“Aprelin 5-dən etibarən əmək müqaviləsi olmadan şirkətlər, təşkilatlar işçilərinə icazə ala bilmirlər. Bunun nəticəsidir ki, həmin tarixdən bu günə qədər 80 mindən artıq yeni müqavilə rəsmiləşdirilib”. Bunu “Elektron Hökumətin İnkişafı Mərkəzi” publik hüquqi şəxsin direktoru Fariz Cəfərov “Real TV”-nin efirində deyib.
O qeyd edib ki, bəzi təşkilatlar əmək müqaviləsi ilə yox, xidməti müqavilə ilə əməkdaşı çalışdırırlar: “Bu zaman işçinin vergi ödəyicisinin elektron nömrəsi (VÖEN) daxil edilməklə icazə alına bilər. Bununla yanaşı, könüllü təşkilatlarına da imkan yaradılıb ki, öz könüllü nümayəndələrinə icazə ala bilsinlər”.
Qısa müddət ərzində 80 min əmək müqaviləsinin rəsmiləşdirilməsi kölgə iqtisadiyyatının aradan qaldırılmasına səbəb olacaq.
“...dövlət və qeyri-dövlət sektoru üzrə iş yerlərinin və işçilərin əməkhaqqı gəlirlərinin qorunması...”
Əmək müqavilələrinin sayının artması barədə fikir bildirən iqtisadçı-ekspert Ruslan Atakişiyev dedi ki, qlobal xarici şoklar, bütün ölkələr kimi, Azərbaycan iqtisadiyyatına da öz neqativ təsirlərini göstərməkdədir. Pandemiyanın yayıldığı ilk gündən başlayaraq, Azərbaycan dövləti bu faciə ilə mübarizədə qabaqlayıcı kompeks tədbirlər görməyə başladı. Pandemiyadan zərər çəkmiş sahələr müəyyənləşdirilib və dövlət dəstəyinin göstərilməsi ilə bağlı proqramlar hazırlanıb: “Dövlət, ilk növbədə, insanların sosial rifahını prioritet hesab edərək onlara sosial dəstək göstərdi. Belə ki, sosial rifah paketinin icrası çərçivəsində dövlət və qeyri-dövlət sektoru üzrə iş yerlərinin və işçilərin əməkhaqqı gəlirlərinin qorunması üçün işlər aparılıb. Elektron sistem üzərindən gündəlik nəzarət həyata keçirilib. Bu paketin əhatə dairəsi 1 milyon 629 min işçi, o cümlədən, dövlət sektoru üzrə 910 min, özəl sektor üzrə 719 min olub. Əmək müqaviləsi sayında azalma deyil, əksinə, artım baş verib. 1 aprel - 17 aprel zaman aralığında 55 min artım olub. 2020-ci il yanvarın 1-dən bu yana isə bu rəqəm, ümumilikdə, 77 min artıb. Beləliklə, son 17 gündə əmək müqavilələrində 22 min nəfər artım olub. Statistika göstərir ki, 300 min muzdlu işçinin əməkhaqlarının bir hissəsi maliyyələşdirilir və təqribən 300 min fərdi sahibkara dəstək verilir. Vurğulayım ki, 300 min muzdlu işçinin əməkhaqlarının bir hissəsinin dövlət tərəfindən ödənilməsi ilə bağlı qərarın verilməsi koronavirusla bağlı xüsusi karantin rejimi nəticəsində ehtimal olunan işsizliyin qarşısını alıb. Və dəstək paketi nəticəsində əmək müqavilələrinin sayı artıb”.
Günel CƏLİLOVA
