdir. Sosial yardımın hər ailəyə düşən orta aylıq məbləği də artmaqda davam edərək, 222 manata çatıb.
Onu da bildirək ki, xüsusi karantin rejimi müddətində ünvanlı dövlət sosial yardımının təyin olunma müddəti bitən aztəminatlı ailələrə də dəstək göstərilib. Onlara bu yardımın verilməsi müddəti karantin rejimi başa çatdığı tarixdən sonrakı ayın 1-dək uzadılıb.
Qeyd edək ki, ötən həftə ünvanlı sosial yardım alan ailələrin sayı 78 min 300-ə nəfər olub.
Ekspertlər qeyd edirlər ki, aztəminatı ailələrin ünvanlı sosial yardım proqramından faydalanmaq imkanlarının və proqrama əlçatanlığının artırılması işləri nəticəsində bu yardımı alan ailələrin sayı artmaqda davam edir.
“...onlar gələcəkdə müxtəlif proqramlara cəlb olunmaqla həm özləri üçün iş əldə edə, həm də...”
İqtisadi Resursların Öyrənilməsi Mərkəzinin sədri, tanınmış iqtisadçı Ruslan Atakişiyev “Bakı-Xəbər”ə bildirdi ki, dövlətin əsas hədəfi ehtiyacı olan şəxslərin, ailələrin ünvanlı sosial yardımla təmin olunması və onların sosial rifah halının yüksəldilməsidir. “Aprelin 15-də İqtisadiyyat naziri Mikayıl Cabbarov və Əmək və Əhalinin Sosial Müdafiəsi naziri Sahil Babayevlə keçirdiyi videokonfransda Prezident qeyd etmişdi ki, ümumiyyətlə, ünvanlı sosial yardımın gələcəkdə əhatə dairəsini genişləndirmək lazımdır. Məsələ bundan ibarətdir ki, ünvanlı sosial yardım praktikası Azərbaycanda uzun müddətdir tətbiq olunur. Amma bilirsiniz ki, əvvəlki dövrlərdə ünvanlı sosial yardımın meyarlarına uyğun insanların seçilməsi prosesində çoxlu qanunsuzluq, sui-istifadə halları baş verirdi. Xüsusən son dövrlər həyata keçirilən islahatlar nəticəsində bu işi həyata keçirən regional idarələrdə vəzifəli şəxslərin işdən kənarlaşdırılması baş verdi və şəffaflaşdırma işləri aparıldı. O cümlədən də artıq ünvanlı sosial yardım almaq üçün müraciətlərin onlayn şəkildə həyata keçirilməsi nazirliyin, yaxud Sosial Müdafiə Fondunun əməkdaşlarının vətəndaşlarla təmasını minimuma endirib. Ona görə də bu gün imkan yaranıb ki, mövcud şəffaflıq prosesindən yararlanaraq həqiqi o meyarlara cavab verən şəxslərin aşkarlanması və onlara ünvanlı sosial yardımın təyin olunması daha uyğundur. Bu baxımdan, həm son dövrlər baş verən koronavirus pandemiyası zamanında ünvanlı sosial yardım alan ehtiyacı olan insanların sayının artması təqdirəlayiqdir”.
R.Atakişiyev, həmçinin, qeyd etdi ki, aprelin 15-də keçirdiyi onlayn iclasda Prezident özü ünvanlı sosial yardımın dairəsinin genişləndirilməsi ilə bağlı nazirə konkret göstərişlər verib. “Gördüyümüz kimi, Prezidentin bu istiqamatdə verdiyi tapşırıqlar operativ şəkildə həll olunur və ünvanlı sosial yardım alanların sayı qısa müddət ərzində bu qədər artıb. Hesab edirəm ki, yenə də artım olacaq və daha çox vətəndaş ünvanlı sosial yardımla təmin ediləcək. Prezident nazirə ünvanlı sosial yardım alanların əhatəsini genişləndirməyi tapşırmışdı. Genişləndirmə prosesini gerçəkləşdirən məsələlərdən biri də ondan ibarətdir ki, ünvanlı sosial yardım almaqla bağlı müraciətlər var. Ünvanlı sosial yardımın təyin olunması ilə bağlı müraciətlərə cavab verilməsi, insanların bura cəlb edilməsi ona görə əhəmiyyətlidir ki, bura cəlb olunma nəticəsində yeni proqramlar yaranır. Bu proqramlar nədən ibarətdir? Ünvanlı sosial yardım alan insanlar, vətəndaşlar qarşıdakı dövrlərdə Əmək və Əhalinin Sosial Müdafiə Nazirliyinin özünüməşğulluq proqramından da istifadə etmək imkanı əldə edirlər. Qeyd edək ki, onların özünüməşğulluq proqramı ilə yanaşı, peşə hazırlığı proqramlarına da cəlb edilmək imkanları yaranır. Bu gün vətəndaşların ünvanlı sosial yardım almalarına baxmayaraq, onlar gələcəkdə müxtəlif proqramlara cəlb olunmaqla həm özləri üçün iş əldə edə, həm də özünüməşğulluq proqramı çərçivəsində öz bizneslərini təşkil etmək imkanı qazana bilərlər” - deyə R.Atakişiyev qeyd etdi.
İradə SARIYEVA
