Məlum olduğu kimi, ölkəmizdə koronavirus pandemiyası ilə əlaqədar iş yerlərinin qorunması tədbirləri ilə yanaşı, əhalinin məşğulluq imkanlarının artırılması prioritet fəaliyyət istiqamətlərindən biridir. Bütün dünyada virusla əlaqədar olaraq iş yerlərinin kütləvi şəkildə bağlanmasının, yeni iş yerlərinin isə yaradılmamasının şahidi oluruq. Belə bir ağır şəraitdə isə, qeyd etdiyimiz kimi, Azərbaycan dövləti xüsusi tədbirlər həyata keçirir, həm iş yerlərinin saxlanması, həm də yeni iş yerlərinin yaradılması yönündə işlər görür.
Bilirik ki, artıq necə ildir Azərbaycanda ictimai iş yerlərinin yaradılması prosesi həyata keçirilir.
Prezident İlham Əliyev ilin birinci rübünün sosial-iqtisadi yekunlarına həsr olunan videokonfrans şəklində keçirdiyi müşavirədə qeyd edib ki, 37 min ictimai iş yerinin açılması nəzərdə tutulsa da, onların sayı 50 min oldu. “...Ödənişli ictimai işlərə gəldikdə, biz ilin əvvəlində 37 min ödənişli iş yerinin yaradılmasını nəzərdə tuturduq. İndi bu pandemiyaya görə bunların sayı 50 minə çatıb. Amma yenə də baxın, əgər bölgələrdə xüsusilə buna əlavə tələbat yaranarsa, məlumat verin, bəlkə biz əlavə vəsait ayıraq ki, bu çətin dövr ərzində insanları işlərlə təmin edək” - deyə ölkə başçısı qeyd edib.
“Dövlət işini itirən vətəndaşların məşğulluğunun təmin edilməsi üçün daha çox ictimai iş yeri yaratmaqda maraqlıdır”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abbasbəyli “Bakı-Xəbər”ə bildirdi ki, məmurlar Prezidentin tövsiyələrinə əməl edərək bölgələrdəki vəziyyəti dərindən öyrənməli və ehtiyac olduğu yerlərdə yeni ictimai iş yerlərinin açılmasının gerçəkləşdirilməsinə dəstək verməlidirlər.
Ə.Abbasbəylinin sözlərinə görə, pandemiyanın dünya iqtisadiyyatını çökdürdüyü, iş yerlərini qapatdığı bir dövrdə Azərbaycan dövlətinin həm iş yerlərinin saxlanması, həm də yeni ictimai iş yerlərinin yaradılması ilə bağlı həyata keçirdiyi tədbirlər həqiqətən də misilsiz bir nümunədir. “Nəzərə alsaq ki, bütün dünya pandemiya dövrünü yaşayır, o cümlədən də Azərbaycanda da pandemiyanın təsiri özünü göstərir, buna baxmayaraq, Azərbaycanda həyat donmayıb, inkişaf edir. Azərbaycanda koronavirus təhlükəsinə qarşı həyata keçirilən qabaqlayıcı tədbirlər, tətbiq edilən metodlar bu gün Rusiya, Türkiyə telekanalları tərəfindən bir örnək kimi göstərilir. Azərbaycanda SMS-lə icazə metodunu biz tətbiq etdikdən sonra başqa dövlətlər də bunu tətbiq etməyə başladılar. Rusiya da tətbiq etməyə başlayıb. Biz bir sıra məsələlərdə bütün qonşu dövlətləri, eləcə də Avropa ölkələrinin çoxunu qabaqlamışıq. Pandemiya dövründə Azərbaycan hökuməti bir sıra layihələr həyata keçirib və keçirməkdə də davam edir. Prezidentin pandemiya dövründə videokonfrans keçirməsi, burada bir sıra sahələrdəki vəziyyətə toxunması, o cümlədən də sosial sahəyə, ictimai iş yerlərinin yaradılmasına diqqət ayırması təqdirəlayiqdir. Prezident bu videokonfrans vasitəsilə cəmiyyətə, xalqa bir sıra ümidverici mesajlar göndərdi. Qeyd etdiyim kimi, onlardan biri də 50 min ictimai iş yerinin yaradılması ilə bağlı idi. Əvvəlcə 37 min ictimai iş yerinin açılması nəzərdə tutulsa da, onun indi 50 minə çatdırılması təqdirəlayiq haldır. Bu, dövlətin vətəndaşının sosial durumunu yaxşılaşdırmasına xidmət edir. Düşünürəm ki, ilin sonuna qədər yaradılacaq ictimai iş yerlərinin sayı daha çox olacaq. Çünki bununla bağlı dövlətin iradəsi, marağı var ki, daha çox ictimai iş yeri açılsın, daha çox insa işlə təmin olunsun. Bilirsiniz ki, pandemiya dövründə təkcə dünyada deyil, Azərbaycanda da işini itirənlər oldu. Dövlət işini itirən vətəndaşların məşğulluğunun təmin edilməsi üçün daha çox ictimai iş yeri yaratmaqda maraqlıdır. Bu insanlar həmin ictimai iş yerlərində ya müqavilə, ya da digər metodlarla işləyib ailələrinin güzəranını yaxşılaşdıracaqlar”.
Bundan əvvəl də Əmək və Əhalinin Sosial Müdafiəsi Nazirliyinin DOST mərkəzləri tərəfindən ictimai iş yerlərinin açıldığını deyən Ə.Abbasbəylinin sözlərinə görə, bu istiqamətə saysız insan cəlb edilib. İnsanların sosial vəziyyətinin düzəlməsi üçün əhəmiyyət kəsb edən ictimai iş yerlərinin çoxaldılması zəruridir. “İctimai iş sahəsinə maraq çoxdur və insanlar bu sahədə işləyib evlərinə qazanc aparırlar. Fikirləşirəm ki, ictimai iş yerlərinin yaradılmasının dövlət xətti ilə həyata keçirilməsi daha effektivdir. İctimai iş yerlərinin yaradılması insanlara stimul verir. Hazırda ictimai iş yerlərinin artırılması çox vacib məsələdir. Bu proses gedir, yəqin ki, ilin sonuna qədər ölkəmizdə daha çox ictimai iş yerinin açılmasının şahidi olacağıq. 37 min iş yerinin 50 minə çevrilməsi əsas verir ki, biz ilin sonuna qədər daha çox ictimai iş yerinin açılacağını deyək. Yaradılan həmin ictimai iş yerləri əsasən dezinfeksiya, sosial xidmətlər, yaşlı, xəstə insanlara baxmaq və s. istiqamətləri əhatə edəcək. Bu da çox vacib sahədir və bu işdə çalışmaq istəyənlər çoxdur” - deyə bildirən Ə.Abbasbəylinin sözlərinə görə, bu gün dünyanın bir çox ölkəsində ictimai işi ictimai qurumlar həyata keçirirlər.
Ə.Abbasbəyli onu da qeyd etdi ki, Əmək və Əhalinin Sosial Müdafiəsi Nazirliyinin DOST İş Mərkəzi vasitəsilə aprel-may ayları üzrə əlavə 50 min ödənişli ictimai iş yerinin yaradılmasını həyata keçirməklə yanaşı, bölgələrdə əlavə ictimai iş yerlərinin açılması üzrə də xüsusi təkliflər, mexanizmlər hazırlanmalıdır. “Əlaqədar qurumlar, məmurlar Prezidentin tövsiyələrinə ciddi əməl etməli və bu istiqamətdə ciddi araşdırmalar aparıb yeni ictimai iş yerlərinin açılması üçün təkliflərini, layihələrini ölkə başçısına təqdim etməlidirlər. Çünki yeni ictimai iş yerlərinin yaradılması üçün dövlət böyük səylər göstərir, eyni zamanda da nümunələr ortaya qoyur” - detə Ə.Abbasbəyli bildirdi.
İradə SARIYEVA
