“200 min əvəzinə, 600 min insana dövlət iki ay ərzində hər ay 190 manat vəsait verməlidir”. Bunu Prezident İlham Əliyev Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda deyib.
Ölkə başçısının fikrincə, aztəminatlı ailələrin problemləri daha geniş şəkildə həll edilməlidir. Prezident bildirib ki, yardım üçün müraciət edənlərin sayı kifayət qədər artıb: “İndi bu təkliflər, bu sifarişlər geniş təhlil olunur və maksimum şəffaflıq təmin edilməlidir. İlkin mərhələdə nəzərdə tutulurdu ki, 200 min insan dövlətdən 190 manat yardım alacaqdır. Mən hesab edirəm ki, ümumi vəziyyəti nəzərə alaraq və insanların sosial müdafiəsini gücləndirmək üçün bu kateqoriyaya aid olan insanların sayını biz 600 minə çatdırmalıyıq. Yəni 200 min əvəzinə, 600 min insana dövlət iki ay ərzində hər ay 190 manat vəsait verməlidir. Bu kateqoriyaya aid olan insanlar aztəminatlı təbəqənin nümayəndələridir, eyni zamanda, koronavirusla bağlı işini itirən və qeyri-formal məşğulluqla məşğul olan insanlardır. Onların da problemlərini dövlət öz üzərinə götürür. Ona görə tapşırıq verirəm ki, aprel-may aylarında – iki ay ərzində 600 min insan dövlətdən ayda 190 manat alsın”.
Prezident onu da qeyd edib ki, vətəndaşlar ikinci ödənişi almaq üçün bank hesabları açsınlar: “Birinci ödəniş bu ay veriləcək, ona görə yəqin bəzi insanların imkanı olmayacaq ki, bank hesabları açsınlar. Ancaq ikinci ödəniş may ayında veriləcək. O vaxta qədər bu 600 min insanın hər biri bank hesabı açsın və ikinci ödənişi bank köçürmə yolu ilə alsın”.
Göründüyü kimi, Prezidentin məlum qəraı ilə 190 manat alanların sayı 3 dəfə artacaq. Bu da kifayət qədər böyük rəqəmdir və ciddi sosial əhəmiyyətə malik olacaq. Bütün bunlarla yanaşı, 190 manat alanların sayının 200 mindən 600 minə çatdırılması nə dərəcədə mümkün olacaq?
“Ancaq ikinci ödənişi may ayında almaq üçün vətəndaşlar bank hesabı açmalıdırlar”
Məsələyə münasibət bildirən ekspert Rəsul Cahangirli buna bir neçə aspektdən yanaşdı: “Əvvəla sözügedən sosial xarakterli tədbirlər aztəminatlı vətəndaşların sosial müdafiəsinin gücləndirilməsinə xidmət edir. Hansı ki, dövlət səviyyəsində bu istiqamətdə sistemli olaraq tədbirlər görülür. Bəzi proqramların icrası və genişləndirilməsi işləri həyata keçirilir. Koronavirus karantini dövründə ölkə başçısının rəhbərliyi ilə həyata keçirilən sosial siyasət aztəminatlı ailələrin vəziyyətinə müsbət təsir göstərəcək. Ayın sonuna qədər birdəfəlik ödəmə veriləcək şəxslərin gündəlik rəqəminin 25-30 minə çatdırılması nəzərdə tutulur. İşlərin sürətli gedişi onu deməyə əsas verir ki, ayın sonuna qədər 600 min vətəndaş 190 manat ala biləcək. Bir məqamı qeyd edim ki, dövlət səviyyəsində bununla bağlı heç bir problem yoxdur. Çünki dövlətin kifayət qədər maliyyə resursu var. Azərbaycan öz maliyyə eytiyatlarına söykənərək bu addımları atır. Ancaq ikinci ödənişi may ayında almaq üçün vətəndaşlar bank hesabı açmalıdırlar. O üzdən, yardım alacaq vətəndaşların hamısı bank hesabı açsa, o zaman bunda heç bir problem olmayacaq. Hesab edirəm ki, bank hesablarının açılması ilə bağlı cəmiyyətdə maarifləndirmə işi gücləndirilməlidir”.
Vidadi ORDAHALLI
