Ölkədə rəsmən elan edilən karantin rejiminin bitməsinə bir neçə gün qaldığı dövrdə ölkəmizdə koronavirus infeksiyasına yoluxma hallarının azalması müşahidə edilməkdədir. Azərbaycan dövlətinin virusa qarşı apardığı mütəşəkkil, davamlı, məqsədyönlü mübarizə üsulları, metodları bu virusun məhv edilməsinə yönəlib. Əldə olunan bütün nəticələr dövlətin həyata keçirdiyi çoxşaxəli tədbirlərlə bağlıdır.
Aprelin 16-da Azərbaycan Respublikası Nazirlər Kabineti yanında Operativ Qərargahdan baki-xeber.com-a verilən məlumata görə, Azərbaycan Respublikasında 30 yeni koronavirus infeksiyasına yoluxma faktı qeydə alınıb, 56 nəfər müalicə olunaraq sağalıb və evə buraxılıb.
Ümumiyyətlə, indiyə qədər 460 nəvər bu virusdan müalicə edilərək sağalıb.
Azərbaycanda ilk dəfə virusdan sağalmalar virusa yoluxmaları az qala iki dəfə üstələdi.
Bundan sonra pandemiya ilə bağlı Azərbaycanda vəziyyət necə olacaq? Mütəxəssislər faktı necə qiymətləndirir və ortada olan nəticələr hansı proqnozları söyləməyə imkan verir?
Paşa Qəlbinur: “Həm dövlətin koronavirusla mübarizə sahəsində həyata keçirdiyi genişmiqyaslı tədbirlər, həm də insanların sosial izolyasiyaya kütləvi əməl etməsi...”
Tanınmış tibb alimi, professor Paşa Qəlbinur “Bakı-Xəbər”ə bildirdi ki, ortada olan nəticələr, eləcə də günü-gündən sağalma hallarının yoluxma hallarını üstələməsi pandemiyanın tez bir zamanda mıhv ediləcəyini deməyə əsas verir. “Bu gün koronavirusdan sağalmanın bu virusa yoluxma halını iki dəfə üstələməsi təsadüfi deyil. Bu fakt elə-belə, yedən yaranmayıb, ona doğru məqsədyönlü yol gəlinib. Yəni xəstəliyin ilkin qeydə alındığı gündən indiyə kimi bu nəticənin əldə olunması üçün böyük işlər görülüb. Bilirsiniz ki, dövlət səviyyəsində pandemiyaya qarşı çox mütəşəkkil mübarizə aparılır, virusa yoluxanların müalicəsi üçün dövlət olduqca böyük işlər görür. Hesab edirəm ki, virus tamamilə üzü aşağıya, azalmağa doğru gedir. Bir mütəxəssis kimi deyə bilərəm ki, koronavirusun bizə ikinci hücumu qətiyyən gözlənilmir. Bilirsiniz, qeyd etdiyim kimi, dövlət bu sahədə çox ciddi kompleks işlər görüb. Həm dövlətin koronavirusla mübarizə sahəsində həyata keçirdiyi genişmiqyaslı tədbirlərin, həm də insanların sosial izolyasiyaya kütləvi əməl etməsinin nəticəsində sağalmaların yoluxmanı iki dəfə üstələməsinə nail ola bildik. Bundan sonra biz sağalmanın 3 qat, 5 qat və s. artdığını da görəcəyik. Düzdür, vətəndaşlar arasında məsuliyyətsizliyə yol verənlər də oldu, amma bu, epizodik xarakter daşıyır. Bütövlükdə, dövlətin və xalqın həmrəyliyi yoluxma hallarının azalmasına gətirib çıxarıb”.
P.Qəlbinur onu da qeyd etdi ki, virusun azalmasına təsir edən amillərdən biri də ölkəmizin təbii şəraiti, əlverişli iqlim qurşağında yerləşməsi və sahib olduğumuz genetik dayanıqlıqdır. Eyni zamanda, dövlət qayğısı ilə əhatə olunan Azərbaycan səhiyyəsinin gücü də virusun məhvə doğru yaxınlaşmasına təsir göstərib: “Əldə olunan nəticələr əminliklə onu deməyə əsas verir ki, Azərbaycan dünyada pandemiyadan ən az itki ilə çıxan dövlətlərin arasında birinci sırada dayanacaq. Azərbaycan pandemiyaya qalib gəlməyə doğru gedir”.
Adil Qeybulla: “Bu azalma və sağalmanın yoluxma halını üstələməsi aprelin 20-dən sonra xüsusilə çox hiss ediləcək”
Digər tanınmış tibb alimi, professor Adil Qeybulla da hesab edir ki, pandemiyanın sönməsinə az qalıb və Azərbaycan bu bəladan çox az zamanda xilas olacaq. “Koronavirusla bağlı əvvəlcədən proqnozlaşdırılan dinamika göz önündədir. Biz düşünürdük ki, aprel ayının ikinci yarısından enən dinamika görməliyik. Bu azalma və sağalmanın yoluxma halını üstələməsi aprelin 20-dən sonra xüsusilə çox hiss ediləcək. Əlbəttə, infeksiyanın yeni bir dalğası olmasa. Çünki bu prosesin ətrafında dünya üzrə aydın sezilən başqa maraqlar da var. Bütün bunlarla yanaşı, bizim əsas marağımız ölkənin milli maraqlarıdır ki, bu proses, virus mümkün qədər tez lokallaşsın, bundan az itkilərlə çıxaq. Bu baxımdan, karantin, sosial izolyasiya və dezinfeksiya tədbirlərinə ciddi əməl etmək vacibdir. Biz buna əməl etsək, bizdə əhali sıxlığı da çox deyil, bu baxımdan biz daha az itkilərlə pandemiyadan çıxa bilərik. Hələlik proses düşündüyümüz istiqamətdə gedir. Aprelin 20-dən sonra dinamikanı şərh etsək yaxşı olardı” - deyə A.Qeybulla bildirdi.
İradə SARIYEVA
