Koronavirus pandemiyası ilə bağlı Azərbaycanda karantin rejiminin tətbiq edilməsi nəticəsində hərəkətin məhdudlaşdırılması vacib bir məsələ kimi həyata keçirilir. Ölkəmizdə vətəndaşlardan karantin rejiminin tələblərinə riayət edilməsi tələb olunsa da, bəzi vətəndaşlar buna əməl etmək istəmirlər.
Baş Dövlət Yol Polisi İdarəsindən (BDYPİ) mətbuta verilən məlumata görə, son 9 gün ərzində xüsusi karantin rejiminin pozulmasına görə 11 318 hərəkət iştirakçısı inzibati məsuliyyətə cəlb edilib. Bildirilib ki, ümumilikdə, 01.04.2020-ci il tarixindən bu günədək respublikanın, o cümlədən, paytaxtın avtomobil yollarında xüsusi karantin rejiminin pozulmasına görə 11 318 hərəkət iştirakçısı inzibati məsuliyyətə cəlb edilib.
“Hesab edirəm ki, koronavirus dövründə bəzi vətəndaşların belə məsuliyyətsiz davranışları cəzasız qalmamalıdır”
“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, dövlətin qoyduğu qayda-qanunlara hər bir vətəndaşın əməl etməsi zəruridir. Ş.Əliyev hesab edir ki, humanizm və insan haqlarının qorunmasını əsas götürən Azərbaycan dövləti vətəndaşlardan qanunu pozmamağı tələb edir, lakin bəzi vətəndaşlar buna əməl etmirlər: “Son 9 gün ərzində 11 318 hərəkət iştirakçısının qanunu pozması və bunun nəticəsində də inzibati məsuliyyə cəlb edilməsi vətəndaşların dövlətimiz, xalqımız qarşısında daşımalı olduğu məsuliyyəti dərk etməməsi ilə bağlıdır. Dövlət bütün bu məhdudlaşdırıcı tədbirləri, eləcə də ciddi karantin rejimini Azərbaycan vətəndaşlarının sağlamlığının qorunması, onların koronavirusa yoluxmasının qarşısının alınması üçün edir. Azərbaycan dövlətinin əsas hədəfi bu pandemiyadan Azərbaycan xalqını az itki ilə çıxarmaqdır. Bu gün karantin rejimi ilə əlaqədar olaraq bütün güc orqanları, o cümlədən də polis gücləndirilmiş iş rejiminə keçib. Azərbaycan dövləti vətəndaşların karantin rejimini pozmaması üçün çox böyük maarifçilik işləri gördü. Bu maarifçilik işinə KİV də, QHT-lər də, “Polisə Dəstək” İctimai Birliyi də, ziyalılar da ciddi dəstək verdi, onlar da maarifçilik işləri həyata keçirdilər. Lakin bir qisim vətəndaşın maarifçilik işinə əhəmiyyət vermədiyi, yaxud onu dərk etmədiyi üzə çıxdı. Açıq şəkildə karantin rejiminin qaydalarını pozan insanlara rast gəldik. Karantin rejimini pozanlar olmasaydı, hər kəs qaydalara riayət etsəydi, nə inzibati məsələlərə, nə cərimələrə, nə də həbslərə zərurət yaranacaqdı. Azərbaycan dövləti humanizmi və insan haqları prinsipini önə çəkərək əvvəlcə maarifçilik işinə önəm verdi, bunun nəticə vermədiyini gördükdə isə inzibati cəza metodlarına əl atdı. 9 gündə 11 318 hərəkət iştirakçısının inzibati məsuliyyətə cəlb edilməsi başqa vətəndaşlar üçün bir dərs olmalıdır ki, onlar karantin rejimini pozmasınlar”.
Ş.Əliyev onu da qeyd etdi ki, bir hüquqşünas kimi heç zaman cəzaların sərtləşdirilməsinə tərəfdar olmayıb, amma koronavirus dövründə karantin rejimini pozan, bununla da insanların sağlamlığı üçün təhlükə yaradan insanlara qarşı daha sərt tədbirlərin görülməsi bir zərurətdir: “Baş verən hadisələr, vətəndaşların kütləvi şəkildə karantin rejimini pozması məsələləri göstərir ki, cəza tədbirlərinin daha da sərtləşdirlməsinə ehtiyac var. Hesab edirəm ki, koronavirus dövründə bəzi vətəndaşların belə məsuliyyətsiz davranışları cəzasız qalmamalıdır. Çünki söhbət dövlətə, xalqa, dövlətin qanunlarına münasibətdən gedir. Belələri öz davranışları ilə xalqa, dövlətə xəyanət etmiş olurlar.
Mənə belə gəlir ki, Milli Məclis İnzibati Xətalar Məcəlləsindəki boşluqları aradan qaldırmaq üçün ona əlavələr etməlidir”.
Ş.Əliyev onu da qeyd etdi karantin rejiminin qaydalarına riayət etməyən vətəndaşlar polisin də, digər aidiyyəti güc strukturlarının əməkdaşlarının da işini çətinləşdirir, onların daha geniş tərkibdə işləməsinə gətirib çıxarır. O hesab edir ki, vətəndaş öz məsuliyyətini dərk edib qaydalara uyğun davransa, onda nə polis müdaxiləsinə ehtiyac qalar, nə də o, inzibati məsuliyyətə cəlb edilər.
İradə SARIYEVA
