Koronavirus pandemiyası ilə bağlı olan belə həssas və məsuliyyətli bir dönəmdə, sözsüz ki, Qafqaz Müsəlmanları İdarəsi və onun sədri Şeyxülislam Allahşükür Paşazadənin də mövqeyi, çağırışları, ümumiyyətlə prosesə fəal surətdə qoşulmasını olduqca vacib sayanlar var. Milli Məclisin üzvü, Təbii ehtiyatlar, energetika və ekologiya komitəsinin sədri Sadiq Qurbanov özünün “Facebook” səhifəsində bu mövzu ilə bağlı dindar vətəndaşlarımıza, eləcə də Şeyxülislam Allahşükür Paşazadəyə və Dini Qurumlarla İş üzrə Dövlət Komitəsinin sədri Mübariz Qurbanlıya çağırış xarakterli müraciət ünvanlayıb. Deputat öz paylaşımında məşhur “91-lər”-dən olan professor Əjdər İsmayılovun Şeyxülislam Allahşükür Paşazadəyə və Mübariz Qurbanlıya müraciətini önə çəkərək, onun çağırış və təkliflərini yüksək qiymətləndirib və dəstəkləyib.
Qeyd edək ki, Ə.İsmayılov öz müraciətində indiki çətin günlərdə Həcc ziyarətinə ayrılmış vəsaitin ölkəmizdə olan kimsəsiz, xəstə, aztəminatlı vətəndaşlarımıza yardım üçün xərclənməsinə çağırıb: “Hörmətli Şeyx, hörmətli Sədr, bu il Həcc ziyarətinin qiymətinin 4490 ABŞ dolları müəyyən edildiyi və 1500-ə yaxın kvotanın ayrıldığı mətbuatdan hamımıza məlumdur. Zənnimcə, Vətənin və bəşəriyyətin belə ağır zamanında sizlər həmin zəvvarlara müraciət etsəniz, Həcc ziyarətinə ayrılmış o məbləğı belə ağır bir zamanda Vətəndə olan kimsəsiz, aztəminatlı, xəstə olub müalicəyə vəsaiti olmayanlara, ödənişə ehtiyacı olan tələbələrə, bir sözlə - ehtiyacı olan insanlara tərəddüd etmədən ödəyərlər...” Allahşükür Paşazadədən hələlik bu müraciətlərə cavab gəlməyib. Edilən təklifə ilahiyyatçıların münasibəti necədir?
Tural İrfan:“Bütün nəzir pulları da koronavirusla mübarizəyə sərf edilməlidir”
İlahiyyatçı Tural İrfan “Bakı-Xəbər”ə açıqlamasında bildirdi ki, bu təklifi tam olaraq dəstəkləmək lazımdır:“Bu gün dünyada tüğyan edən, habelə ölkəmizdə də yayılmış koronavirus pandemiyası ilə əlaqədar demək olar hər kəs əlindən gələn maddi, mənəvi dəstəyini əsirgəmir. Lakin təəssüflər olsun ki, bəzən özünü haqq, ədalət, Allah adamı sayanların, hətta böyük dini rütbə həvalə edilən adamların bir çoxu belə hallarda passiv iştirak edir. Mən Qafqaz Müsəlmanları İdarəsinin sədri professor Allahşükür Paşazadənin ölkəmizdə yaradılmış "Koronavirusla Mübarizə Fondu"na digər dindarlara da nümunə olaraq müəyyən məbləğ ödəyəcəyini gözləyirdim. Lakin təəssüf ki, bunu görmədik. İndi də Həcc ziyarəti üçün xərclənən və xərclənməli olan vəsaitin bu xəstəliklə mübarizəyə sərf olunması dini cəhətdən vacibdir. Qurana və Peyğəmbər hədislərinə görə, hansısa bir fövqəladə hal baş verərsə, şəriət qanunları icra edilməyə bilər. Dini hökmlər qüvvəsini müvəqqəti olaraq təxirə sala bilər. O cümlədən, Həcc ziyarəti də buna daxildir. Və vacibdir ki, o məqsədlə əldə olunan, toplanan, ayrılan pullar mövcud problemin həlli üçün sərf edilsin. Habelə, bütün nəzir pulları da koronavirusla mübarizəyə sərf edilməlidir. Bu, dinin hökmüdür. Qafqaz Müsəlmanları İdarəsinin rəhbəri bu gün xalqımıza nümunə olmalıdır. Səxavətliliyin, hacılığın, dindarlığın, vicdanlı olmağın bariz nümunəsini yaratmalıdır. Bu vəziyyət heç də 1990-cı ilin 20 yanvar hadisələrindən geri qalmır. Fərqlər olsa da, xalqımıza zərər-ziyan baxımından eynidir. Din adamları belə bir gündə də xalqın işinə yaramayacaqlarsa, hansı gündə bu xalqa lazımdırlar? Hesab edirəm ki, Həcc ziyarəti üçün sərf edilən vəsait müxtəlif dezinfeksiya və imkansız şəxslərə yardım məqsədilə sərf edilməlidir. Allahın, dinin, Quranın, İslamın da tələbi budur”.
Məhəmmədəli QƏRİBLİ
