“Biz bütün enerji təsərrüfatımızı dövlət mülkiyyətinə qaytardıq. Əgər bunu etməsəydik, bu gün biz qaranlıq içində yaşayacaqdıq”. Bu sözləri Prezident İlham Əliyev "Azərenerji" ASC-nin baş idarəetmə kompleksinin açılışında çıxış edərkən deyib.
Dövlət başçısı 2002-2006-ci illərdə Azərbaycanda fəaliyyət göstərmiş “Barmek” şirkətinin fəaliyyətinə də toxunub. Prezidentin sözlərinə görə, adıçəkilən şirkət pul qoymaq əvəzinə, bu sistemi bərbad vəziyyətə salıb: “Bizim müstəqilliyimizin hələ 30 yaşı tamam olmayıb. Biz müstəqil ölkə olanda enerji təsərrüfatımız bərbad vəziyyətdə idi. Ondan sonra daha da bərbad vəziyyətə düşdü. Biz o illəri xatırlayırıq. Burada bir “Barmek” şirkəti peyda olmuşdu, özü də qeyri-təmiz sxemlər əsasında, keçmiş məmurlarla sövdələşmə əsasında gəlib bizim Bakı şəhərinin bütün enerji təsərrüfatına sahib olub və pul qoymaq əvəzinə, bu sistemi bərbad vəziyyətə salıb, Azərbaycandan milyonlarla pul aparıb. Sonra da bu, azmış kimi, bizi hələ məhkəməyə vermək istəyirdi. Mənim göstərişimlə bu çirkin sövdələşməyə son qoyuldu, bu dələduz şirkət Azərbaycandan qovuldu və mənim sərəncamımla o vaxt “Azərişıq” Səhmdar Cəmiyyəti yaradıldı. Adını da mən qoymuşam, “Azərişıq”. Biz bütün enerji təsərrüfatımızı dövlət mülkiyyətinə qaytardıq. Əgər bunu etməsəydik, bu gün biz qaranlıq içində yaşayacaqdıq və “Azərenerji”nin bütün əmlakı dağıdılacaqdı, necə ki, bu bina”.
Görünən odur ki, ölkə başçısı məlum qərarları verməklə Azərbaycanın enerji sistemini xilas edib. Bütün bu deyilənlərin fonunda, Azərbaycanın o zaman enerji sektorunu dövlətləşdirməsi nə qədər doğru siyasət idi və bu olmasaydı, nə baş verərdi?
“Bu baxımdan, ölkə başçısı sözügedən addımı atmaqla enerji sektorunu xilas etdi”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, o vaxt ölkənin enerji sektorunun dövlətləşdirilməsi doğru qərar idi: “O zaman belə bir qərar verilməsəydi, enerji sistemi çox pis vəziyyət düşərdi. Bu baxımdan, ölkə başçısı sözügedən addımı atmaqla enerji sektorunu xilas etdi. Həmin dövrdə belə bir addımın atılmasını mövcud vəziyyət tələb edirdi. Enerji sektorunda yaşanan pozuntulara son qoymaq üçün belə bir qərar verildi. Bunun sayəsində dövlət vəsaiti hesabına enerji infrastrukturu əsaslı şəkildə yeniləndi. Sözügedən sahəyə böyük həcmdə sərmayələr qoyuldu. Bu gün Azərbaycan nəinki özünü elektrik enerjisi ilə təmin edir, eyni zamanda, elektrik enerjisini digər ölkələrə ixrac edir. Dövlətin bu sahəyə diqqəti sayəsində ötən illər ərzində böyük işlər görülüb. Hesab edirəm ki, gələcəkdə enerjinin satışını özəl sektora vermək lazımdır. Beynəlxalq praktikada əsasən bu üsuldan istifadə edilir. Məsələn, Almaniyada bu işləri bələdiyyələrin nəzdində olan müəssisələr həyata keçirirlər. Hesab edirəm ki, gələcəkdə bizdə də buna bənzər sistemlər tətbiq oluna bilər”.
Vidadi ORDAHALLI
