“Qeyri-formal məşğulluğa son qoyun. İşçilərə müraciət edirəm bir daha, əmək müqaviləsi olmadan işləməyin, tələb edin. Əgər hansısa sahibkar sizinlə əmək müqaviləsi bağlamaq istəmirsə, Əmək və Əhalinin Sosial Müdafiəsi Nazirliyinə, İqtisadiyyat Nazirliyinə, Prezident Administrasiyasına dərhal məlumat verin. Biz o sahibkarların dərsini verəcəyik. Çünki dövlətin bütün resurslarını səfərbər etdiyi indiki şəraitdə dövləti aldatmaq, vergilərdən yayınmaq və öz maddi marağını, öz tamahını təmin etmək xəyanətdir”.
Bu sözləri Prezident İlham Əliyev iki nazirlə videobağlantı formatında keçirilən iclasda deyib.
Prezident onu da qeyd edib ki, aprel-may aylarında – iki ay ərzində 600 min insan dövlətdən ayda 190 manat alsın. Bu vəsaiti alacaq vətəndaşlardan xahiş edirəm ki, onlar ikinci ödənişi almaq üçün bank hesabları açsınlar: “Birinci ödəniş bu ay veriləcək, ona görə yəqin bəzi insanların imkanı olmayacaq ki, bank hesabları açsınlar. Ancaq ikinci ödəniş may ayında veriləcək. O vaxta qədər bu 600 min insanın hər biri bank hesabı açsın və ikinci ödənişi bank köçürmə yolu ilə alsın. Bu, bizim xahişimizdir, bu, bizim tələbimizdir”.
“Yeni gəlir mənbələrinin üzə çıxarılması istiqamətində görülən işlər davam etdirilməlidir”
Qeyri-formal məşğulluğa son qoyulmasının əhəmiyyəti barəsində iqtisadçı-ekspert Pərviz Heydərov bildirdi ki, qeyri-formal əmək müqavilələrinin sayının hələ də çox olması ciddi problemdir: “Prezident keçirdiyi son müşavirədə də bu məsələ ilə bağlı hökumətə tapşırıq verdi ki, yeni gəlir mənbələrinin üzə çıxarılması istiqamətində görülən işlər davam etdirilməlidir. Nəzərə almaq lazımdır ki, ötən il bu sahədə böyük nəticələr əldə edildi. Çoxlu sayda əmək müqaviləsi bağlanıb.Analoji hal bu il də müşahidə olunur”.
Həmsöhbətimiz onu da əlavə etdi ki, karantin dönəmi ilə bağlı ölkə başçısı sahibkarlara yardım edilməsi ilə bağlı göstəriş verib. Bu istiqamətdə lazımi işlər görülür. İqtisadçı hesab edir ki, görülən işlərə rəğmən, məşğulluqla bağlı şəffaflığa ehtiyac var.
Günel CƏLİLOVA
