Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən xüsusi karantin rejimində insanların hərəkətini idarə etmək üçün yaradılmış icazə sistemi (icaze.e-gov.az/ portalı) artıq bir sıra ölkələrin marağına səbəb olub.
Bununla bağlı yayılan məlumata görə, bəzi ölkələr Azərbaycanda istifadəyə verilən icazə sistemini tətbiq etmək istəyirlər. Bunların sırasında Rusiya, Belarus, Qazaxıstan, Özbəkistan və Birləşmiş Ərəb Əmirlikləri də var.
Məlumat üçün qeyd edək ki, Azərbaycanda xüsusi karantin rejimində vətəndaşların hərəkəti “Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi” vasitəsilə tənzimlənir. Hərəkətinə icazə verilməsi üçün dövlət qurumları və bir çox özəl təşkilatın əməkdaşlarının məlumatları “icaze.e-gov.az” portalında yerləşdirilib. Həmin şəxslər SMS sisteminə bildiriş göndərmədən evdən çıxa bilirlər. Digər vətəndaşlar isə evdən çıxmaq istədiklərinə dair icazə əldə etmək üçün mobil nömrədən icazənin məqsədini bildirən xüsusi kodu, şəxsiyyət vəsiqəsinin seriya və nömrəsini SMS-lə 8103 qısa nömrəsinə göndərirlər.
Göründüyü kimi, Azərbaycanda xüsusi karantin rejimində insanların hərəkətini idarə etmək üçün yaradılmış icazə sistemi digər ölkələrin də diqqətini cəlb edir. Bu, sözügedən sistemin daha effektli olmasından xəbər verir. Məsələ ondadır ki, bunun tətbiq sayəsində koronavirusun ölkədə yayılma dinamikasının genişlənməsinin qarşısı alındı. Digər tərəfdən, bu sistemə çıxış vətəndaşlar üçün daha əlçatandır.
Maraqlıdır, bəs ekspertlər bir sıra ölkələrin Azərbaycanda istifadəyə verilən icazə sisteminə maraq göstərmələrini necə dəyərləndirirlər?
“Çünki ortalıqda həm vətəndaşın işini asanlaşdıran, həm də dövlət qurumlarına...”
Məsələyə münasibət bildirən politoloq Elçin Mirzəbəylinin sözlərinə görə, sözügedən ölkələrin buna maraq göstərməsi Azərbaycandakı icazə sisteminin innovativliyindən və üstünlüyündən xəbər verir: “Məsələ ondadır ki, Azərbaycanda karantin dövründə tətbiq olunan ayrı-ayrı innovativ metodlar dünyanın müxtəlif ölkələrinin diqqətini cəlb edir. Artıq Rusiyanın paytaxtı Moskvada Azərbaycanın təcrübəsinə uyğun bu sistem tətbiq edilir. Belə ki, orada elektron icazələrin alınması ilə bağlı saytlar yaradılıb. Paralel olaraq da SMS icazələrin alınması üçün müvafiq olaraq həm saytlar, həm də “qaynar xətt” yaradıldı. Bu baxımdan, artıq Azərbaycan təcrübəsi digər ölkələrdə tətbiq olunmaqdadır. Sözügedən prosesin davam edəcəyini düşünürəm. Çünki ortalıqda həm vətəndaşın işini asanlaşdıran, həm də dövlət qurumlarına vətəndaşların bir ərazidə kütləvi şəkildə toplaşmaması üçün prosesin tənzimlənməsinə imkan verən bir ağıllı yanaşma var. Azərbaycan bu məsələdə ilk addımı atmaqla uğurlu təcrübə əldə edib. Ötən müddət ərzində ölkəmiz bir neçə uğurlu həll variantı tapıb. Bu da, təbii ki, dövlət idarəçiliyində innovativ yanaşmanın əsas üstünlüyünün və proseslərə çevik nəzarətin göstəricisidir”.
Vidadi ORDAHALLI
