Məlum olduğu kimi, koronavirus pandemiyası ilə əlaqədar tətbiq edilən karantin rejimi səbəbindən bir sıra iş yerləri fəaliyyət göstərmir. Bu səbəbdən avtomobil sahibləri nəqliyyat vasitələrini yaşadıqları evlərin həyətlərində park etməli olublar. Bu gün Bakıda binaların bir çoxunda avtomobilləri park etmək üçün xüsusi dayanacaqlar yoxdur. Ona görə də çoxları məcburiyyət üzündən avtomobili həyətlərdə saxlayır.
Bu arada, Fövqəladə Hallar Nazirliyi avtonəqliyyat vasitələri sahiblərinə müraciət edib. Müraciətdə qeyd edilib ki, avtomobillər xilasedicilərə mane olan yerlərdə saxlanır: “Bir çox hallarda pərakəndə şəkildə, binaların girişlərində, avtomobil yollarının hərəkət hissəsində və ya yanğına qarşı su təchizatı sistemlərinin bilavasitə yaxınlığında park edilmiş avtomobillər fövqəladə hadisə zamanı xilasetmə, yanğınsöndürmə və digər iriqabaritli xüsusi təyinatlı avtomobillərin hərəkətinə maneə yaradır, habelə yanğınların söndürülməsi zamanı su hovuzları və hidrantlardan suyun götürülməsini çətinləşdirir, bəzi hallarda isə mümkünsüz edir. Son zamanlar ölkəmizdə baş verən yanğınların təhlili, həmçinin, bir sıra xarici ölkələrdə müşahidə olunan yanğınlar məsələ ilə bağlı vaxtında zəruri tədbirlər görməyi tələb edir”.
Müraciətdə vətəndaşlara belə hallara yol verilməməsi tələb olunur.
Nəzərə alsaq ki, bu gün Bakı şəhərində avtomobilləri park etmək üçün yerlər çox məhduddur, o zaman, vətəndaşlar belə vəziyyətdə nə etməlidirlər? Çıxış yolu nədədir?
“Heç kəs anlamaq istəmir ki, vətəndaşlar çıxılmaz duruma düşdükləri üçün şəxsi avtomobillərini həyətlərdə park edirlər”
Məsələyə münasibət bildirən ekspert İlqar Hüseynlinin sözlərinə görə, əvvəlcə vətəndaşlara avtomobilləri park etmək üçün alternativ yerlər təklif olunmalıdır, ondan sonra belə tələblərlə çıxış etmək lazımdır: “Alternativlər təklif etmədən vətəndaşlardan bunu tələb etmək doğru deyil. Nəzərə almaq lazımdır ki, camaat məcburiyyət üzündən avtomobili həyətlərdə park edir. FHN insanların yaşadıqları binalara yaxın yerlərdə dövlətə məxsus obyektlərin ərazisində, müvafiq yeraltı dayanacaqlarda şərait yaratmalıdır. Lazım gələrsə, ümumtəhsil məktəblərinin ərazisindən də istifadə etmək olar. Bütün bunlardan sonra vətəndaşlardan müvafiq normalarə əməl olunmasını tələb etmək doğru olar. Heç kəs anlamaq istəmir ki, vətəndaşlar çıxılmaz duruma düşdükləri üçün şəxsi avtomobillərini həyətlərdə park edirlər. Ona görə də buna görə vətəndaşları qınamaq doğru olmaz. Bir məqamı qeyd edim ki, son illər Bakı şəhərində necə gəldi çoxsaylı bina inşa edilib. Ancaq həmin yaşayış binaları tikilərkən bir çoxunda avtomobilləri park etmək üçün yerlər inşa edilməyib. Ümumiyyətlə, bunu nəzərə almayıblar. Başqa bir tərəfdən, binaların zirzəmilərində avtomobillərin park edilməsi üçün qoyulan qiymətlər baha olduğundan, vətəndaşlar bundan narazıdırlar. Deməyim odur ki, bu sahədə bir sıra problemlər var”.
Vidadi ORDAHALLI
