Dünya hələ də koronavirus pandemiyası ilə mübarizə aparmaqdadır. Azərbaycanda da virusa qarşı mübarizə tədbirləri davam etdirilməklə yanaşı, cəmiyyətdə sosial dayanıqlığın artırılması üçün sosial layihələr həyata keçirilir, məşğulluğun təmin edilməsi üçün konkret işlər görülür. Məlumdur ki, Azərbaycan dövləti koronavirusla mübarizə dövründə də vətəndaşların məşğulluğunu unutmur və onların müxtəlif iş yerləri ilə təmin olunması üçün xüsusi tədbirlər həyata keçirilir.
Bildiyimiz kimi, son illər Prezident İlham Əliyevin tapşırığına əsasən, ölkəmizdə vətəndaşların ödənişli ictimai işlərə cəlb olunması prosesi həyata keçirilir və indiyə qədər xeyli sayda insan ictimai işlərdə çalışıb.
Bildiyimiz kimi, Prezident İlham Əliyev daha çox sayda vətəndaşın ödənişli ictimai işlərə cəlb edilməsi üçün müvafiq qurumlara tapşırıqlar verib.
Qeyd edək ki, son günlər daha 2 min nəfər ödənişli ictimai işlərə cəlb olunub.
Bildirək ki, Prezident İlham Əliyevin tapşırığına əsasən, ödənişli ictimai iş yerlərinin 37 mindən 90 minə çatdırılması istiqamətində addımlar davam etdirilir.
Əmək və Əhalinin Sosial Müdafiəsi Nazirliyindən mətbuata verilən məlumata görə, bu işlər çərçivəsində daha 2 min nəfər DOST İş Mərkəzi vasitəsilə ödənişli ictimai işlərə cəlb olunub.
Beləliklə, 37 min ödənişli ictimai işçidən əlavə, son günlər 12 min nəfər də haqqı ödənilən ictimai işlər proqramına cəlb edilib. Həmin işlərdə çalışanların sayı artıq 49 mindir və bu say 90 minə çatdırılacaq.
Yeni yaradılan ictimai iş yerləri əsasən dezinfeksiya işlərinin aparılması, tənha yaşlılara və əlilliyi olan şəxslərə sosial xidmətlərin göstərilməsi və s. kimi sahələri əhatə edir.
DOST İş Mərkəzi ilə ödənişli ictimai işlərə cəlb olunan şəxslər arasında əmək müqaviləsi bağlanaraq, elektron sistemdə qeydiyyatdan keçirilərək rəsmiləşdirilir.
“Vətəndaşların haqqı ödənilən ictimai iş yerlərinə cəlb edilməsinin rəsmiləşdirilməsi, onlarla əmək müqavilələrinin bağlanması çox mühüm məsələdir”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abbasbəylinin fikrincə, Azərbaycanda haqqı ödənilən ictimai işlərə cəlb edilən vətəndaşların sayının 2 min nəfər də artması müsbət haldır. Bu prosesin məşğulluğun təmin edilməsində mühüm rol oynadığını deyən sosioloq hesab edir ki, pandemiya dövründə dövlətin vətəndaşların məşğulluğunu təmin etməsi onların sosial rifah halının yaxşılaşdırılmasına hesablanıb. Müsahibimiz vurğuladı ki, hazırda dünyada tamam başqa proseslər gedir və ölkələrin başı daha çox onları qəfil yaxalayan koronavirusa qarışıb, bu səbəbdən də onlar məşğulluq haqqında düşünmürlər. Azərbaycanda isə zamanında görülən qabaqlayıcı tədbirlər nəticəsində koronavirusun lokallaşdırılması prosesi artıq nəticə verir. Sutka ərzində sağalmaların yoluxmaları üstələdiyini qeyd edən ekspert hesab edir ki, bütün bunlar dövlət tərəfindən görülən tədbirlərin nəticəsi sayılmaldır.
“Bildiyimiz kimi, Azərbaycan dövləti koronavirusla mübarizə apardığımız dövrdə belə, vətəndaşlarımızın sosial rifah halının yüksəldilməsinə, məşğulluqlarının təmin edilməsinə yönəlik layihələr həyata keçirir. Haqqı ödənilən ictimai iş yerlərinin yaradılması və ora cəlb edilən insanların sayının artırılması çox müsbət bir haldır. Dünyada məşğulluqla bağlı ciddi problemlərin mövcud olduğu bir vaxtda Azərbaycanda məşğulluğun artırılmasına xüsusi önəm verilməsi diqqəti çəkir. Mən ötən dəfə qeyd etmişdim ki, haqqı ödənilən ictimai iş yerlərinin sayı daha da artacaq. Bildiyimiz kimi, cənab Prezident bir neçə gün əvvəl nazirlərlə keçirdiyi videoiclasda bu il ictimai işlə təmin olunan vətəndaşların sayının 90 min nəfərə çatdırılması barədə göstəriş verdi”.
Ə.Abbasbəyli onu da qeyd etdi ki, bir neçə gün əvvəl 10 min şəxs haqqı ödənilən ictimai işlərə cəlb olunub. Bu insanların pandemiya dövründə əsas sayılan dezinfeksiya və həssas qruplara sosial xidmətlərə cəlb edilməsinin müsbət olduğunu deyən ekspert hesab edir ki, ödənişli ictimai iş yerlərinin yaradılması pandemiya ilə əlaqədar ölkədə əhalinin məşğulluq imkanlarının daha da artırılmasına səbəb olur: “Vətəndaşların haqqı ödənilən ictimai iş yerlərinə cəlb edilməsinin rəsmiləşdirilməsi, onlarla əmək müqavilələrinin bağlanması çox mühüm məsələdir. Bu insanlar işə rəsmən qəbul edilir və onlarla əmək müqavilələri bağlanır. Bu da onların məşğulluğunun rəsmiləşdirilməsinə xidmət edir. Ödənişli ictimai işlərə cəlb edilən vətəndaşların sayının son üç-dörd gün ərzində 12 minə çatdırılması ilin sonuna qədər bu istiqamətdə qarşıya qoyulan hədəflərə çatmağın mümkün olduğunu deməyə əsas verir” - deyə ekspert bildirdi.
İradə SARIYEVA
