Azərbaycan dövlətinin həyata keçirdiyi sosial qayğı siyasətinin ardıcıllığı, davamlılığı, qayğıya ehtiyacı olan həssas qruplara xüsusi diqqəti vətəndaşların sosial rifahı, maddi durumu və güzəranının müsbət dinamikada inkişafına yönəlib.
Məlum olduğu kimi, cəmiyyətin həssas qruplarına dövlət, digər dövrlərdə olduğu kimi, pandemiya dövründə də qayğı və diqqətlə yanaşır.
Pandemiya dövründə cəmiyyətin sosial cəhətdən zəif olan təbəqəsinə maddi dəstəyin göstərilməsi nəticəsində aprel ayında dövlətdən sosial yardım alan ailələrin sayı 14 faiz artıb.
Məlumdur ki, Prezident İlham Əliyevin tapşırığına uyğun olaraq, ünvanlı sosial yardım proqramının icra mexanizminin sadələşdirilməsi və yardım təyinatı şərtlərinin yumşaldılması, aztəminatlı ailələrin bu proqramdan faydalanmaq imkanlarının artırılması təmin olunur.
Əmək və Əhalinin Sosial Müdafiəsi Nazirliyindən mətbuata verilən məlumata görə, nəticədə ünvanlı dövlət sosial yardımı alan ailələrin sayı aprel ayında 14 faiz və ya 9500 ailə artaraq 79500-ə, yardım alan ailə üzvlərinin sayı isə 40 min nəfər artaraq 333 minə çatıb. Bildirilib ki, hər ailəyə düşən yardımın orta aylıq məbləği 222 manatı ötüb.
“Sosial dəstək tədbirlərindən biri kimi, xüsusi karantin rejimi müddətində ünvanlı dövlət sosial yardımının təyin olunma müddəti bitən aztəminatlı ailələrə də bu yardımın verilməsi karantin rejimi başa çatdığı tarixdən sonrakı ayın 1-dək uzadılıb”, - deyə məlumatda qeyd olunub.
İndiki şəraitdə bu, ailələr üçün nə deməkdir?
“Dövlət tərəfindən ünvanlı sosial yardım verilməsinin əsas məqsədi cəmiyyətin sosial cəhətdən həssas qruplarının...”
Tanınmış sosioloq Əhməd Qəşəmoğlu “Bakı-Xəbər”ə bildirdi ki, bu gün sosial cəhətdən zəif olan insanların ən böyük dayağı Azərbaycan dövləti və onun ayırdığı sosial yardımlar, göstərdiyi dəstəkdir.
Ə.Qəşəmoğlunun sözlərinə görə, keçən dövrlərdə sosial yardımların ayrılması sahəsində ciddi nöqsanlar olub, bu da həqiqətən ünvanlı sosial yardıma ehtiyacı olan xeyli sayda insanın kənarda qalmasına səbəb olub. Yeni dövrdə isə ünvanlı sosial yardımların tamamilə yeni mexanizmlə verildiyini və burada şəffaflığın qorunduğuna ümid etdiyini deyən Ə.Qəşəmoğlu hesab edir ki, bu gün dövlətin ayırdığı ünvanlı sosial yardımların ünvanına çatmasında, həqiqi ehtiyacı olana verilməsində bu sahə ilə məşğul olan məmurların rolu böyükdür. Onun fikrincə, ünvanlı sosial yardımı təyin edən məmurlar işlərinə məsuliyyətlə yanaşmalı, Prezidentin tapşırıqlarını, göstərişlərini məsuliyyətlə icra etməlidirlər.
Prezidentin cəmiyyətin həssas qruplarını ciddi diqqətdə saxladığını deyən Ə.Qəşəmoğlunun sözlərinə görə, bu da həmin təbəqənin həyatına müsbət təsir edir. “Hesab edirəm ki, hər ailəyə 222 manat sosial yardım göstərilməsi o insanların maddi rifah halının yüksəlməsinə müsbət təsir edəcək. Bilirsiniz ki, pandemiya dövründə vətəndaşlarımız dövlətdən ciddi sosial dəstək alırlar. Dövlət tərəfindən ünvanlı sosial yardım verilməsinin əsas məqsədi cəmiyyətin sosial cəhətdən həssas qruplarının maddi-rifah halının gücləndirilməsi, onların sosial müdafiəsinin təmin edilməsidir.
Bizim əsas məqsədimiz o olmalıdır ki, bu sosial yardımlar həqiqətən ehtiyacı olan adamlara, ailələrə verilsin. Burada ünvanlı sosial yardım təyin edən şəxslərdən çox şey asılıdır. Amma inanıram ki, bu istiqamətdə işlər yaxı gedir, düzgün qurulub. Bilirsiniz ki, bu məsələ xüsusilə ölkə Prezidentinin nəzarəti altındadır. İndiki nazirin də çox çevik, çalışqan olduğu deyilir. Hər halda, hesab edirəm ki, ünvanlı sosial yardımların verilməsində şəffaflıq nəzərə alınıb”.
Ə.Qəşəmoğlu onu da qeyd etdi ki, əvvəlki dövrlər bu sahədə baş verən neqativ halların təkrarlanmaması üçün bir ictimai nəzarət mexanizmi də işlənib hazırlanmalıdır.
İradə SARIYEVA
