Məlum olduğu kimi, ölkəmizdə son iki həftədə koronavirus infeksiyasından müalicə olunaraq sağalanların sayı bu infeksiyaya yoluxanların sayını üstələməkdə davam edir. Son günlər sağalanların sayının yoluxanların sayını 2-5 dəfə üstələdiyinin şahidi olmuşuq.
Nazirlər Kabineti yanında Operativ Qərargahdan baki-xeber.com-a bildirilib ki, Azərbaycan Respublikasında 44 yeni koronavirus infeksiyasına yoluxma faktı qeydə alınıb, 74 nəfər müalicə olunaraq sağalıb və evə buraxılıb.
Operativ Qərargahdan bildirilənə görə, hazırkı dövrədək ölkəmizdə 1480 nəfərin koronavirus infeksiyasına yoluxması faktı müəyyən edilib, onlardan 865 nəfər müalicə olunaraq sağalıb, 20 nəfər vəfat edib, 595 nəfərin xüsusi rejimli xəstəxanalarda müalicəsi davam etdirilir. Həmin şəxslərdən 14 nəfərin vəziyyəti ağır, 20 nəfərin vəziyyəti orta ağır qiymətləndirilir, digərlərinin səhhəti stabildir. Ötən müddət ərzində yeni yoluxma hallarının müəyyənləşdirilməsi ilə əlaqədar 102.764 test aparılıb.
Gördüyünüz kimi, hər gün koronavirus infeksiyasına yoluxanlar arasında müalicə olunaraq sağlamlığına qovuşanların sayında müsbət dinamika mövcuddur. Sağalanların statistikası gündən-günə müsbətə doğru dəyişməkdə davam edir.
Azərbaycanda virusdan sağalanların günbəgün say artımı dönüşü olmayan prosesə çevrilə biləcəkmi?
Paşa Qəlbinur: “Bundan sonra proses ancaq müsbətə doğru gedir”
Tibb elmləri doktoru, professor Paşa Qəlbinurun qənaətinə görə, proses sağalmaların daha yüksək dinamika ilə artması, yoluxmaların isə sürətlə azalması ilə müşayiət olunacaq. “Dövlət səviyyəsində həyata keçirilən məqsədyönlü tədbirlər artıq özünün müsbət bəhrəsini verir. Son günlər virusa yoluxanların sayının kəskin surətdə azalması, müalicə olunaraq sağalanların sayının isə yüksək dinamika ilə artması deməyə əsas verir ki, bundan sonra proses ancaq müsbətə doğru gedir. Hesab edirəm ki, pandemiyanın acı təsiri yavaş-yavaş ölkəmizi tərk edir. Biz bunu sağalanların timsalında görə bilərik”.
P.Qəlbinur son günlər sağalma prosesinin sürətlə getdiyini vurğulamaqla yanaşı, onu da qeyd etdi ki, vətəndaşlar yenə də karantin rejiminə ciddi əməl etməli və sosial təcrid məsələsinə xüsusi önəm verməlidirlər.
Nəsib Quliyev: “Sağalanların sayında bu dərəcədə artımın olması dönüşü olmayan prosesə çevrilə bilər, amma...”
K.Fərəcova adına Elmi-Tədqiqat Pediatriya İnstitutunun direktoru, tibb elmləri doktoru, professor Nəsib Quliyev hesab edir ki, insanlar təhlükəsizlik tədbirlərinə əməl etsələr, biz daha çox müsbət irəliləyişə nail ola biləcəyik: “Hesab edirəm ki, proseslərin müsbət istiqamətdə getməsi, sağalanların sayında bu dərəcədə artımın olması dönüşü olmayan prosesə çevrilə bilər. Amma hər kəs bilməlidir ki, biz bu nəzarəti, təhlükəsizlik, karantin tədbirlərini birdən-birə ölkəmizdə dayandırsaq, ikinci dalğası baş verə bilər. Yəni bu virusla mübarizə ilə bağlı mövcud qaydalara əməl edilməsə, Allah eləməsin, ikinci dalğa, növbəti yoluxma halları baş verə bilər. Ona görə də, normal halda, dünyanın mövqeyi belə olmalıdır ki, bu xəstəlikdən qorunmaqla vaxt əldə etmək və bu virusa qarşı vaksin əldə edilənə qədər vaxtı udmaq lazımdır. Vaksin əldə ediləndən sonra iş asanlaşır və vaksinasiya yolu ilə bu virusa yüz faiz qalib gəlmək olar”.
N.Quliyev hesab edir ki, istədiyimiz nəticəni tam əldə etməyimiz üçün bu və ya digər formada qoruyucu, mühafizə tədbirləri davam etdirilməlidir.
İradə SARIYEVA
