Cəmiyyətin elə təbəqələri, elə qrupları var ki, onların fəaliyyətinin stimullaşdırılmasına, zəhmətlərinin qiymətləndirilməsinə hər zaman zərurət var. Azərbaycan dövləti mütəmadi olaraq ölkə vətəndaşlarının sosial rifahının gücləndirilməsi üçün müxtəlif addımlar atır, sosial paketlər, sosial layihələr gerçəkləşdirir. Əlbəttə, sosial sahədə qəbul edilən hər bir qərar, həyata keçirilən hər bir layihə əsasən cəmiyyətin həssas qruplarının dayanıqlığının, onların sosial-maddi rifahının yüksəldilməsinə yönəlib.
Azərbaycan dövlətinin son illər həyata keçirdiyi sosial paketlərin davamlılığı təmin edilir və müxtəlif sahələri əhatə edən yeni sosial layihələr gerçəkləşdirilir. Dövlətin həyata keçirdiyi növbəti sosial layihə isə sosial xidmət işçilərinin əməkhaqlarının artırılması barədədir.
Məlum olduğu kimi, Prezident İlham Əliyevin “Xüsusi karantin rejimi dövründə sosial xidmətlər göstərilməsində iştirak edən işçilərin sosial müdafiəsinin gücləndirilməsi haqqında” Sərəncamı ilə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) rayon (şəhər) şöbələrində və tabeliyindəki sosial xidmət müəssisələrində çalışan işçilərin əməkhaqlarına aylıq vəzifə (tarif) maaşının 1 (bir) misli miqdarında müddətli əlavə müəyyən edilməsi nəzərdə tutulur.
Nazirlikdən mətbuata verilən məlumata görə, sərəncam DSMF-nin rayon (şəhər) şöbələrindəki 1 400 nəfər və fondun tabeliyindəki sosial xidmət müəssisələrində çalışan 600 nəfər, ümumilikdə, 2 000 nəfər sosial xidmət işçisini əhatə edir.
Qeyd edək ki, xüsusi karantin rejimi dövründə infeksiyaya yoluxma risqi yüksək olan yaşı 65-dən yuxarı şəxslərin pandemiyadan qorunması məqsədilə onların evdən çıxmaları qadağan edilib. Bununla əlaqədar dövlət başçısının göstərişinə əsasən, Əmək və Əhalinin Sosial Müdafiəsi Nazirliyi tərəfindən bütün sosial xidmət işçiləri səfərbər edilməklə, gücləndirilmiş iş rejimi şəraitində yaşı 65-dən yuxarı tənha yaşayan şəxslər evlərində gündəlik sosial xidmətlərlə təmin olunurlar.
Hazırda bu kateqoriyadan olan 15 000-dən çox tənha yaşlıya evlərində sosial xidmətlər (ev təsərrüfatı ilə bağlı işlərdə, əsas tələbat mallarının, dərman vasitələrinin alınmasında, kommunal ödənişlərin edilməsində və s.) göstərilir. DSMF-nin 9 sosial xidmət müəssisəsində isə 1 000-dən çox şəxs stasionar şəraitdə reabilitasiya yönümlü sosial xidmətlərlə təmin olunur.
“Sosial işçilər yaxından hiss edirlər ki, onların əməyinə, zəhmətinə dövlət dəyər verir”
Tanınmış iqtisadçı-alim, professor Əli Əlirzayev “Bakı-Xəbər”ə bildirdi ki, sosial işçilərin əməkhaqlarının qaldırılması barədə Prezidentin verdiyi müvafiq sərəncam bu istiqamətdə növbəti sosial dəstək layihəsidir. Ə.Əlirzayevin sözlərinə görə, dövlət daim cəmiyyətin həssas qruplarının və onlara baxan, onlarla məşğul olan sosial işçilərin sosial müdafiəsinin gücləndirilməsi istiqamətində davamlı sosial layihələr həyata keçirir. “Sosial işçilərin əməkhaqqının ikiqat artırılması ilə bağlı Prezidentin imzaladığı sərəncam bu sahədə çalışan insanların sosial müdafiəsinin gücləndirilməsinə xidmət edir. Bu gün ölkəmizdə sosial işçilər, sosial işlə məşğul olan insanlar çoxdur. Əlillərə, kimsəsiz uşaqlara, ahıllara, xəstələrə xidmət edən sosial işçilərin işi daha risqli və zəhmətlidir. Onlar bəzən xəstələrə baxarkən xəstəlik də keçirə bilərlər. Bu baxımdan, sosial işçilərin maddi durumunun yaxşılaşdırılmasına, onların hər cür qayğı ilə əhatə olunmasına zərurət var və gördüyümüz kimi, dövlət də bu istiqamətdə layihələr həyata keçirir. Bu gün o insanların maddi xərcləri, ehtiyacları artır. Ona görə də onların daha çox əməkhaqqı alması zəruri idi. Sosial işçilərin əməkhaqlarının qaldırılması onların daha da canla-başla, daha da ürəklə işləməsinə stimul yaradır. Xəstələrə, qocalara, tənha ahıl insanlara, köməyə ehtiyacı olan şəxslərə dayaq olmağın özü böyük fədakarlıqdır. Bizim sosial işçilər bu mənada çox böyük fədakarlıq edirlər. Sosial işçilərin əməkhaqlarının bu şəkildə qaldırılması indiki şəraitdə onların həyat səviyyəsinin yüksəldilməsinə, sosial müdafiəsinin gücləndirilməsinə, fədakar əməklərinin stumullaşdırılmasına xidmət edir. Sosial işçilər yaxından hiss edirlər ki, onların əməyinə, zəhmətinə dövlət dəyər verir”.
Bunun bir humanist addım olduğunu deyən Ə.Əlirzayev hesab edir ki, dövlət bununla cəmiyyətin bütün həssas qruplarının, eləcə də sosial işçilərin daim sosial müdafiəsini diqqətdə saxladığını göstərir. Ə.Əlirzayevin sözlərinə görə, sosial işçilərlə yanaşı, digər qrupları əhatə edən sosial layihələr qəbul ediləcək. Onun fikrincə, bu ağır şəraitdə insanların əsas güvənc yeri dövlətdir və onlar hər zaman dövlətin dəstəyinə arxayındırlar: “Hesab edirəm ki, dövlətin sosial layihələri bundan sonra da davamlı olacaq və layihələr digər sosial qruplardan olan insanları da sevindirəcək. Azərbaycan dövləti sosial dövlət kimi hər zaman əhalinin həssas qruplarının sosial müdafiəsinin gücləndirilməsi istiqamətində layihələr həyata keçirir, sosial paketlər qəbul edir. Bu da vətəndaş məmnunluğu ilə qarşılanır”.
İradə SARIYEVA
