Respublikamızda tətbiq edilən karantin rejiminin qaydalarına bütün vətəndaşlar birmənalı olaraq riayət etməlidirlər. Bildiyimiz kimi, ölkəmizdə karantin elan olunsa da, həyati vacib olan sahələrdə çalışan insanlar fəaliyyət göstərir, onların xeyli bir hissəsi şənbə və bazar günləri istisna olmaqla hər gün işə gedirlər.
Son vaxtlar karantin qaydalarını pozanlar içində icazəsi olanların olduğu qeyd edilir. Onlar arasında qeyri-iş günlərində də onlara işdən verilmiş müvafiq arayışdan sui-istifadə edənlər tapılır.
Daxili İşlər Nazirliyinin Mətbuat Xidmətinin rəisi, polis polkovniki Ehsan Zahidov mətbuata bildirib ki, icazəsi olan şəxslər də şənbə və bazar günləri digər vətəndaşlar kimi müvafiq xidmətdən icazə almalıdırlar: “İcazəsi olan şəxslər qeyri-iş günlərində evdən çıxmaq üçün digər vətəndaşlar kimi 8103 qısa SMS xidmətindən istifadə etməlidirlər”.
E.Zahidovun sözlərinə görə, həmin şəxslərə icazə yalnız işə gedib-gəlmək üçün verilib, istirahət günü onlar da digər şəxslərlə eyni hüquqa malik olurlar.
O bildirib ki, həftənin bütün günü işləyən şəxslər, o cümlədən, jurnalistlər polislər tərəfindən nəzərə alınacaqlar.
Qeyd edək ki, DİN Mətbuat Xidmətinin yaydığı məlumatda ölkə ərazisində tətbiq edilmiş xüsusi karantin rejimi dövründə xidməti vəsiqə və ya iş yeri haqqında arayış əsasında hərəkətinə yol verilən, eləcə də barəsindəki məlumatlar işəgötürən tərəfindən icaze.e-gov.az portalına daxil edilmiş şəxslərin yalnız həftənin iş günlərində icazə almadan hərəkət edə biləcəyi açıqlanıb.
“Azərbaycan dövləti karantin dövründə medianın azad, sərbəst fəaliyyəti üçün bütün lazımi şəraiti yaradır”
Siyasi şərhçi və media üzrə ekspert Azər Həsrət “Bakı-Xəbər”ə bildirdi ki, iş icazəsindən sui-istifadə edilməsi düzgün deyil: “O arayışın da üzərinə yazılıb ki, işə gedib-gəlmək üçündür. Təbii ki, bu arayışdan yalnız iş günlərində istifadə edilməsi məntiqlidir. Ona görə də Daxili İşlər Nazirliyi icazəsi olanlara bu xəbərdarlığı etmək məcburiyyətindədir ki, əllərindəki sənəddən vətəndaşlar sui-istifadə etməsinlər. Bu insanların bəziləri qeyri-iş günlərində də icazəsiz evdən çıxmağa, sərbəst gəzib-dolaşmağa meyl edirlər. Nazirliyin çağırışları və karantinin mövcud qaydaları onu tələb edir ki, insanlar yalnız işə gedib-gəlmək üçün həmin icazədən istifadə edə bilərlər. Jurnalistlərə gəlincə, dünyanın hər yerində indiki karantin dövründə də, müharibələrdə də jurnalistlərin sərbəst hərəkəti üçün mümkün qədər şərait yaradılır. Çünki media elə bir sahədir ki, onun fəaliyyətində limit yoxdur, həftənin 7 günü 24 saat jurnalistlər dayanmadan işləyir, insanları informasiya ilə təmin edirlər. Bu baxımdan, Daxili İşlər Nazirliyinin bu nüansı nəzərə alması, əlbəttə, təqdirəlayiqdir. Biz açıq görürük ki, karantin dövründə jurnalistlərin fəaliyyətinə bu və digər mənada əngəl törətməyə cəhdlər yoxdur”.
A.Həsrət hesab edir ki, təsadüfən anlaşılmazlıq halları baş verə bilir, amma o da dərhal öz həllini tapır. Müsahibimizin sözlərinə görə, karantin rejimində jurnalistlərin öz peşə fəaliyyətini həyata keçirməsi üçün bütün şərait yaradılıb. “Bu baxımdan, düşünürəm ki, Daxili İşlər Nazirliyi, Nazirlər Kabineti yanında Operativ Qərargah, bütövlükdə, Azərbaycan dövləti karantin dövründə medianın azad, sərbəst fəaliyyəti üçün bütün lazımi şəraiti yaradır. Əlbəttə, bu da təqdir olunası bir yanaşmadır” - deyə A.Həsrət vurğuladı.
İradə SARIYEVA
