Məlum olduğu kimi, Azərbaycanda koronovirusa görə dövlət tərəfindən işsizlərə 190 manat birdəfəlik yardımın ödənilməsi prosesinə başlanıb. İşsizlər müvafiq portala daxil olaraq qeydiyyatdan keçirlər və sözügedən məbləği Dövlət Məşğulluq Xidmətindən alırlar. Aprelin 13-nə olan məlumata görə, Azərbaycanda 75 min nəfər işsizə 75 min manat ödənilib.
Bu gün işsiz adı ilə müvafiq xidmətə müraciət edənlərin sayının kifayət qədər olduğu məlumdur. Bir çox hallarda isə başqa yerlərdən ödəmə alanlar da “işsiz kimi” 190 manatı əldə etmək istəyirlər.
Rəsmi qurumlar, bir çox hallarda, başqa yerlərdən ödəniş alanların bu məsələ ilə bağlı müraciətlərinin geniş miqyas aldığını deyirlər.
Dövlət Məşğulluq Xidmətinin rəis müavini Cəmaləddin Quliyev birdəfəlik ödəməyə müraciət edən zaman sistemdə baş verən donmalara münasibət bildirib. C.Quliyev KİV-ə məlumat verib ki, birdəfəlik ödəmə heç bir gəliri olmayan ailələrə verilir: “Vətəndaşlardan xahiş olunur ki, əgər dövlətdən digər ödənişlər alırlarsa, 190 manat üçün müraciət etməsinlər. Sistemdə yükləmələr olur. Sistemə müraciətlərin sayı da həddən artıq çox olur. Bizim sistem digər dövlət qurumlarının sistemi ilə inteqrasiya olunduğuna görə burada yükləmələr baş verir. Bu da müraciət edən vətəndaşların narazılığına səbəb olur. Qeyd edirlər ki, sistem yüklənib və onlar məlumatlarını daxil edə bilmirlər”.
“Bir çox insan düşünür ki, məşğulluq xidmətlərinə müraciət edərək, o ödəmələri əldə edə biləcək, ancaq elə deyil”
Tanınmış iqtisadçı Elşad Məmmədov “Bakı-Xəbər”ə bildirdi ki, başqa yerlərdən ödəniş alanların əlavə olaraq da 190 manat birdəfəlik yardım alması mümkün deyil. O hesab edir ki, bu istiqamətdə müraciətlərin sayının artması birdəfəlik ödəmənin hansı şəxslərə verilməsi ilə bağlı maarifçilik işinin zəif qurulması ilə bağlıdır. “Bilirsiniz, bu yalnız Azərbaycana aid məsələ deyil, bütün dünyada əhali çox ağır iqtisadi vəziyyətlə üzləşib. Belə olduğu halda, reallaşdırılan sosial-iqtisadi paketlə bağlı əhali arasında qeyri-müəyyənlik var. Bir çox insan düşünür ki, məşğulluq xidmətlərinə müraciət edərək, o ödəmələri əldə edə biləcək, ancaq elə deyil. Amma, əslində, sosial-iqtisadi paketdə konkret meyarlar göstərilib ki, kimlərə iki ay müddətində 190 manat birdəfəlik ödəniş veriləcək. Ona görə də, fikrimcə, bu istiqamətdə təşviqlə, maarifçiliklə bağlı kampaniya aparılmalıdır ki, bu kriteriyaya uyğun olmayan vətəndaşlar 190 manat birdəfəlik ödəniş üçün müraciət etməsinlər. Bu müracətlərin sayının çox olması bir daha onu deməyə əsas verir ki, çox güman, sosial-iqtisadi paket daha da təkmilləşdirilməlidir. Biz sosial istiqamətdə əhalinin geniş təbəqələrinə geniş yeni mexanizmin həyata keçirilməsi istiqamətində yeni qərarların verilməsini gözləməliyik. Çünki iqtisadi vəziyyət kifayət qədər mürəkkəbdir və əhalinin geniş təbəqəsinin maddi dəstəyə ehtiyacı var”.
E.Məmmədov hesab edir ki, indiyə qədər əhalinin müxtəlif qruplarının sosial-iqtisadi durumunun yüksəldilməsi üçün dövlət tərəfindən həyata keçirilən paketlər genişləndirilə bilər: “Düşünürəm ki, biz iqtisadi-sosial paketin genişlənməsinin şahidi olacağıq. Əks halda, iqtisadiyyatda dayanıqlığın qorunması mümkün deyil. Bu bir tərəfdən sosial müdafiə üçün lazımdır, digər tərəfdən də iqtisadi fəallığı qorumaq gərəkdir. Hesab edirəm ki, iqtisadi fəaliyyətə dəstək mexanizmləri təkmilləşdirilərək iqtisadiyyata tətbiq olunacaq”.
İradə SARIYEVA
