Bu gün Azərbaycanda koronavirusa yoluxanların ən yüksək şəraitli xüsusi xəstəxanalarda müalicə olunması, onların müalicəsinə yüksək ixtiasalı tibb işçilərinin cəlb edilməsi nəticəsində bu virusa yoluxanlar arasında kütləvi sağalma prosesi gedir.
Azərbaycan Respublikası Nazirlər Kabineti yanında Operativ Qərargahın yaydığı məlumata görə, 1098 nəfərin koronavirus infeksiyasına yoluxması faktı müəyyən edilib, onlardan 250 nəfər müalicə olunaraq sağalıb, 11 nəfər vəfat edib, 837 nəfərin xüsusi rejimli xəstəxanalarda müalicəsi davam etdirilir.
Aprelin 12-nə olan məlumata görə, Azərbaycan Respublikasında 40 yeni koronavirus (COVID-19) infeksiyasına yoluxma faktı qeydə alınıb, 50 nəfər müalicə olunaraq sağalıb və evə buraxılıb.
Operativ Qərargahın aprelin 11-nə olan məlumatına görə, 67 yeni koronavirus (COVID-19) infeksiyasına yoluxma faktı qeydə alınıb, 41 nəfər müalicə nəticəsində sağalaraq evə buraxılıb.
Aprelin 10-na olan məlumatda isə 65 yeni koronavirus (COVID-19) infeksiyasına yoluxma faktı qeydə alınıb, 58 nəfər müalicə olunaraq sağalıb və evə buraxılıb. Aprelin 9-da isə 104 yeni koronavirus (COVID-19) infeksiyasına yoluxma faktı qeydə alınıb, 38 nəfər isə müalicə olunaraq sağalıb. Aprelin 8-də 105 yeni koronavirus (COVID-19) infeksiyasına yoluxma faktı qeydə alınıb, eyni zamanda, koronavirus infeksiyasına yoluxmuş 19 nəfər müalicə olunaraq sağalıb.
Son bir neçə gündə koronavirusa yoluxanların və müalicə olunanların say nisbətini götürdükdə, birmənalı olaraq deyə bilərik ki, xəstə sayı ilə sağalanların sayı bərabərləşməyə başlayıb.
Mütəxəssislərin fikrincə, Azərbaycanda koronavirusa yoluxanlar arasında kütləvi sağalma prosesinin yaşanması təsadüfi deyil. Həkimlər qeyd edirlər ki, koronavirusa yoluxan insanların yüksək şəraitdə müalicə edilməsi, onların müayinəsinin düzgün aparılması üçün lazım olan bütün avadanlıqların olması, o cümlədən, testlərin alınaraq xəstələrə tətbiq edilməsi bu nəticəni əldə etməyimizə səbəb olan amillərdəndir.
“…dövlət səviyyəsində çox mühüm addımlar atılıb”
Həkim-terapevt Leyla Bayramlı bizimlə söhbətində bildirdi ki, koronavirusa yoluxanların gündəlik statistikasına baxdıqda sağalanların yoluxanlarla bərabərlik təşkil etdiyi açıq şəkildə görsənir. “Koronavirisa yoluxanlar arasında son həftələr sağalanların sayı daha çoxdur. Statistikaya baxsaq bunun şahidi olarıq. Məsələn, bir gündə 67 nəfərin koronavirusa yoluxduğu açıqlanır, eyni zamanda da sağalananların sayı qeyd edilir. Bir gündə 41 nəfər sağalaraq evə buraxılıb. Yaxud 40 adamda virus aşkarlanıb, həmin gün 50 nəfərin sağaldığı rəsmən təsdiqlənib. 40 nəfər yoluxub, 50 nəfər isə sağalıb.
Ümumiyyətlə, koronavirusa qarşı həyata keçirilən mübarizə tədbirləri, karantin rejiminin daha da sərtləşdirilməsi, xəstəliyin yayılmasının qarşısının alınması üçün görülən bütün işlər bu prosesə müsbət təsir edir. Dövlətin həyata keçirdiyi davamlı tədbirlər nəticəsində artıq bu virusdan sağalananların sayı ilə yoluxanların sayı arasında fərq azalır. Bu virusa yoluxanların yüksək səviyyədə müalicə edilməsi onların sağalmasına səbəb olur. Hazırkı dövrədək ölkəmizdə koronavirus infeksiyasına yoluxan şəxslərin sağalması, onların yenidən cəmiyyətə, ailəsinə qaytarılması üçün dövlət səviyyəsində çox mühüm addımlar atılır. Görülən bütün tədbirlər ardıcıl xarakter alıb. Artıq karantin tədbirlərinin sərtləşdirilməsi nəticəsində vətəndaşlar lazımsız yerə küçələrə çıxmağa elə də can atmırlar. Bu gün 1000 nəfərdən artıq koronavirusa yoluxan varsa, bundan sağalanlar 250 nəfərdir, ölüm faizi isə təxminən 1 faiz təşkil edir. Mütəxəssislər də deyirlər ki, Azərbaycanda koronavirusdan ölüm halları digər ölkələrlə müqayisədə çox aşağı həddədir”.
O hesab edir ki, vətəndaşlar öz məsuliyyətlərini anlasalar və karantin rejiminin tələblərinə əməl etsələr, bir o qədər bu virusa yoluxanların sayı az olar.
İradə SARIYEVA
