“Ödənişli ictimai iş yerlərinin açılması ilə bağlı əvvəlki illərin təcrübəsinə əsaslanaraq, biz ilin əvvəlində 37 min iş yerinin açılmasını nəzərdə tuturduq. Onu da bildirməliyəm ki, artıq bu proqram 3-4 ildir həyata keçirilir. Artıq bəzi insanlar, hansılar ki, ilkin mərhələdə bu işlərə cəlb edilmişdilər, sonra daha da yüksək maaş imkanına malik başqa iş yerlərinə keçdilər. Ona görə biz bu proqramı təqribən 30-40 min ətrafında nəzərdə tuturduq”.
Bunu Azərbaycan Respublikasının Prezidenti İlham Əliyev aprelin 17-də Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda deyib.
Dövlət başçısı qeyd edib ki, pandemiyaya görə və işsizliyin qaçılmaz artımını nəzərə alaraq, ilkin mərhələdə bu rəqəmin 50 minə çatdırılması barədə göstəriş verib: “Amma indi hesab edirəm ki, biz daha böyük rəqəmə çatmalıyıq və bu il 90 min ödənişli ictimai iş yeri yaradılmalıdır”.
“Vətəndaşların ictimai işlə təmin edilməsi ilə bağlı fəaliyyətlərin genişləndirilməsi məqsədəuyğundur”
90 min iş yerinin açılmasının əhəmiyyətinin nə olacağı barəsində danışan millət vəkili Vüqar Bayramov bildirdi ki, ictimai iş daha çox regionlarda yerli icra hakimiyyəti orqanları tərəfindən həyata keçirilən layihələr və vətəndaşların buna cəlbi deməkdir: “Son illər ödənişli ictimai işlərə cəlb olunan vətəndaşların sayında artımlar var. Bu da, nəticə etibarilə, onlar üçün müvəqqəti də olsa iş yeri və əməkhaqqı deməkdir. Xüsusən də minimum əməkhaqqı 130 manatdan 180 manata qaldırılandan sonra bu tip ictimai işlərə marağın artması müşahidə olunur. Çünki əməkhaqlarının artırılması, birmənalı şəkildə, vətəndaşların işlə təmin olunmasına müsbət təsir edir. O baxımdan düşünürəm ki, vətəndaşların ictimai işlə təmin edilməsi ilə bağlı fəaliyyətlərin genişləndirilməsi məqsədəuyğundur. Növbəti illərdə yerli icra qurumlarının timsalında vətəndaşların ictimai işlərə daha çox cəlbi gözlənir. Bu onların əməkhaqqı ilə təmin olunmasına kömək edəcək. Bu baxımdan, yeni ictimai işlərin yaradılması təqdirəlayiqdir”.
Günel CƏLİLOVA
