Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.
"Ölkədə koronavirusa görə hər milyon nəfərə düşən testlərin sayı 1064 təşkil edir ki, bu da dünya üzrə yüksək göstəricilərdəndir" - deyən Tibbi Ərazi Bölmələrinin İdarəetmə Birliyinin (TƏBİB) sədri Ramin Bayramlının sözlərinə görə, ölkəmizdə koronavirus xəstəliyinin aşkarlanması üçün bütün imkanlar var.
R.Bayramlı qeyd edib ki, ölkədə yüksək keyfiyyətli reaktivlərdən istifadə edilir: “Vətəndaşların dəstəyi çox önəmlidir. Çağrı mərkəzində könüllülər çalışmağa başlayıb. Çağrı mərkəzlərinin əsas fəaliyyəti koronavirusla bağlı məlumatların verilməsi, psixoloji dəstəyin göstərilməsidir”.
R.Bayramlı qeyd edib ki, çarpayı fondunun genişləndirilməsi üçün 10 modul tipli xəstəxananın tikilməsinə başlanılıb: “Bu xəstəxanalar qısa müddətdə açılacaq və həkimlərimiz təlimdən keçərək orada fəaliyyətə başlayacaqlar”.
"Karantin tədbirlərinin tam aradan qaldırılması ilə koronavirusun ikinci dalğasının baş vermə ehtimalı var"
R.Bayramlı bildirib ki, karantin tədbirlərinin tam aradan qaldırılması ilə koronavirus infeksiyasının ikinci dalğasının baş verməsi ehtimalı var. Onun sözlərinə görə, bu gün Azərbaycanda koronavirus xəstələrinin müalicəsi üçün tələb olunan dərman vasitələri və süni aparatlarla bağlı heç bir qıtlıq yoxdur.
R.Bayramlının sözlərinə görə, əgər göstəricilər yenidən yüksələrsə, karantin rejimi təkrar gücləndirilə bilər: “Vaksinasiya problemi həll edilənə qədər yoluxma halları davam edə bilər. Yoluxmanın sürətini və əhatəliliyini diqqət altında saxlamaq çox vacibdir”.
Azərbaycanda koronavirusdan ölənlərin yaş göstəriciləri...
Azərbaycanda koronavirusdan vəfat edənlərin yaş göstəriciləri də açıqlanıb. Tibbi Ərazi Bölmələrinin İdarəetmə Birliyinin sədri bildirib ki, 40-49 yaş arasında 1 nəfər, 50-59 yaş arası 8 nəfər, 70-79 yaş arası 3 nəfər, 80 yaşdan yuxarı isə 4 nəfər vəfat edib.
Onun sözlərinə görə, Azərbaycanda xarici vətəndaşlar arasında yoluxma 13.16% təşkil edir. Virusa yoluxanların 50 faizdən çoxu Bakıda qeydə alınıb: "İndiyədək Azərbaycanda koronavirusa qarşı 114 410 test icra edilib. Koronavirusdan müalicə edilən aktiv xəstələrin sayı 558, reanimasiyada müalicə alan xəstələrin sayı 20 nəfərdir. Onlardan 7 nəfəri süni tənəffüs aparatına qoşuludur".
R.Bayramlı əlavə edib ki, ümumi yoluxma hallarının 3,5 faizi Sumqayıt şəhərinin payına düşüb. Bakının Binəqədi və Yasamal rayonlarının payına daha çox yoluxma faktı düşür.
Koronavirus infeksiyasının yayılması prosesi davam edir
Səhiyyə nazirinin müavini Viktor Qasımov deyib ki, ölkədə hələ də koronavirus infeksiyasının yayılması prosesi davam edir. Onun sözlərinə görə, martın sonu və aprelin əvvəlində bu virusa yoluxanların sayında artım olub: "Karantin rejiminin tətbiqi ilə vəziyyət nəzarətə götürülüb. Vətəndaşlar qaydalara maksimum riayət edib. Xəstələr vaxtında nəzarətə götürülməsəydi, bu prosesdə ağırlaşdırıcı hal yaşana bilərdi. Amma ciddi karantin tədbirləri ölkəmiz üçün əhəmiyyətli oldu. Diaqnostik testlərin sayı da çox oldu. Əvvəl bir gündə 200-300 test aparılırdısa, sonradan bu say 5000 oldu. Dövlət üzərinə düşən bütün tədbirləri gördü. Əhali bundan sonra da qaydalara riayət etsə, biz bu xəstəlikdən qurtula bilərik. Karantin yumşaldıqdan sonra yoluxma halları artarsa, karantin rejimi yenidən sərtləşdirilə bilər. Artıq 12 rayonda fəal virus ocaqları məhv edilib. Araşdırmalarımız zamanı məlum olub ki, həmin rayonlarda artıq koronavirus xəstəliyi yoxdur. Sosial izolyasiya, şəxsi qidalanma və gigiyenalara nəzarət etsək, nailiyyətlərimiz daha çox olacaq".
300-ə yaxın tibb işçisi koronavirusa yoluxub
V.Qasımov deyib ki, Azərbaycanda 300 nəfərə yaxın tibb işçisi koronavirusa yoluxub. Onun sözlərinə görə, yoluxan həkimlərin əksəriyyəti başqa yerdə yoluxub. Onların 60-70 faizi sağalıb və artıq işlərini davam etdirirlər. Virusa yoluxan tibb işçiləri arasında ölən və vəziyyəti ağır olan yoxdur.
Nazir müavini bildirib ki, Azərbaycanda koronavirusla bağlı vəziyyət hələ də ciddi nəzarətdə saxlanılmalıdır.
V.Qasımov vurğulayıb ki, hazırda Azərbaycanda maska problemi yoxdur: "Hazırda ölkədə tibbi ləvazimatlar və qoruyucu vasitə ilə bağlı heç bir problem yoxdur. Bu problem tam aradan qaldırılıb. Artıq yerli istehsal var və kifayət qədər tibbi ləvazimat əldə etmək mümkündür".
Məktəblərin açılması məsələsi epidemioloji vəziyyətdən asılıdır
V.Qasımov deyib ki, məktəblərin açılması məsələsi epidemioloji vəziyyətdən asılıdır. Onun sözlərinə görə, Operativ Qərargahın qaydaların yumşaldılması ilə bağlı qərarlarından asılı olaraq bu məsələyə də baxılacaq.
TƏBİB-in İdarə Heyətinin sədri Ramin Bayramlı isə qeyd edib ki, fərdi kursların fəaliyyəti ilə bağlı da qaydalar hazırlanacaq.
Ev şəraitində 3 minə yaxın şəxs karantində saxlanılır
V.Qasımov hazırda Azərbaycanda 2 cür karantin olduğunu deyib. Onun sözlərinə görə, hazırda ev şəraitində 3 minə yaxın şəxs karantində saxlanılır və gündəlik səhhətləri nəzarətdədir: "Xaricdən gələn şəxslər də karantinə götürülür və ayrılmış xüsusi yerlərdə nəzarətdədirlər. Hazırda xaricdən gəldiyi üçün karantində saxlanılanların sayı 5 minə yaxındır".
