Ölkəmizdə koronavirusa yoluxanların sayının bu virusdan sağalanların sayından bir neçə dəfə az olması son günlər daha intensiv şəkildə müşahidə edilir. Məlum olduğu kimi, Azərbaycanda koronavirusdan müalicə olunaraq sağalanların sayı artmaqda davam edir. Biz hər gün koronavirusdan sağalanların statistikasının yüksələn xətt üzrə dəyişdiyinin şahidi oluruq.
Nazirlər Kabineti yanında Operativ Qərargah tərəfindən aprelin 19-da yayılan məlumata görə, Azərbaycan Respublikasında 25 yeni koronavirus infeksiyasına yoluxma faktı qeydə alınıb, 122 nəfər müalicə olunaraq sağalıb və evə buraxılıb.
Qeyd edək ki, bundan əvvəlki günlərdə sağalanların sayının yoluxanların sayını iki dəfə üstələdiyi müşahidə edilirdisə, indi 5 dəfə üstələyir.
Bir gündə 122 nəfərin sağalaraq xəstəxanadan evə buraxılması cəmiyyətdə bu xəstəliyin kökünün tezliklə kəsiləcəyinə böyük inam yaradıb.
“...COVID-19-dan sağalan xəstələrin sayı 712 nəfərə çatıb”
Həkim-terapevt Leyla Bayramlı “Bakı-Xəbər”ə bildirdi ki, son həftələr bu virusdan müalicə olunaraq sağalanların sayının tədricən artdığını, virusa yoluxanların isə sayının azaldığını müşahidə edirik. L.Bayramlının sözlərinə görə, bir sutka ərzində 122 nəfərin həkimlərimizin səyi nəticəsində öz sağlamlığına qovuşaraq evə buraxılması müsbət haldır. Günü-gündən sağalanların sayının yoluxanların sayını 6, 7, 8, 10 və artıq dəfələrlə üstələməyə doğru getdiyini qeyd edən mütəxəssisin sözlərinə görə, bunun birinci səbəbi pandemiyanın yayılmasının qarşısının alınması üçün tətbiq edilən karantin tədbirləridir. Digər tərəfdən də koronavirusa yoluxan xəstələrin olduqca yüksək şəraitdə, hər cür vasitələrlə təmin edilmiş şəkildə müalicəsinin həyata keçirilməsi də sağalmanın yoluxmanı bir neçə qat üstələməsi ilə nəticələnib. “Ölkəmizdə pandemiyanın geniş yayılmasının qarşısının alınması üçün həyata keçirilən tədbirlər həqiqətən də böyük effekt verir. Koronavirusdan müalicə olunaraq sağalanların sayının qısa zaman ərzində bu qədər artması dövlət tərəfindən həyata keçirilən tədbirlərin və həkimlərimizin səylərinin nəticəsidir. Karantin rejiminin tətbiqi, onun içində müxtəlif qadağa tədbirlərinin görülməsi daha çox insanın virusa tutulmasının qarşısını aldı. Günü-gündən virusa yoluxanların sayı azalır. Məsələn, aprelin 18-də Operativ Qərargahın yaydığı məlumata görə, Azərbaycanda koronavirusa 33 yeni yoluxma qeydə alınmışdı, sağalanların sayı isə 62 nəfər idi. Bundan cəmi bir gün sonra isə sağalanların sayının 122 nəfər olduğunu gördük. Məlumatıma görə, Azərbaycanda koronavirusdan müalicə olunaraq sağalanların sayı 700-ü ötüb və bununla da COVID-19-dan sağalan xəstələrin sayı 712 nəfərə çatıb. Üzümüzə gələn həftələrdə daha çox xəstənin sağaldığının şahidi olacağıq”.
L.Bayramlı, həmçinin, qeyd etdi ki, başqa ölkələrdən fərqli olaraq, Azərbaycanda xəstələrin müalicəsi üçün yüksək şərait mövcuddur və onların sağlamlığı ilə peşəkar həkimlər məşğul olurlar. Koronavirusla mübarizədə Azərbaycan həkimlərinin böyük səy göstərdiyini deyən L.Bayramlı hesab edir ki, həkimlərimizin əməyinin Prezident tərəfindən xüsusi qiymətləndirilməsi ölkənin tibb personalına ruh yüksəkliyi, mənəvi güc verir.
İradə SARIYEVA
