Azərbaycanda koronavirus xəstələri 20-dən artıq dövlət xəstəxanasında müalicə olunurlar. Bu barədə Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyev aprelin 10-da Türk Şurasının videokonfrans vasitəsilə keçirilən fövqəladə Zirvə görüşündə bildirib.
Prezident qeyd edib ki, bu günlərdə 575 çarpayıdan ibarət olan, ölkəmizin ən müasir və “Yeni klinika” adlanan xəstəxanası onların ixtiyarına verilib: “Bu ilin mart ayında ölkəmizin 3 şəhərində üç yeni xəstəxana istifadəyə verilibdir. Onların ümumi çarpayı sayı 500-dən çoxdur. Bu xəstəxanalar da koronavirus xəstələrinin ixtiyarına verilibdir. Qısa müddət ərzində 6-sı dövlət, 4-ü isə özəl sahibkarlar tərəfindən tikilməklə, hər birinin 200 çarpayı yeri olan 10 müasir modul tipli xəstəxananın istifadəyə verilməsi nəzərdə tutulur”.
Maraqlıdır, 200 çarpayı yeri olan 10 modul tipli xəstəxana da istifadəyə veriləndən sonra koronavirusla mübarizənin səviyyəsi necə dəyişəcək?
“Modul xəstəxanaların qurulması ehtiyacı xəstələrin sayının artmasından doğur”
Tibb elmləri doktoru, həkim-ekspert Adil Qeybulla bildirdi ki, Azərbaycanda hazırda koronavirusa qarşı müalicəni təşkil etmək üçün xəstəxanalar var: “Bakıda 4 xəstəxana ayrılıb. Həmçinin, regionlarda da xəstəxanalar ayrılıb. Modul xəstəxanaların qurulması ehtiyacı xəstələrin sayının artmasından doğur. Amma sərt tədbirlər görə bilsək, yəqin ki, aprelin sonuna yaxın infeksiyanın enmə tempini görə bilərik. Tədbirlər pozulsa, bu temp arta da bilər. Hər halda, aprel ayında pik gözlənir. Artım olacaq. Çünki yoluxanlar və onların yoluxdurduğu şəxslər üzə çıxacaq”.
Tibb elmləri doktoru hesab edir ki, modul xəstəxanaların regionlar üzrə qurulması nəzərdə tutulmalıdır: “Burada əhali sıxlığı nəzərə alınmalıdır. Bu xəstəliyin artım dinamikası Bakıda və cənub rayonlarında daha çoxdur. Azərbaycan əhalisinin, demək olar ki, 70 faizi Bakı şəhərində toplanıb. Ona görə də əhalinin sayı və xəstələnmə dinamikası nəzərə alınmalıdır”.
Günel CƏLİLOVA
