Hökumət koronavirusla bağlı daha bir sosial addım atıb. Adına VÖEN olan vətəndaşlar bundan istifadə etmirsə, yaxud qısamüddətli hər hansı məqsəd üçün onlara lazım olub və indi istifadə etmirlərsə, onlar da 190 manat birdəfəlik yardım ala bilərlər. Bunun üçün sadəcə VÖEN-ləri bağlamaq kifayətdir.
Bu barədə mətbuata açıqlama verən Əmək və Əhalinin Sosial Müdafiəsi nazirinin müavini Anar Kərimov bildirib ki, 190 manatlıq müavinətdən bəhrələnmək istəyən vətəndaşlar adlarına olan VÖEN-i ləğv etdirməlidirlər: “10 minlərlə vətəndaş var ki, əmək müqavilələri, VÖEN-ləri olub. Hətta bəzi hallarda azyaşlı uşaqlarının adına da müraciətlər olub. Bu sistem də kontingentin sayını nəzərə alaraq kompyuterin üzərindən aparılır. Sistemlər Vergilər Nazirliyi və digər qurumların altsistemləri ilə inteqrasiya olunub. Ona görə vacibdir ki, vətəndaşlarımız əgər öz VÖEN-lərindən istifadə etmirlərsə, yaxud qısamüddətli hər hansı məqsəd üçün onlara lazım olub və indi istifadə etmirlərsə, onlar bizə kömək etsinlər. Müraciət edib qısa müddətdə o sistemlərdə VÖEN-lərini ləğv etdirsinlər, bağlatdırsınlar. Bu müavinətdən bəhrələnmək istəyirlərsə, mütləq müraciət edərək o VÖEN-lərə xitam versinlər”.
A.Kərimov bildirib ki, VÖEN-i ləğv edilən vətəndaş 190 manat müavinət üçün yenidən müraciət edə bilər: “Vətəndaşlar artıq 190 manat üçün müraciət edib, sonra adlarına VÖEN olduğunu biliblərsə, yenidən müraciət edə bilərlər. VÖEN ləğv edildikdən sonra vətəndaşın hər bir müraciəti yeni müraciət kimi baxılacaq və və altsistemlərdə yenidən yoxlanacaq. Məlumat əgər dəyişdirilibsə, meyar artıq müsbətdirsə, müraciətin də cavabı, ümumilikdə, müsbət olacaq”.
Nəzərə almaq lazımdır ki, bir çox vətəndaşın adına VÖEN olsa da, ondan aktiv istifadə etmirlər. Buna baxmayaraq, sözügedən imkandan yararlana bilmirlər. O baxımdan məlum qərar bir çox vətəndaşa 190 manat birdəfəlik yardım almaq imkanı yaradacaq.
“Müəssisənin nə qədər işçisi varsa, onlara minimum əməkhaqqı verilməlidir”
Məsələyə münasibət bildirən iqtisadçı-alim Əli Əlirzayev hökumətin bu sosial xarakterli qərarına müsbət prizmadan yanaşdı: “Həqiqətən də elə vətəndaşlar var ki, adına VÖEN olsa da, ondan aktiv şəkildə istifadə etmirlər. Hər üç aydan bir hesabat verirlər. Nəticədə indiki vaxtda belələri bu imkandan yararlana bilmirlər. Ona görə də sözügedən qərar imkan yaradacaq ki, onlar da 190 manat birdəfəlik yardım alsınlar. Digər tərəfdən, elələri var ki, iş yerində VÖEN-i var, amma gəliri yoxdur. Belələrinə iş yerindən əməkhaqqı verilməlidir. Müəssisənin nə qədər işçisi varsa, onlara minimum əməkhaqqı verilməlidir. Dövlət bu məqsədlə müvəqqəti olaraq büdcədən vəsait ayırmalıdır. Nəzərə almaq lazımdır ki, sahibkarlara bu məqsədlə dövlət tərəfindən yardım edilir. Bu ona görə edilir ki, sahibkarlar işçilərə əməkhaqqı versinlər. Hesab edirəm ki, buna nəzarət artırılmalıdır. Ancaq elələri də var ki, hardasa işləmir, amma adına VÖEN var. Belə şəxslər isə adlarına olan VÖEN-i ləğv etdirməlidirlər. Sonra lazım gəlsə, yenə VÖEN aça bilərlər. Bütün hallarda, hökumətin bu sosial xarakterli addımını müsbət dəyərləndirirəm”.
Vidadi ORDAHALLI
