Məlum olduğu kimi, Nazirlər Kabineti əhali üzrə elektrik enerjisinin aylıq istehlak həcminin tənzimlənməsi ilə bağlı tədbirlər haqqında qərar verib.
Qeyd edək ki, bununla bağlı Baş nazir Əli Əsədov qərar imzalayıb. Qərara əsasən, “Elektrik enerjisinin ölkədaxili tariflərinin tənzimlənməsi barədə” Azərbaycan Respublikası Tarif (qiymət) Şurasının 2016-cı il 28 noyabr tarixli 17 nömrəli qərarı ilə müəyyən edilmiş əhali üzrə elektrik enerjisinin 7 qəpik/kilovat-saat tarifi tətbiq olunan aylıq istehlak həcmi 2020-ci ilin aprel ayından etibarən ardıcıl iki hesabat ayı müddətində 100 (yüz) kilovat-saat artırılaraq, 400 (dörd yüz) kilovat-saat müəyyən edilib.
Bu qərar bütün əhali istehlakçılarının aprel ayında sayğac oxunduğu gündən sonrakı iki hesabat ayı üçün istehlak etdikləri elektrik enerjisinə şamil edilir. Hesabat ayı üçün istehlak edilən elektrik enerjisi dedikdə ardıcıl 30 (otuz) təqvim günü ərzində istifadə edilmiş elektrik enerjisinin həcmi nəzərdə tutulur.
Pandemiya dövründə elektrik enerjisi limitinin artırılması ölkə ictimaiyyəti tərəfindən müsbət qarşılanır.
“...əhalinin sosial müdafiəsi ilə bağlı atılan addımlardan biridir”
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, işıq limitinin artırılması yaranmış məlum vəziyyətlə əlaqədar olaraq əhalinin sosial müdafiəsi ilə bağlı atılan addımlardan biridir: “Prezidentin sərəncamı ilə bağlı yaradılan İşçi Qrupu tərəfindən atılan addımların məqsədi əhalinin aztəminatlı təbəqəsinin sosial müdafiəsini gücləndirməkdir. Xatırladım ki, Prezident İqtisadiyyat naziri Mikayıl Cabbarovu qəbul edərkən işıq limitinə güzəşt olunması məsələsini qaldırmışdı. Məlum vəziyyətlə əlaqədar olaraq əhaliyə evdə qalması tövsiyə edilib. Bununla yanaşı, iş yerlərinin əksəriyyəti də müvəqqəti olaraq dayanıb. Əhali evdə olduğu üçün kommunal xidmətlərə olan ehtiyac artıb. Belə olan halda, işıq limitinin artırılması yüksək qiymətləndirilməlidir”.
Günel CƏLİLOVA
