Çinin Vuhan şəhərində ortaya çıxan yeni növ koronavirus dünya miqyasında yayılmaqda davam edir. Dünyanın əsas səhiyyə institutları koronavirusa qarşı effektli təsirə malik vasitənin tapılması üzərində aylardır baş sındırırlar. Lakin əldə olunan ən yaxşı nəticə, sadəcə, insanların bu virusdan qorunmaq üçün özlərini təcrid və gigiyenik qaydalara riayət etmələridir.
Bir çoxunu isə başqa bir sual maraqlandırır. Artıq virusa yoluxan minlərlə insanın ona qalib gələrək sağaldığı deyilir. Koronavirusa yoluxub sağalananların yenidən yoluxma ehtimalı varmı?
Dünya alimləri koronavirusa yoluxub sağalananlarla bağlı fərqli fikir bildirirlər.
Çin Elmlər Akademiyasının üzvü Van Fuşen COVID-19-un səbəb olduğu pnevmoniyanın, bir qayda olaraq, sağaldıqdan sonra çətinlik yaratmadığını deyib. Onun sözlərinə görə, xəstəlik çox zaman insan sağlamlığında heç bir iz qoymadan keçib gedir. Buna görə də təşvişə səbəb yoxdur. Lakin virusun ağır nəticələri özünü ondan sağalan yaşlı insanlarda sonradan büruzə verə bilər: “Bir sevindirici xəbər odur ki, koronavirusa təkrar yoluxma risqi çox azdır. Sağalanlarda ona qarşı immunitet yaransa da, insanların xəstəliyə qalib gəldikdən sonra özlərini necə hiss etmələrinə dair tam informasiyalar mövcud deyil”.
Türkiyəli professor Ateş Karanın da koronavirus sonrası insanları gözləyən təhlükə ilə bağlı fikirləri maraqlıdır: “Bu xəstəliyi heç də ciddiyə almamaq tamamilə yanlışdır. Koronavirus ağır və ölümcül bir xəstəlikdir. Evdə qalmanız vacib şərtdir. Xəstələrin bir çoxu sağalsa da, onların ağciyərlərində zədələr qalır. Bir futbolçu bu xəstəliyə yoluxarsa, həyatının qalan qismində bir daha futbol oynaya bilməmə ehtimalı çox yüksəkdir".
“Koronavirusa yoluxma zamanı ağciyərdə fibroz toxuma inkişaf edir, bu sonra da qalır”
Professor, tibbi ekspert Adil Qeybulla bildirdi ki, xəstəlikdən sonra ona qarşı immunitet formalaşır: “Belə fikirlər var ki, koronavirusda da möhkəm immunitet formalaşır. Təkrar yoluxma ilə də bağlı məlumatlar yayılır, amma bunlar tam təsdiqini tapmayıb. Koronavirusa yoluxma zamanı ağciyərdə fibroz toxuma inkişaf edir, bu sonra da qalır. Bunu sonradan müxtəlif fizioterapevtik üsullarla, təbii üsullarla müalicə etmək mümkündür. Təbii ki, müəyyən qədər qalır, amma bu da insanın ölümünə səbəb olmaz. İndiyə qədər elə bir ciddi ağciyər çatışmazlığı fəsadı vermə halı müşahidə olunmayıb. Belə ciddi nəticələr, adətən, ölümlə nəticələnir”.
Günel CƏLİLOVA
