Məlum olduğu kimi, Azərbaycan Respublikası Nazirlər Kabineti yanında Operativ Qərargahın qərarı ilə 14 mart 2020-ci il saat 00:00-dan etibarən ölkə ərazisində toy məclislərinin keçirilməsi qadağan edilib.
Kütləvi məclislərin dayandırılmasına səbəb isə bütün dünyanı ağuşuna alan koronavirusdur. Artıq iki aya yaxındır ölkədə karantin rejimi tətbiq olunub. Karantin rejiminin tətbiqi sayəsində son günlər koronavirusa yoluxanların sayı ötən həftələrlə müqayisədə azalıb. Açıqlanan son statistik rəqəmlərə əsasən, 44 yeni koronavirus infeksiyasına yoluxma faktı qeydə alınıb, 74 nəfər müalicə olunaraq evə buraxılıb.
Statistik rəqəmlərdən aydın olur ki, son zamanlar adıçəkilən virusa yoluxanların sayı azalmağa doğru gedir. Bəzi şəxslər də hesab edirlər ki, koronavirusa yoluxanların sayının azalması ilə sərt karantin rejiminə son qoyulacaq və onlar əvvəlki fəaliyyətlərinə davam edəcəklər.
Ölkədə fəaliyyət göstərən şadlıq evlərinin əksəriyyəti mart-aprel aylarında toylarını təxirə salmış şəxslərlə əlaqə saxlayaraq qarşıdakı aylar üçün müraciət etmələrini bildiriblər.
Restoran sahiblərinin sözlərinə görə, əvvəlki aylara təyin olunan toyların tarixi iyun, iyul, avqusta çəkilib. Bundan başqa, tarixən Azərbaycanda may ayında toy etməmək adəti var. Bu dəfə isə may ayının böyük hissəsi Ramazan ayına təsadüf edir. Bu səbəbdən də şadlıq saraylarının rəhbərləri bu ayda ciddi aktivlik gözləmirlər. Amma yenə də karantin rejimi başa çatdığı təqdirdə xüsusilə tələsən cütlüklərin müraciət edə biləcəyini bildirirlər: “Kim istəsə, gəlib mayın 4-dən sonraya toy təyin edə bilər. Amma karantin davam edərsə, bu zaman vaxt dəyişəcək. Ola bilər ki, karantin daha 2 həftə də uzadılsın. Yəni bu ehtimal da var. Mayın 4-nə kimi biz də qadağanın davam edib-etməyəcəyini biləcəyik. Necə ki, bir neçə gün öncə karantin müddətinin yenidən artırılacağı açıqlandı, bu dəfə də öncədən bir məlumat veriləcək. Artırılmasa, elə orucluqda da toy edə bilərsiniz".
Restoran sahibləri ümid edirlər ki, mayın 4-ü karantin bitəcək və onlar əvvəlki həyatlarına geri dönəcəklər. Ancaq şadlıq saraylarının rəhbərləri unudurlar ki, karantinin uzadılıb-uzadılmayacağı hələ məlum deyil. Maraqlıdır, bəzi restoran sahiblərinin bu çağırışları nəyə əsaslanır, onlar nədən əmindirlər ki, karantin uzadılmayacaq?
Onu da qeyd edək ki, karantinin müddəti uzadılmasa belə, əksər ekpertlər toyların kütləvi şəkildə keçirilməsinin tərəfdarı deyil. Bildirilir ki, restoran toyları yoluxma mənbəyi kimi təhlükəli məkan sayılır. Bu səbəbdən də ekspertlər hesab edirlər ki, koronavirus təhlükəsi ta sovuşmayana qədər ölkədə toy məclislərinin keçirilməsi düzgün deyil.
“Gələcəkdə şadlıq saraylarında, eləcə də rayonlarda təşkil olunan “palatka” toylarında...”
Sosial sahə üzrə ekspert İlqar Hüseynli bildirdi ki, karantin bitəndən sonra belə bir müddət şadlıq saraylarında toy məclislərinin keçirilməsi dayandırılmalıdır: “Yaxşı olar ki, gələcəkdə şadlıq saraylarında, eləcə də rayonlarda təşkil olunan “palatka” toylarında dezinfeksiya tədbirləri gücləndirilsin. Toylar keçirilərkən müəyyən məhdudiyyətlər tətbiq etmək olar. Məsləhətdir ki, qonaq sayı azaldılsın. Bununla yanaşı, insanların özündə də daxili mədəniyyət olmalıdır. Qızdırması, soyuqdəyməsi olan, hətta adi qripə yoluxmuş xəstə insanlar məclislərə qatılmamalıdırlar”.
Günel CƏLİLOVA
