Koronavirus pandemiyası ilə mübarizədə ön xəttə dayanan həkimlər ordusu həm xəstəliyə yoluxanların, həm də bəşəriyyətin xilası üçün çalışır. Ağ xalatlı həkimlər, ümumilikdə, tibb işçiləri koronavirus əleyhinə tədbirlərdə fədakarlıq göstərirlər.
Koronavirus pandemiyası ilə mübarizənin bir nömrəli qəhrəmanları, sözsüz ki, həkimlər, tibbi personaldır. Belə durumda onların işinin nə qədər ağır olduğunu təxmin etmək elə də çətin deyil. Bunu anlamaq üçün təkcə günümüzün qəhrəmanlarının 12 saat fasiləsiz skafandr geyimində çalışdığını düşünmək kifayət edər.
Məlumdur ki, koronavirusla mübarizə aparan həkimlərimiz evlərində qalmır, onlar xüsusi otellərə yerləşdirilib. Nəzərə almaq lazımdır ki, həkimlər hər gün koronaviruslu xəstələrlə təmasda olduqları üçün ailə üzvlərini yoluxdurmaq risqləri yüksəkdir.
Qeyd edək ki, ağ xalatlı qəhrəmanlar hər gün 8-14 saat işləmək məcburiyyətindədirlər. Onlar oteldən çıxıb işə gəldikləri andan iş gününün sonuna qədər geyindikləri skafandrı çıxara bilməzlər. Çünki bu halda virusa yoluxa bilərlər. Bu səbəbdən həkimlər heç bir ehtiyaclarını ödəyə bilmirlər. Yəni nə yemək yeyə, nə su içə, nə də təbii ehtiyaclarını ödəyə bilirlər. Bu səbəbdən pampers bağlamaq zorundadırlar. Maska və eynək taxmaqdan isə üzləri pis vəziyyətə düşüb.
Koronavirusla mübarizə aparan ATU Tədris Cərrahiyyə Klinikasının həkimi uroloq Məmməd Məmmədov sosial şəbəkə vasitəsilə qeyd edib ki, o, könüllü olaraq xəstəxanaya gəlib: “Aprelin 3-dən hər gün 8 saat olmaqla növbə ilə xəstələrin yanında oluruq. Virusla amansız mübarizə aparırıq. Kiçik bir ehtiyatsızlığımız xəstənin halının dəyişməsinə gətirib çıxara bilər. Həm də virus bizə keçməsin deyə, atacağımız addımları belə ehtiyatla və dəqiq edirik. Hər kəs ailəsini və özünü düşünür, amma biz vətənə və millətə qulluq etməyi düşünüb bu yolu seçdik. Təsəvvür edin ki, 8 saatlıq müddətdə su içmirik və yemək yemirik, havakeçirməz kombinzonun içində oluruq. Amma, nəyin bahasına olursa-olsun, bütün çətinlikləri adlayacağıq".
Təəssüf hissilə qeyd edək ki, koronavirusla mübarizə aparan həkimlər arasında adıçəkilən virusa yoluxanlar da var. Ancaq koronavirusa yoluxan həkimlərin sayı çox deyil. TƏBİB-in İdarə Heyətinin sədri Ramin Bayramlı media nümayəndələrinə açıqlamasında bildirib ki, bir tibb müəssisəsində 6 nəfər virusa yoluxmuşdu. Hazırda həmin həkimlər sağalıblar.
Onu da qeyd edək ki, pandemiya dövründə COVID-19 virusuna yoluxmuş xəstələrlə birbaşa təmasda olan həkimlərin, tibb işçilərinin dövlət tərəfindən sosial müdafiəsi istiqamətində tədbirlər həyata keçirilib. Prezident tərəfindən onların əməkhaqqının artırılması barədə sərəncam imzalanıb. Əməkhaqlarına əlavələr edilir. Bundan əlavə, tibbi personalın bu virusdan qorunması üçün bütün lazımi avadanlıqlar təmin edilir.
Maraqlıdır, ictimaiyyət virusa yoluxmuş həkimlərə nə kimi dəstək verməlidir?
“...bu, elə real məbləğ olmalıdır ki, həkimlərdə güvən yaratsın”
Millət vəkili Nigar Arpadarai hesab edir ki, həkimlər üçün həyat sığortası mexanizmi tətbiq olunmalıdır: “Pandemiya zamanı əmək fəaliyyətinə görə xəstələrlə birbaşa ünsiyyətdə olan peşə sahibləri üçün həyat sığorta mexanizminin tətbiqi zəruridir. Çünki bu insanlar hər gün təhlükə ilə qarşılaşırlar. Həkimlərimizi qorumalı, onların sabaha güvənini artırmalıyıq. Bu insanların güvəni olmalıdır ki, onlara sabah nəsə olarsa, ailələri dövlət tərəfindən dəstəklənəcək. Fikrimcə, hazırkı vəziyyətdə, karantin vaxtı bunu təcili tətbiq etmək lazımdır. Lakin bu, mütləq qanunvericilikdə öz təsbitini tapmalıdır. Pandemiya dövründə qanunvericilikdə buna bənzər təcrübələrdən istifadə edərək, tibb işçilərinin həyat sığortası mexanizmi yaradıla bilər. Buna misal kimi hərbçilərin həyat sığortasını göstərmək olar. Bunu hazırkı şəraitdə etmək çox vacibdir. Tibb işçilərinin həyat sığortasında əmək fəaliyyəti dövründə ölüm halları, əlillik və sağlamlığı üçün ciddi təhdid yaradan hallar olarsa, bu sığorta işləməlidir. Lakin bu, elə real məbləğ olmalıdır ki, həkimlərdə güvən yaratsın”.
Günel CƏLİLOVA
