Dünyanın bir sıra ölkələri kimi, Azərbaycanda da karantin və sosial təcrid rejimi tətbiq olunub. Bu virusa qalib gəlmək üçün dövlət tərəfindən hər bir iş görülür. Məlumdur ki, iki aya yaxındır virusun sürətlə yayılmaması üçün ölkədə karantin rejimi tətbiq olunub. Bununla yanaşı, adıçəkilən virusa yoluxanların qısa müddətdə sağalması üçün səhiyyə müəssisələri lazımi tibbi avadanlıqlarla təmin olunub. Aprelin 25-də keçirilən Operativ Qərargahın brifinqində də bu məsələyə toxunulub. Qeyd olunub ki, ölkədə dərman, süni tənəffüs aparatları və qoruyucu maskaların qıtlığı yaşanmır.
Qeyd edək ki, əksər xarici ölkədə koronavirusa yoluxmuş xəstələrin rahat nəfəs almaları üçün süni nəfəs aparatı problemi yaşanır. Bunu bir sıra xarici ölkələrin rəsmiləri etiraf ediblər.
Məlumat üçün deyək ki, süni nəfəs aparatı tənəffüs və ya ağciyərlərin kəskin tənəffüs çatışmazlığı, habelə ümumi narkoz vaxtı orqanizmin oksigen təminatını təmin etmək üçündür. Süni tənəffüs aparatı təcili tibi yardımın - reanimasiyanın əsas sütunu hesab olunur. Süni tənəffüsün tam nəzarətli taktikası zamanı xəstə xüsusi preparatlarla medikamentoz komaya salınır, traxeya intubasiya edilərək süni tənəffüs aparatına keçirilmiş olur. Bu zaman pasient tam şəkildə süni tənəffüs aparatından asılı olur. Sevindirici haldır ki, ölkəmizdə süni nəfəs aparatı problemi yaşanmır . Bununla yanaşı, koronavirusun müalicəsi üçün lazım olan dərman preparatlarında da qıtlıq yaşanmır.
Məsələ ilə bağlı fikir bildirən həkim-ekspert Rasif Bağırov qeyd etdi ki, koronavirus pandemiyasının geniş yayılmaması üçün ölkəmizdə lazımi işlər görülməkdədir: “Karantin rejiminin tətbiq olunması, virusa yoluxan xəstələrin qısa müddətdə sağalması üçün xəstəxanalarda hər bir şərait yaradılıb. Eyni zamanda, virusun sürətlə yayılmasının qarşını almaq üçün lazım olan tibbi maska problemi bu gün öz həllini tapıb. Artıq apteklərdə maska qıtlığı yaşanmır. Məlumdur ki, bu ayın əvvəlində Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışı baş tutdu. Həmin müəssisə sayəsində bu gün ölkəmizdə tibbi maska problem aradan qaldırıldı”.
Həmsöhbətimiz onu da əlavə etdi ki, koronavirusa yoluxmuş xəstələrin sağalması üçün lazımi tibbi avadanlıqlar və dərman preparatı sahəsində problem yaşanmır. Həmçinin, koronavirusdan əziyyət çəkən xəstələrin rahat nəfəs almaları üçün ölkəmizdə süni nəfəs aparatı problemi yaşanmır. Aidiyyəti qurumlar bu kimi məsələləri lazımi səviyyədə həll edirlər.
Günel CƏLİLOVA
