Məlum olduğu kimi, Azərbaycan Respublikasının Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə aprelin 10-da Türk Şurasının videokonfrans vasitəsilə keçirilən fövqəladə Zirvə görüşündə koronavirusla mübarizə sahəsində Azərbaycan dövlətinin gördüyü işlərdən geniş bəhs edilib.
Türkdilli dövlətlərin dövlət və hökumət başçılarının, eləcə də Ümumdünya Səhiyyə Təşkilatının Baş direktoru Tedros Adhanom Qebreyesusun iştirakı ilə keçirilən videokonfransda çıxış edən Prezident İlham Əliyev qeyd edib ki, Azərbaycan dövləti koronavirusa yoluxan xəstələrin müalicəsini çox yüksək şəraiti olan xəstəxanalarda həyata keçirir. “...Koronavirus xəstələri 20-dən artıq dövlət xəstəxanasında müalicə olunurlar. Bu günlərdə 575 çarpayıdan ibarət olan, ölkəmizin ən müasir və “Yeni klinika” adlanan xəstəxanası onların ixtiyarına verilmişdir. Bu ilin mart ayında ölkəmizin 3 şəhərində üç yeni xəstəxana istifadəyə verilmişdir. Onların ümumi çarpayı sayı 500-dən çoxdur. Bu xəstəxanalar da koronavirus xəstələrinin ixtiyarına verilmişdir. Qısa müddət ərzində 6-sı dövlət, 4-ü isə özəl sahibkarlar tərəfindən tikilməklə, hər birinin 200 çarpayı yeri olan 10 müasir modul tipli xəstəxananın istifadəyə verilməsi nəzərdə tutulur.
Həkimlərimizin və tibb işçilərimizin koronavirus xəstəliyinə qarşı mübarizədə xidmətlərini yüksək qiymətləndiririk. Koronavirus xəstələrinə xidmət göstərən həkimlərin maaşı 3,4 və 5 misli məbləğində artırılıb. Bu, dövlət tərəfindən həkimlərə göstərilən qayğının təzahürüdür”.
Azərbaycanda koronavirusla mübarizə sahəsində fəaliyyət göstərən həkimlərə maaşının 3-5 misli qədər əməkhaqqı verilir. Bu, Azərbaycan həkimlərinin əməyinə verilən qiymət baxımından necə faktdır?
“...təcrübə örnəkləri başqa ölkələr üçün də gerçək nümunədir”
Tibb elmləri namizədi, millət vəkili Musa Q uliyev baki-xeber.com-a bildirdi ki, koronavirusun yayıldığı ilkin dövrdə Azərbaycan dövlətinin həyata keçirdiyi önləyici tədbirlər, bu məsələdə ölkənin bütün tibb heyətinin, tibb işçilərinin səfərbər olunması bu virusun ölkəmizdə geniş şəkildə yayılmasının qarşısını aldı. M.Quliyevin sözlərinə görə, Azərbaycan koronavirusa qarşı mübarizə tədbirlərini Ümumdünya Səhiyyə Təşkilatının (ÜST) tövsiyələri əsasında qurub. Müsahibimiz vurğuladı ki, Azərbaycan dövlətinin koronavirusla mübarizə sahəsində həyata keçirdiyi bütün tədbirlər, xəstələrin yüksək səviyyədə tam təmin olunmuş xəstəxanalarda müalicə olunmasını gerçəkləşdirməsi ÜST rəhbərliyi tərəfindən də yüksək qiymətləndirilib və buna görə ÜST-in Baş direktoru Azərbaycan Prezidentinə məktub yazıb, görülən işlərə görə ona öz təşəkkürünü bildirib.
M.Quliyevin bildirdiyinə görə, koronavirusa qarşı mübarizədə Azərbaycan dövlətinin həyata keçirdiyi tədbirlərdən biri də virusun müəyyən edilməsi üçün vacib olan testlərin alınıb ölkəyə gətirilməsi və bu testlərin tətbiq edilməsidir. Bu istiqamətdə də ölkəmizin dünyada ön yerlərdən birini tutduğunu vurğulayan M.Quliyev hesab edir ki, vaxtında Azərbaycanda bütün bu işlərin görülməsi nəticəsində ölkəmizdə yoluxma halları elə də geniş yayılmayıb. Millət vəkili onu da bildirdi ki, bu gün Azərbaycanda koronavirus xəstələrinin müalicəsinin həyata keçirildiyi xəstəxanalar lazımi şəraitlə təmin olunub. Həkimlərin, kiçik və orta tibb işçilərinin fədakarlığını qeyd edən M.Quliyevin sözlərinə görə, onlar öz həyatlarını viruslu xəstələrin sağaldılmasına həsr edirlər. Bu gün Azərbaycanın qəhrəman, fədakar həkimlərinin, orta və kiçik tibb işçilərinin, tibb ocaqlarında işləyən texniki işçilərin əməyinin həm mənəvi, həm də maddi cəhətdən dövlətimiz və xalqımız tərəfindən yüksək qiymətləndirilməsi halları çox müsbətdir. Azərbaycanda “Yeni klinika”nın açılışındakı çıxışında Prezident İlham Əliyevin ölkəmizin tibb işçilərinin, həkimlərin əməyinə verdiyi qiymət bu ağır dövrdə koronavirusla mübarizə aparan həkimlərə böyük ruh yüksəkliyi bəxş edib: “Koronavirusla mübarizədə fəal iştirak edən, xəstələrin müalicəsini həyata keçirən həkimlərimizin ölkə rəhbərliyi, eləcə də ictimaiyyət tərəfindən alqışlanması özü təqdirəlayiq haldır. Koronavirusla mübarizədə aktiv iştirak edən və bu xəstəliyin məhv edilməsi yolunda gecəsini gündüzünə qatan həkimlərimizin fəaliyyətinə ən böyük qiymət ölkə başçısının onların fədakar əməyinə verdiyi qiymətdir. Ölkə başçısı fədakar, qəhrəman həkimlərimizin əməyinin misilsiz olduğunu qeyd etməklə onlara mənəvi ruh verdi. Bu dəyər maddiyyatdan, puldan qat-qat üstün dəyərdir. Amma, bununla belə, bilirsiniz ki, ölkə başçısının sərəncamı ilə koronavirusla mübarizə sahəsində fədakarlıq göstərən həkimlərin maaşının 3-5 misli qədər əməkhaqlarının artırılması onların əməyinin stimullaşdırılmasına xidmət edir. Hesab edirəm ki, bu, dövlət tərəfindən həkimlərimizin əməyinə verilən qiymət baxımından çox dəyərli faktdır. Gələcəkdə fədakar həkimlərimizin, orta və kiçik tibb işçilərimizin koronavirusla mübarizə cəbhəsində göstərdikləri fədakarlıq və qəhrəmanlıqlar haqqında əsərlər yazılacaq, mahnılar bəstələnəcək. Bu, gələcəyin işidir. Amma hazırda dövlətin həkimlərimizə verdiyi qiymət, şəxsən cənab Prezidentin və ölkəmizin Birinci vitse-prezidenti Mehriban Əliyevanın həkimlərimizin əməyini yüksək dəyərləndirməsi, onları alqışlaması onlara verilən ən böyük qiymətdir. Fikrimcə, biz tezliklə koronavirusa qalib gələcəyik. Koronavirusla mübarizə dövrü başa çatdıqdan sonra isə virusla mübarizədə fədakarlıq göstərən həkimlərimizin bir çoxunun dövlət mükafatına layiq görüləcəyinə qətiyyən şübhə etmirəm. Mənə elə gəlir ki, gələn həftədən artıq yoluxma hallarının azalmasını müşahidə edəcəyik. Amma burada əsas şərt vətəndaşlarımızın karantin rejiminin tələblərinə əməl etməsidir. Dövlət öz üzərinə düşən bütün işləri uğurla həyata keçirib, nə lazımdırsa edib. İndi əsas məsuliyyət vətəndaşların üzərindədir. Ümid edirəm ki, vətəndaşlarımız sona qədər karantin rejiminə əməl etsələr, biz bu mübarizədən çox az itki ilə çıxacağıq. Sizin saytın verdiyi imkanlardan istifadə edərək bütün vətəndaşları dövlətin yanında olmağa, həmrəylik göstərməyə və karantin rejiminin qaydalarına əməl etməyə çağırıram”.
M.Quliyev, həmçinin, qeyd etdi ki, belə virusla mübarizə şəraitində çalışan həkimlərin bütün lazımi tibbi avadanlıqlarla, alətlərlə, eləcə də digər vacib vasitələrlə təmin olunmaları da onların virusla mübarizə aparması üçün geniş şərait yaratdı. Bu vasitələr olmadığı halda həkimlərin heç bir iş görmək gücündə olmadığını deyən M.Quliyevin sözlərinə görə, dövlət böyük məbləğdə vəsait xərcləyərək bütün lazımi vasitələri, dərman preparatlarını alıb gətirdi. Bunun da həkimlərin işinə təkan verdiyini deyən M.Quliyev“Azərbaycan dövlətinin həm həkimlərin əməyinə verdiyi maddi və mənəvi qiymət, həm xəstələrin sağalması üçün həyata keçirdiyi tədbirlər, həm də bu istiqamətdə ortaya qoyduğu digər təcrübə örnəkləri başqa ölkələr üçün də gerçək nümunədir. Bu örnək həm də türk dövlətləri üçün bir yenilikdir, öyrənməli olduqları bir təcrübədir” - deyə qeyd etdi.
İradə SARIYEVA
