Azərbaycan dövləti, öz ənənəsinə sadiq qalaraq, bəşəriyyəti bürüyən, dünya insanlarının sağlamlığını təhdid edən xəstəliklərlə, infeksiyalarla mübarizədə öz könüllü dəstəyini göstərir. Qlobal problemlərin aradan qaldırılmasında dövlətimiz öz maddi-mənəvi köməkliyini heç zaman əsirgəməyib.
Hazırda dünyanı sınağa çəkən və insanlığın məhvinə yönələn COVID-19 virusunun tamamilə məhv edilməsi üçün ayrı-ayrı dövlətlər, eləcə də beynəlxalq təşkilatlar kollektiv tədbirlər görməkdədirlər. Əlbəttə, koronavirusla mübarizədə və bu bəlanın tamamilə sıradan çıxarılmasında Azərbaycanın göstərdiyi dəstək, etdiyi təmənnasız yardımlar xüsusi qeyd edilməlidir.
Aprelin 10-da Prezident İlham Əliyevin təşəbbüsü ilə Türk Şurasının videokonfrans vasitəsilə keçirilən fövqəladə Zirvə görüşündə Prezident İlham Əliyev bildirib ki, Azərbaycan ÜST ilə donor müqaviləsi imzalayıb, ÜST-ə könüllü maliyə yardımı ayırıb.
“...Azərbaycan koronavirus pandemiyasına qarşı mübarizədə həm ölkə daxilində, həm də dünyada öz fəal rolunu oynayır. Azərbaycan qlobal həmrəylik nümayiş etdirərək koronavirusa qarşı mübarizədə Ümumdünya Səhiyyə Təşkilatına könüllü maliyyə yardımı ayırmışdır. Mart ayının 13-də Azərbaycan tərəfindən Ümumdünya Səhiyyə Təşkilatının strateji hazırlıq və cavab planı çərçivəsində COVID-19 müraciəti Fonduna könüllü maliyyə yardımının ayrılmasını nəzərdə tutan donor sazişi imzalamışdır. Biz Ümumdünya Səhiyyə Təşkilatının pandemiyaya qarşı qlobal mübarizədə oynadığı mühüm rolu yüksək qiymətləndiririk” - deyə Prezident İlham Əliyev qeyd edib.
“…ÜST-lə imzaladığı donor müqaviləsi ilə qlobal həmrəyliyə necə böyük dəyər verdiyini bir daha dünyaya təqdim etdi”
Tanınmış tibb mütəxəssisi, professor Paşa Qəlbinur bizimlə söhbətində bildirdi ki, Azərbaycan indiyə qədər dünyada baş verən bir sıra problemlərin aradan qaldırılması, qlobal bəlaların sıradan çıxarılması üçün maliyyə yardımları göstərib. Azərbaycan həm öz daxilində, həm də dünyada koronavirusla qlobal mübarizə çərçivəsində çox böyük işlər görür. Cenevrədə Azərbaycan Respublikası və Ümumdünya Səhiyyə Təşkilatı arasında donor sazişinin imzalanmasını yüksək dəyərləndirən P.Qəlbinurun sözlərinə görə, həmin donor sazişi dünyada koronavirus epidemiyasının yayılması risqinin qarşısının alınması istiqamətində beynəlxalq birliyin səylərinə töhfə məqsədilə Azərbaycan Respublikası Hökumətinin ÜST-ə könüllü maliyyə yardımının ayrılması barədə 2020-ci il 6 mart tarixli qərarına əsasən imzalanıb. P.Qəlbinurun dediyinə görə, Azərbaycanın ÜST-nin “Strateji Hazırlıq və Cavab Planı” çərçivəsində “COVID-19 müraciəti” Fonduna 5 milyon ABŞ dolları məbləğində könüllü maliyyə yardımı ayırması təsadüfi deyil, çünki dövlətimiz daim öz humanist və insanpərvər addımları ilə seçilib. Professor hesab edir ki, Azərbaycanın koronavirusla mübarizəyə təmənnasız olaraq könüllü şəkildə 5 milyon ABŞ dolları ianə etməsi və ÜST-lə donor sazişi imzalaması təqdirəlayiqdir. “Azərbaycan qlobal problemlərin həlli istiqamətində həmişə həssas olub və zaman-zaman müxtəlif problemlərin aradan qaldırılması üçün könüllü yardımlar edib. Azərbaycan heç bir ölkədən müraciət gözləmədən darda olanlara öz yardım əlini uzadıb. Hesab edirəm ki, COVID-19-la mübarizəyə Azərbaycan dövlətinin maliyyə vəsaiti ayırması təqdirəlayiqdir. Bilirsiniz ki, ÜST-ə koronavirusla mübarizə aparılması üçün könüllü yardımlar edən ölkələr elə də çox deyil. Amma Azərbaycan dövləti bu qlobal xəstəliyin, bəlanın aradan qaldırılması üçün təmənnasız şəkildə maliyyə dəstəyi göstərdi. Üstəlik də donor sazişi imzaladı. Azərbaycanın qlobal mənada koronavirusla mübarizə aparılması üçün ÜST-ə könüllü maliyyə yardımı etməsi və eyni zamanda da bu qurumla donor sazişi imzalamasının xüsusi əhəmiyyəti var. Məlumdur ki, Azərbaycan dünyada çox nüfuz qazanmış, öz yeri, öz çəkisi olan bir dövlətdir və onun koronavirusa qarşı qlobal mübarizə sahəsində öz rolu, öz payı var.
Bilirik ki, Azərbaycan koronavirusdan əziyyət çəkən ölkələrə də könüllü yardımlar edir və bu yardımlar da dövlətimizin humanizm prinsiplərinə sadiq qaldığını göstərir”.
P.Qəlbinur, həmçinin, dövlətimiz tərəfindən səhiyyə sektoruna, xüsusilə hazırda COVID-19 virusu ilə mübarizəyə yönəlmiş diqqət və qayğının, həyata keçirilən bütün lazımi ehtiyat tədbirlərinin ÜST tərəfindən diqqətlə izlənildiyini və yüksək qiymətləndirildiyini bildirdi. Onun sözlərinə görə, ÜST-in baş direktoru Azərbaycan tərəfindən COVID-19 virusu ilə mübarizə üçün ayrılmış könüllü maliyyə töhfəsinin qlobal həmrəyliyin nümayişi olduğunu vurğulayıb. “Bu gün Azərbaycan yalnız öz daxilində həmrəyliyə nail olmayıb, o, həmçinin, koronavirusla mübarizə sahəsində qlobal həmrəyliyə nümunələr bəxş edib. Azərbaycan dövləti ÜST-ə ayırdığı maliyyə vəsaiti və koronavirusla mübarizə sahəsində ÜST-lə imzaladığı donor müqaviləsi ilə qlobal həmrəyliyə necə böyük dəyər verdiyini bir daha dünyaya təqdim etdi. Azərbaycanın koronavirusla mübarizə sahəsində göstərdiyi qlobal nümunələr dünya tərəfindən təqdir edilir” -deyə P.Qəlbinur qeyd etdi.
İradə SARIYEVA
