“İlin sonuna qədər sosial sahədə heç bir proqram ixtisar edilməyəcək”. Bunu Prezident İlham Əliyev bi ilin birinci rübünün sosial-iqtisadi yekunlarına həsr olunan müşavirədəki çıxışında deyib.
Dövlət başçısı bildirib ki, qeyri-neft sənaye sektorunda artım 23 faizdir. Bu da onu göstərir ki, son müddət ərzində bu sahəyə göstərilən diqqət və qoyulan sərmayə öz gözəl nəticəsini verməkdədir: “İnflyasiya 3 faiz səviyyəsindədir, ilin iki ayında 2,8 faiz idi, bir qədər artıb. Əhalinin gəlirləri isə 7 faizə yaxındır. Üç ayda vergi və gömrük orqanları büdcəmizə proqnozdan əlavə 310 milyon manatdan çox vəsait daxil etmişlər. Xüsusilə nəzərə alsaq ki, indi iqtisadi fəallıq aşağı düşüb, bu, hesab edirəm ki, yaxşı nəticədir, yenə də şəffaflıqla bağlı olan tədbirlərin bariz nümunəsidir. Bildirməliyəm ki, ilin sonuna qədər sosial sahədə heç bir proqram ixtisar edilməyəcək. Əksinə, koronavirusla bağlı ümumi dəstək paketi 2,5 milyard manat nəzərdə tutulur. Ancaq bundan artıq olacaq. Təkcə lazımi avadanlıqların, ləvazimatların alınması üçün bu yaxınlarda Prezidentin ehtiyat fondundan 97 milyon manat ayrıldı. Bundan sonra da ilin sonunadək nə qədər lazımdırsa, hələ 150 milyon manatın ayrılması da nəzərdə tutulur. Bu, 2,5 milyard manatın içində deyil. Bütün sosial ödənişlər aparılır”.
Nüfuzlu beynəlxalq ekspertlər, maliyyə qurumları həyəcan təbili çalaraq bədbin proqnozlar verirlər. Bəyan edirlər ki, dünya iqtisadiyyatı növbəti resessiya, ötən əsrin 30-cu illərindən bəri görünməyən böhran ərəfəsindədir. O üzdən, böhrana əsas səbəb olan koronavirusla mübarizə məqsədilə yaranan ziyanları minimuma endirmək üçün sosial layihələri ixtisar edirlər. Azərbaycan isə, bütün çətinliklərə rəğmən, ilin sonuna qədər sosial sahədə heç bir proqram ixtisar edilməyəcək. Buna ən yüksək səviyyədə təminat verildi. Bu baxımdan, sözügedən məsələnin əhəmiyyətini ekspertlər necə dəyərləndirirlər?
“Gözlənilməyən şokların qarşısının alınmasında mövcud proqramların rolu böyükdür”
Məsələyə münasibət bildirən millət vəkili Aydın Hüseynovun sözlərinə görə, bu, Azərbaycan dövlətinin öz vətəndaşlarına verdiyi böyük dəyərin göstəricisidir: “Bunun nəticəsidir ki, pandemiyanın təsirlərini minimuma endirmək üçün büdcədən 2,5 milyard manatdan çox vəsait ayrılıb. Bu vəsaitlər dəyən zərərin kompensasiyasına, vətəndaşların əməkhaqlarının ödənilməsinə yönəldiləcək. Bütün bunlarla yanaşı, ilin sonuna qədər nəzərdə tutulan bütün sosial proqramlar həyata keçiriləcək. Məcburi köçkünlər və digər kateqoriyadan olan şəxslər üçün nəzərdə tutulan layihələr icra ediləcək. Sadalananlar bir daha onu göstərir ki, ölkədə aparılan sosial siyasətin əsas məğzi əhalinin həyat səviyyəsini yaxşılaşdırmağa hesablanıb. Ölkə iqtisadiyyatının bütün resursları vətəndaşların xidmətindədir. Bununla belə, həmin resurslar ölkə iqtisadiyyatının inkişafına yönəldilir. Həyata keçirilən sosial siyasət ciddi ehtiyatlara söykənir. Nəzərə almaq lazımdır ki, Azərbaycanın kifayət qədər valyuta ehtiyatı var. Başqa bir tərəfdən, gözlənilməyən şokların qarşısının alınmasında mövcud proqramların rolu böyükdür”.
Vidadi ORDAHALLI
