Bildiyimiz kimi, koronavirus dünyada yeni-yeni yayıldığı vaxtlardan Azərbaycan dövləti bununla bağlı həm önləyici tədbirlər həyata keçirməyə başladı, həm də xarici ölkələrdə fəaliyyət göstərən səfirliklərimizin, konsulluq və nümayəndəliklərimizin xətti ilə xaricdə yaşayan vətəndaşlarımıza səsləndi, onların vətənə qayıtması üçün tədbirlər gördü. Xaricdə yaşayan Azərbaycan vətəndaşlarının təxliyyəsi həyata keçirildi. Dövlətin təşkil etdiyi xüsusi çarter reysləri ilə dünyanın bir çox ölkəsindən vətəndaşlar ölkəmizə gətirildi.
Bildiyimiz kimi, ölkəmizdə karantin rejiminin sərtləşdirilməsi ilə əlaqədar olaraq dövlətimiz bütün hava, quru sərhədlərini bağladı və bunun nəticəsində də ölkəmizə giriş-çıxış həyata keçirilmir. Azərbaycan vətəndaşlarının təhlükəsizliyinin təmin edilməsinə və virusun yayılmasının qarşısının alınmasına, yoluxma hallarının lokallaşdırılmasına nail olmaq üçün atılan bu addım artıq effektiv nəticələr verməkdədir. Belə ki, artıq ölkəmizdə koronavirusdan sağalma bu virusa yoluxmanı üstələyib.
Məlum vəziyyətlə əlaqədar olaraq hazırda vətənə gələ bilməyən Azərbaycan vətəndaşlarının ölkəmizə təxliyyə edilməsi dövlətin diqqətdə saxladığı əsas məsələlərdən biridir. Xarici ölkələrdə fəaliyyət göstərən səfirliklərimiz, diplomatik korpuslarımız vətəndaşlarımızla daim əlaqə saxlayır, şərait yaranan kimi onların vətənə qayıdışının təmin olunacağı bildirilir. Bütün səfirliklərdə “qaynar xətt” yaradılıb və vətəndaşlarımız istədikləri vaxt həmin “qaynar xətt”lə əlaqə saxlayaraq məlumatlar alırlar.
Pandemiya ilə əlaqədar xarici ölkələrdə qalan və Azərbaycana gəlmək istəyən vətəndaşların təxliyyəsi nə zaman həyata keçiriləcək?
Bu məsələyə Nazirlər Kabineti yanında Operativ Qərargahın təşkil etdiyi mətbuat konfransında Nazirlər Kabinetinin Mətbuat xidmətinin rəhbəri İbrahim Məmmədov aydınlıq gətirib və məsələnin gündəmdə olduğunu deyib: “Operativ Qərargah xaricdəki vətəndaşlarımızın aprelin 20-dən sonra ölkəyə qayıtması məsələsi barədə düşünür”.
İ.Məmmədov deyib ki, artıq planlaşdırılır ki, aprelin 20-dən sonra bütün dünyadan həftədə 300-400 nəfər qəbul etmək imkanları yaranacaq: “Ən çox Rusiyadan gələnlər gözlənir. Rusiyadan gələnlər üçün xüsusi portal hazırlanır. Adı “Evə gedirəm” portalıdır. Aprelin 20-dən Rusiya, Türkiyə və başqa ölkələrdən həftədə 300-400 nəfərin tədricən ölkəyə qayıdışı təmin olunacaq”.
TƏBİB İdarə Heyətinin sədri Ramin Bayramlı bildirib ki, bu say tibbi resurslara uyğun müəyyənləşir: “Ölkəyə gələn vətəndaşlar xüsusi karantində saxlanacaq. Xaricdən gələn vətəndaşlar bilməlidirlər ki, onlar karantində saxlanmaqla, müayinəsi təşkil edilməklə ölkəyə gətiriləcək”.
Bildiyimiz kimi, artıq hazırlanma prosesində olan “Evə gedirəm” portalı vətəndaşlarımızı ölkəmizə bir addım da yaxınlaşdırır.
“Bizim xaricdə olan vətəndaşlarımız Azərbaycan dövlətinin bu təmənnasız qayğısını xüsusi qiymətləndirməlidirlər”
Siyasi şərhçi Azər Həsrət “Bakı-Xəbər”ə bildirdi ki, Azərbaycan dövləti öz vətəndaşlarının qayğısına həmişə qalıb. İstər ölkə daxilində, istərsə də ölkə xaricində yaşayan Azərbaycan vətəndaşlarının dövlət qayğısı ilə əhatə olunduğunu deyən A.Həsrət qeyd etdi ki, indiki şəraitdə Azərbaycanın öz vətəndaşlarını xarici ölkələrdən mərhələli şəkildə gətirməyi planlaşdırması, nəzərdə tutması müsbət haldır. Aprelin 20-dən sonra Türkiyə və Rusiyadan 300-400 vətəndaşımızın gətirilməsinin proqnozlaşdırılmasının əvvəl görülən işlərin davamı olduğunu deyən A.Həsrət hesab edir ki, Azərbaycan dövləti həmişə öz vətəndaşlarına sahib durub. “Bilirsiniz ki, ilkin mərhələdə minlərlə Azərbaycan vətəndaşı xarici ölkələrdən xüsusi çarter reysləri ilə ölkəmizə gətirildi, onlar karantinə alındılar, müalicəyə ehtiyacı olanlar dövlət hesabına müalicə olundular. Amma indi biz koronavirusla bağlı sosial təcridin, ciddi karantin rejiminin növbəti mərhələsindəyik. Təbii ki, burada bir qədər ehtiyatlı davranmağa ehtiyac var. Ona görə də Azərbaycan dövləti mümkün olduqca xaricdəki vətəndaşlarımızı mərhələli şəkildə təminat altında gətirməyə üstünlük verir. Bu da düzgün taktikadır. Çünki birdən-birə sərhədləri açıb “xaricdə kim var, buyursun gəlsin” demək, əlbəttə ki, böyük bir fəlakətə səbəb ola bilər. Ona görə də dövlət ehtiyatlı davranır, hazırlıq işlərini görür, ölkəyə gətiriləcək vətəndaşların karantin altına alınması, onların ayrıca yerləşdirilməsi, onların tesdən keçirilməsi üçün tədbirlərini indidən görür. İndi bilirsiniz ki, dünyada olduğu kimi, Azərbaycanda da bu virusa yoluxanların sayı artır və artım başqa ölkələrlə müqayisədə bizdə fəlakət həddində deyil. Lakin, istənilən halda, biz dəqiq bilmirik ki, ölkədə vəziyyət tam olaraq necə proqnozlaşdırılacaq. Ona görə dövlət ehtiyatlı davranır”.
A.Həsrət vurğuladı ki, yəni dövlət xaricdən gəlmək istəyənlərin gəlişinə etiraz etmir, onların ölkəmizə gəlişini təmin edir, amma mərhələli şəkildə. A.Həsrətin sözlərinə görə, xaricdəki vətəndaşlarımız ölkəmizə gətirilərkən karantinə alınmalı və onlar müvəqqəti təcrid edilməli, müayinədən keçirilməlidirlər. “Düşünürəm ki, bizim xaricdə olan vətəndaşlarımız Azərbaycan dövlətinin bu təmənnasız qayğısını xüsusi qiymətləndirməlidirlər. Hesab edirəm ki, ümumiyyətlə, xaricdəki vətəndaşlarımız orada uzun müddətdir yaşayıblar, çalışıblar, indi isə onlar vətənə dönmək istəyirlər. Rusiyadan da gəlmək istəyən vətəndaşlarımız çoxdur. Mən onların yerinə olsaydım, yeməyim-içməyim, qalacaq yerim olsaydı, gəlməyə cəhd etməzdim. Çünki indiki şəraitdə ölkədən-ölkəyə getmək yoluxma risqini daha da artırır. Yəni o vətəndaşlar özləri sağlam olsalar da, onların yolda yoluxma ehtimalı ola bilər. Evdən bayıra çıxmayan vətəndaşlar bayıra çıxdıqdan sonra onun təmasları artacaq, bu da risq deməkdir. Təbii ki, belələri özünü də təhlükəyə atacaq və ölkəyə qayıtdıqdan sonra başqalarını da bu risq altında qoyacaq” - deyə bildirən A.Həsrət hesab edir ki, Rusiyada yaşayan imkanlı azərbaycanlılar orada yaşayan imkansız vətəndaşlarımızı xüsusi qayğı altına almalı, onları himayə etməlidirlər. “Bilirik ki, Rusiyada yaşayan azərbaycanlılar arasında imkansızlar da var, onlar günəmuzd işləyənlərdir. Ona görə də imkanlı azərbaycanlılar onları himayə altına almalıdırlar ki, onlar təhlükəsiz olsunlar və əziyyət çəkməsinlər. Pandemiya bitdikdən sonra isə o insanlar dövlət tərəfindən vətənə gətiriləcək. Hesab edirəm ki, dövlət şərait yaranan kimi xaricdə yaşayan Azərbaycan vətəndaşlarının evə qayıtmasını reallaşdıracaq, çünki bununla bağlı artıq yeni mərhələyə hazırlıq prosesi başlanır” - deyə bildirən A.Həsrət, bununla belə, yenə indiki vəziyyətdə xaricdə yaşayan vətəndaşlarımızın öz yerlərində qalmasını tövsiyə edir.
İradə SARIYEVA
