Məlum olduğu kimi, aprelin 5-dən Azərbaycanda vətəndaşların evdən çıxması icazə əsasında həyata keçirilir. Artıq insanlar yaşayış yerini tərk etmək üçün icazə almaq məqsədilə 8103 nömrəsinə SMS göndərməlidirlər. Açıqlanan son statistik rəqəmlərə əsasən, evdən çıxmaq istədiklərinə dair vətəndaşlar tərəfindən icazə əldə etmək üçün 8103 qısa nömrəsinə 11 milyon 316 min SMS göndərilib.
Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə Əlaqələr şöbəsinin müdiri Elnur Niftəliyev media nümayəndələrinə açıqlamasında qeyd edib ki, SMS-lərdən təqribən 3 milyon 668 mini, yəni 32 faizi aidiyyəti olmayan məzmunla bağlı göndərildiyindən, təsdiq cavabı almayıb.
Maraqlıdır, vətəndaşların 32 faizinin aidiyyəti olmayan məzmunla SMS göndərməsi onların bu mözvu ilə bağlı məlumatsız olması ilə bağlıdır, yoxsa o şəxslər, sadəcə, dələduzluğa meyllidirlər.
“SMS vasitəsilə evdən çıxmağa icazə almaq istəyən şəxs konkret səbəb göstərməli və mütləq iki saat ərzində evə qayıtmalıdır”
Sosioloq Aytəkin Kamranqızı bildirdi ki, hazırda vətəndaşlar SMS göndərərək evdən çıxmaq üçün icazə alırlar. “Bu xidmətin tətbiqi ümumi nəzarət baxımından vacib məqamdır. SMS vasitəsilə evdən çıxmağa icazə almaq istəyən şəxs konkret səbəb göstərməli və mütləq iki saat ərzində evə qayıtmalıdır. Təəssüf ki, bəzi şəxslər evdən çıxmaq üçün dəfn adından istifadə edirlər. Ancaq elə şəxslər var ki, onlar aidiyyəti olmayan SMS-lər göndərirlər. Təbii ki, yalan SMS göndərənlər xüsusi karantin rejimini pozduqlarına görə cərimələnirlər və bundan sonra da təkrarlama halları olarsa, həmin şəxslər barəsində qanunvericiliyə uyğun olaraq digər tədbirlər görülməkdə davam edəcək. Yalan SMS göndərənlərin əksəriyyəti dələduzluqla məşğul olan şəxslərdir. Həmin şəxslərin müəyyən olunaraq cəzalandırılması vacibdir”.
Günel CƏLİLOVA
