Koronavirus pandemiyası yayılandan sonra virusa qarşı qabaqlayıcı tədbirlər görən dövlətlərdən biri də Azərbaycan oldu. Məhz bunun nəticəsində ölkədə virusa yoluxanların sayı az oldu. Doğrudur, bir sıra ölkələrdəki kimi ən sərt qaydalar tətbiq olunmadı, amma bununla bərabər atılan addımlar müsbət nəticə verir. Karantin qaydalarını pozanlarla bağlı cəza tədbirləri də ya qısamüddətli həbs, ya da pul cəriməsi ilə məhdudlaşır.
Ancaq müşahidələr göstərir ki, son günlər bir sıra hallarda karantin qaydalarının kütləvi pozulması faktları baş verməkdədir. Məsələ ondadır ki, 190 manat birdəfəlik yardımın alınması ilə bağlı son günlər Bakıətrafı bəzi yerlərdə vətəndaşlar karantin qaydalarının kütləvi pozulmasına yol verirlər. Belə ki, Sabunçu rayonunun Zabrat, Maştağa qəsəbələrində yerləşən “Azərpoçt”un filiallarının qarşısında insanlar kütləvi halda sıxlıq yaradırlar. Necə gəldi poçt binasının qarşısına toplaşırlar. Onların bir çoxu nəinki rezin əlcəklərdən, heç adi tibbi maskalardan belə istifadə etmir. Bu azmış kimi, hətta Nazirlər Kabinetinin müvafiq qərarında nəzərdə tutulmuş 2 metrlik məsafə belə gözlənilmir. Bu da virusa yoluxma risqini artırır. Neçə gündür adıçəkilən qəsəbələrdə yerləşən “Azərpoçt”un filiallarının qarşısında bu cür xoşagəlməz mənzərə yaşanır. Bütün dünyada tüğyan edən koronavirusa vətəndaşların belə biganə münasibət göstərməsi təəssüf doğurur.
“Dövlət vətəndaşlara kömək edirsə, onlar da dövlətə kömək etməlidirlər ki, virusa yoluxma geniş yayılmasın”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının fikrincə, vətəndaşlar qaydalara riayət etməməklə həm özlərinin, həm də digərlərinin həyatını təhlükəyə atırlar: “Bu gün Azərbaycan dövləti ona görə vətəndaşlara birdəfəlik sosial yardım edir ki, işsiz əhali evdə oturub. Günəmuzd gedib pul qazana bilmirlər. Vətəndaşlar 190 manat alarkən öz sağlamlıqlarını qorumurlarsa və ən zəruri qaydalara əməl etmirlərsə, deməli, onlar verilən yardımın mahiyyətini də başa düşmürlər. Azərbaycan dövləti məşğulluq mərkəzlərində işsiz kimi qeydiyyatdan keçməyənlərə də yardım edir. Ona görə də insanlar bunun məsuliyyətini, dövlətin humanist addımını anlamalıdırlar. Dövlət bu yardımı ona görə verir ki, insanlar evdə otursunlar və özlərini qorusunlar. 190 manat alarkən qaydalara əməl etmirlərsə, bir-birinin yanında ara məsafəni gözləmədən dururlarsa, sabah virusa yoluxsalar, o yardım onlara kömək edə bilməyəcək. Çünki bu zaman pandemiyanın yayılması kütləvi hal ala bilər. Ona görə də diqqətli və təmkinli olmaq lazımdır. Yardım alarkən məsafəni gözləmək və tələb olunan zəruri qaydalara əməl etmək lazımdır. Dövlət vətəndaşlara kömək edirsə, onlar da dövlətə kömək etməlidirlər ki, virusa yoluxma geniş yayılmasın”.
Vidadi ORDAHALLI
