Karantin rejiminin qaydalarına hər bir vətəndaş ciddi riayət etməli olduğu halda, təəssüf ki, bəzi şəxslər bilərəkdən, yaxud bilməyərəkdən mövcud qadağaları pozurlar. Karantin rejimini pozan vətəndaşların bu hərəkətləri ilə bağlı isə qanunvericilikdə nəzərdə tutulan qaydalar çərçivəsində ölçü götürülür.
İndiyə qədər bu istiqamətdə qaydaları pozduğuna görə kifayət qədər vətəndaş müxtəlif məbləğlərdə cərimələnib. Bu hadisədən nəticə çıxarmayan digər vətəndaşlar da onların yolunu gediblər, nəticədə isə özləri də cərimələniblər.
DYP karantin rejiminin pozulmasına görə 36 364 hərəkət iştirakçısını cərimələyib. Ölkə ərazisində tətbiq edilmiş xüsusi karantin rejimi ilə əlaqədar 22.04.2020-ci il, saat 00:00-dan 23.04.2020-ci il, 00:00-dək olan müddət ərzində DYP əməkdaşları tərəfindən görülmüş işlər barədə məlumat açıqlanıb.
DYP-dən mətbuata bildirilib ki, koronavirus (COVID-19) infeksiyasının yayılmasının qarşısının alınması məqsədilə tətbiq edilən xüsusi karantin rejiminin pozulmasına görə 22.04.2020-ci il, saat 00:00-dan 23.04.2020-ci il, 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 1 208 nəfər İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.
Ümumilikdə, 01.04.2020-ci il tarixindən bu günədək respublikanın, o cümlədən, paytaxtın avtomobil yollarında xüsusi karantin rejiminin pozulmasına görə 36 364 hərəkət iştirakçısı inzibati məsuliyyətə cəlb edilib.
Onu da qeyd edək ki, ictimaiyyət arasında müxtəlif şayiələr dolaşır. Dolaşan şayiələrə görə, guya karantin rejimi başa çatdıqdan sonra karantin dövründə qaydaları pozan vətəndaşların cərimələri ləğv ediləcək. Hazırda cəmiyyətdə “cərimələrin ləğv ediləcəyi” ümidilə yaşayan və bu şayiəyə inanıb qaydaları pozmağa cəhd edənlər təəssüf ki, var.
Bir neçə gün öncə mətbuatda koronavirus pandemiyasının Azərbaycanda sürətlə yayılmasının qarşısını almaq üçün tətbiq edilən qaydalardan biri - zərurət olmadan və icazə almadan evdən çıxmağın qadağan olunmasına qeyri-ciddi yanaşanların olduğu haqda yazılmışdı. Qeyd edilirdi ki, bu qaydanı pozan şəxslər barəsində Daxili İşlər Nazirliyinin əməkdaşları tərəfindən cərimə protokolları tərtib edilir. Əksər şəxs İnzibati Xətalar Məcəlləsinin 211-ci maddəsinin minimum həddində, yəni 100 manat cərimə olunur. Lakin bəzi şəxslər bu prosedura ciddi yanaşmırlar.
Bəzi vətəndaşlar "yaz cəriməni, çıxım gedim. Onsuz da ödəməyəcəyəm" - deyirlər. Əslində isə onların cərimələri ödəməməsinə heç bir əsas yoxdur.
Bir neçə gün əvvəl Daxili İşlər Nazirliyinin Mətbuat Xidmətinin rəisi, polis polkovniki Ehsan Zahidov mətbuata açıqlamasında bu cür düşünənlərin səhvə yol verdiyini deyib. “Deyilənlər tamam yanlış və qeyri-ciddi fikirlərdir. Karantin rejiminin pozulmasına görə tətbiq edilən cərimələrin ödətdirilməsi mexanizmi mövcuddur” - deyə o bildirmişdi.
”Epidemiya əleyhinə karantin rejimini pozanlar isə “karantindən sonra cərimələr ləğv ediləcək” xəyalını birdəfəlik unutmalı...”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev bizimlə söhbətində qeyd etdi ki, bu gün cəmiyyətdə karantin bitəndən sonra karantin rejiminin tətbiqi zamanı qaydaları pozduğuna görə cərimələnən vətəndaşların cəriməsinin silinəcəyi ilə bağlı yalan məlumatların, şayiələrin heç bir əsası yoxdur. Ş.Əliyev hesab edir ki, bu şayiəni bu düşüncədə olan vətəndaşlar yayırlar. “Bəzi insanlar bir vətəndaş olaraq öz məsuliyyətini dərk etmək istəmir və qaydaları pozur, sonra da şayiə yayırlar ki, qadağanı pozanlar üçün tətbiq edilən cərimə karantindən sonra ləğv olunacaq. İctimai düşüncədə, şüurda “cərimələrin ləğv ediləcəyi” ilə bağlı şayiələr ayaq tutsa da, amma o yalanın yeriməsinin, irəliləməsinin heç bir hüquqi əsası yoxdur. Burada nüanslar belədir. Karantin rejiminin tələblərinin pozulmasına görə tətbiq edilən cərimələr mövcud İnzibati Xətalar Məcəlləsi ilə hüquqi status alır. 211-ci maddədən söhbət gedir. Bu maddənin bundan sonra ləğv edilməsi heç ağılabatan deyil və ümumiyyətlə, heç perspektivi də yoxdur. Çünki yalnız İnzibati Xətalar Məcəlləsinə, yaxud cinayət hüquq qanunvericiliyinə olan əlavə və dəyişikliklər zamanın tələbinə buraxılır. Amma bu gün polisin “Polis haqqında” Qanunun, “Əməliyyat-axtarış fəaliyyəti haqqında” Qanunun, insan hüquqları ilə bağlı ölkənin konstitusion tələblərinə uyğun fəaliyyət istiqamətini həyata keçirməsi sadaladığım normativ-hüquqi aktlar əsasında tənzimlənir.
Ancaq bütün bunlardan sonra cəmiyyətdə karantin dövründə tətbiq edilən cərimələrin karantin başa çatdıqdan sonra ləğv ediləcəyi barədə yayılan şayiələrin heç bir əsası yoxdur. Çünki hüquqi-normativ sənədlər belə düşünməyə imkan vermir. Vətəndaşlara mesaj vermək istəyirəm ki, istənilən halda, polisin, qanunun tələbinə tabe olmaq hər bir Azərbaycan vətəndaşının borcudur. Orada fərqi yoxdur, bu karantinlə, yoxsa başqa bir halla bağlıdır. Əhalinin gur olduğu yerlərdə bəzi vətəndaşlar ictimaiyyətə hörmətsizlik hallarına yol verirlər. Bu, artıq xuliqanlıqdır. Polis əməkdaşı ona “dur” desə, o durmazsa, polisin, qanunun tələblərinə tabe olmamaq kimi məsuliyyətə cəlb oluna bilər. Burada inzibati məsuliyyət də, cinayət məsuliyyəti də ola bilər”.
Ş.Əliyev hesab edir ki, bütün hallarda, epidemiya əleyhinə karantin rejiminin tələblərini pozan və buna görə cərimələnən vətəndaşlar cərimələrini ödəyəcəklər, onları cərimələrin ləğv edilməsi məsələsi gözləmir: “Bütün vətəndaşlar karantin rejiminin tələblərinə əməl etməli, qanunları, qaydaları pozmamalıdırlar. Epidemiya əleyhinə karantin rejimini pozanlar isə “karantindən sonra cərimələr ləğv ediləcək” xəyalını birdəfəlik unutmalı və dövlətin qanunlarına riayət etməli, qanunları pozmamalıdırlar” - deyə Ş.Əliyev vurğuladı.
İradə SARIYEVA
