Dünyanı cənginə alan koronavirusun əhatə dairəsi böyüməkdə davam edir. Müxtəlif ölkələrdə hər gün xəstəliyə yeni yoluxma halları, ölüm faktları qeydə alınır. Maraqlıdır ki, müasir texnologiyalar, innovativ yeniliklərlə süni intellekt formalaşdıran, yəni sürətlə inkişaf etməkdə olan elm və texnologiya əsrinin insanı bu virus qarşısında hələ də aciz durumdadır. Prosesin belə davam etməsi, əlbəttə ki, koronavirusun qlobal pandemiyaya çevrilməsinə real zəmin yaradıb.
Hər gün Dünya Səhiyyə Təşkilatının yaydığı məlumatlara əsasən demək olar ki, xəstəliyin müalicəsi yoxdur, hətta dünyanın inkişaf etmiş ölkələri belə, virusun qarşısını ala bilmirlər. Dünyada, ayrı-ayrı ölkələrdə ümumi mənzərəyə nəzər yetirsək, acınacaqlı durumun şahidi olarıq. Avropa hazırda dünyada koronavirus pandemiyasının ən ağır şəkildə təzahür etdiyi regiondur. Avropada, Çin istisna olmaqla, dünyanın bütün digər ölkələrindən daha çox yoluxma və ölüm halı qeydə alınıb. Epidemiyanın Çində pik dövrü ilə müqayisədə Avropada hər gün daha çox yoluxma halı baş verir. Dövlətlərin sərhədləri bağlanıb, bütün hava uçuşları dayandırılıb.
Ancaq koronavirusun yayılmaması üçün hansı ölkələr ki, səmərəli qabaqlayıcı tədbirlər görürlər, orada vəziyyət qənaətbəxşdir. Belə ölkələrdən biri də Azərbaycandır. Ölkəmizdəki bugünkü durum göstərir ki, dövlət bütün mümkün qabaqlayıcı və operativ tədbirləri həyata keçirir. Bu baxımdan biz hətta bir çox ölkəni qabaqlayırıq. İnfeksiyanın dünya ölkələrində geniş yayılması ilə əlaqədar Ümumdünya Səhiyyə Təşkilatı tərəfindən koronavirus infeksiyasının qlobal pandemiya elan olunması Azərbaycanda əlavə təxirəsalınmaz tədbirlərin həyata keçirilməsini zərurətə çevirib.
Xəstəliklə mübarizə məqsədilə,onun qısa müddətə aşkar olunması üçün ölkəmizdə müasir laboratoriyalar yaradılıb.
Hətta Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyev aprelin 10-da Türk Şurasının videokonfrans vasitəsilə keçirilən fövqəladə Zirvə görüşündə çıxışı zamanı da bu məsələyə toxunub. Prezident qeyd edib ki, indiyə kimi ölkə üzrə 60 minə yaxın test keçirilib: “Əhalinin hər bir milyon nəfərinə düşən testin sayı 5200-dən artıqdır. Aparılan testlərin sayına görə dünyada 30-cu, hər milyon əhaliyə görə aparılan testlərin sayına görə 40-cı yerlərdəyik. Azərbaycanda testlərin aparılması üçün 18 laboratoriya fəaliyyət göstərir, onların 5-i yeni yaradılıbdır”.
Azərbaycanda testlərin aparılması üçün mövcud olan laboratoriyalar virusla səmərəli mübarizə işində nə kimi rol oynayır?
“Xəstəliyin ilk günlərində günlük test sayı 200-300 olduğu halda, qısa müddətdə bunların sayı artdı”
Deputat, Milli Məclisin Səhiyyə komitəsinin sədr müavini Rəşad Mahmudovun sözlərinə görə, ay yarım öncə koronavirusla bağlı ölkədə gün ərzində 200-300 test keçirilirdi. Ancaq indi isə 3900-4000 test keçirilir: “Onu da deyim ki, nəinki region, hətta Avropanın aparıcı ölkələri ilə eyni səviyyədə test aparılır. Məlumat üçün bildirim ki, 18-ə yaxın laboratoriya fəaliyyət göstərir. Həmin laboratoriyaların 6-sı regionlarda fəaliyyət göstərir. Bu günlərdə isə Gəncədə tam avtomatlaşdırılmış laboratoriya fəaliyyətə başlayacaq”.
Millət vəkili onu da əlavə etdi ki, ölkəmiz virusla mübarizəyə fəal başladı. Dünya və regional hadisələrlə müqayisədə bir neçə faktı diqqətinizə çatdırmaq istəyirəm: “ Xəstəliyin ilk günlərində günlük test sayı 200-300 olduğu halda, qısa müddətdə bunların sayı artdı. Başda Heydər Əliyev Fondu olmaqla aidiyyəti qurumların çevik addımları nəticəsində artıq hazırda gündə dörd mindən artıq test aparılır. Prezident İlham Əliyevin də qeyd etdiyi kimi, vaxt amilinin, həkimlərin peşəkarlığının və mövcud imkanların vəhdəti Azərbaycanın az itkilərlə bu vəziyyətdən çıxmasına şərait yaradıb. Hazırda Azərbaycanda 20-dən çox xəstəxanada koronavirus xəstələri müalicə alırlar. Ən müasir xəstəxanalar koronavirus xəstələrinin müalicəsi ilə məşğuldur. Cəmi bir ay ərzində mindən çox çarpayılıq, ən müasir standartlara uyğun tibbi müəssisələr istifadəyə verilib və orada koronavirus xəstələri müalicə alırlar”.
Günel CƏLİLOVA
