Ümumdünya Səhiyyə Təşkilatı (ÜST) COVID-19-un qəpik və kağız pullar vasitəsilə ötürülə bilməsinin mümkünlüyünü açıqlayıb. Bununla bağlı ÜST-in Azərbaycandakı nümayəndəliyi bildirib ki, hazırda COVID-19 virusunun qəpik və ya kağız pullar vasitəsilə ötürülə biləcəyini təsdiq və ya təkzib edən fakt yoxdur.
Buna baxmayaraq, infeksiyaya yoluxmuş insandan xaric olunan tənəffüs damcıları səthlərin üzərinə düşə və orada qala bilər. ÜST bunları nəzərə alaraq, insanlara tövsiyə edir ki, əllərinizi qəpik və ya kağız pullar kimi tez-tez toxunulan istənilən səthə və əşyaya vurduqdan sonra düzgün şəkildə, müntəzəm olaraq yuyun. Əlləriniz təmiz deyilsə, gözlərinizə, ağzınıza və burnunuza toxunmayın.
O da məlumdur ki, kağız pullar müxtəlif bakteriyaların daşıyıcısı olmaq üçün əlverişlidir. Baxmayaraq ki, insanlarımız müxtəlif qoruyucu əlcəklərdən istifadə edirlər, ancaq yenə də kartla ödəniş etməyə üstünlük verilsə yaxşı olar. Aparılan müşahidələr göstərir ki, əhalinin əlindəki vəsaitlərin kartlara yerləşdirilməsi çox zəruridir. Bu baxımdan nağdsız ödənişlərə üstünlük verilməsi daha məqsədəuyğundur. Bütün bunlara baxmayaraq, nəzərə alsaq ki, Azərbaycanda nağd hesablaşmaların çəkisi çox böyükdür, xüsusən də fiziki şəxslər əsasən nağd hesablaşmalara üstünlük verirlər, o zaman bu, hansı risqlər yarada bilər?
“...nağd hesablaşmalar müəyyən risqlər yarada bilər”
Məsələyə münasibət bildirən tibb elmləri doktoru, professor Adil Qeybullanın sözlərinə görə, əhali bu məsələyə son dərəcə diqqətlə yanaşmalıdır: “Mümkün olduğu qədər nağdsız hesablaşmalara üstünlük verməlidir. Çünki həqiqətən də nağd hesablaşmalar müəyyən risqlər yarada bilər. Bu gün Azərbaycanda nağdsız hesablaşmalarda müəyyən problemlər var. Çünki bizdə bu sistem hələ tam oturuşmayıb. Üstəlik, əhali əsasən nağd hesablaşmalara üstünlük verir. Düzdür, banklarda kart sistemi geniş yayılıb, amma əhalinin buna marağı elə də böyük deyil. Hesab edirəm ki, bütün bunlarla bağlı bir sıra kompleks işlər görülməlidir. O cümlədən, maarifləndirmə işi gücləndirilməlidir. Düzdür, hazırda COVID-19 virusunun kağız pullar vasitəsilə ötürüldüyü barədə əsaslı faktlar, sübutlar yoxdur. Ancaq bu o demək deyil ki, bununla bağlı risq yoxdur. ÜST bununla bağlı xəbərdarlıq edirsə, deməli, diqqətli olmaq lazımdır”.
Vidadi ORDAHALLI
