Koronavirusla mübarizə apardığımız günlərdə hər bir Azərbaycan vətəndaşı dövlətə dəstək göstərmək üçün əlindən gələni edir. Bildiyimiz kimi, sadə vətəndaşlar, baş redaktorlar, kiçik sahibkarlar, eləcə də cəmiyyətin digər üzvləri Prezident İlham Əliyevin müvafiq fərmanı ilə yaradılmış Koronavirusla Mübarizəyə Dəstək Fonduna maliyyə yardımları ediblər, etməkdə də davam edirlər.
Karantin rejimində yaşadıqları dəbdəbəli villalarda açdıqları bol süfrələrin başından sosial şəbəkələrdə canlı yayımlar yaradaraq camaata “evdə qal” deyən şou əhlinin xalqın ağır günündə kənara çəkilməsi halları yaşanır. Ümumiyyətlə, pandemiyadan əziyyət çəkən ölkələrdə şou-biznes nümayəndələrinin fəaliyyəti daha qabarıq görsənir və onlar gəlirlərinin çox böyük bir faizini koronavirusla mübarizəyə xərcləyirlər. Bizimkilər isə öz dəbdəbəli həyatlarını, bahalı villalarını, bol süfrələrini reklam etməkdən bir addım da olsa irəli gedə bilmirlər. Təkcə şou-biznesçilər deyil, həmçinin, 2-3 milyonluq villalarda oturan bəzi xalq artistləri də “əllərini ciblərinə salmaqda” deyəsən tələsmirlər.
Şou müğənniləri Koronavirusla Mübarizəyə Dəstək Fonduna maliyə yardımları ediblərmi? Ümumiyyətlə, onlar arasında bu fonda pul köçürənlər varmı?
Google.az üzərindən axtarış versək də, cəmi bir nəticə ilə üzləşdik. Bu, Xalq artisti Röya Ayxanın koronavirus (COVID-19) pandemiyası ilə mübarizə çərçivəsində ölkəmizdə həyata keçirilən tədbirlərə qoşulması ilə bağlıdır. Məlumatlara görə, məşhur müğənni Azərbaycan Prezidenti İlham Əliyevin müvafiq fərmanı ilə yaradılmış Koronavirusla Mübarizəyə Dəstək Fonduna 10 min manat məbləğində ianə edib. Bununla da müğənni, koronavirus xəstəliyinin ölkəmizdə geniş yayılmasının qarşısının alınması məqsədilə həyata keçirilən tədbirlərə öz töhfəsini verib.
Eyni zamanda, sənətçi bütün vətəndaşları COVID-19 virusu ilə mübarizə üzrə tədbirlərə qoşulmağa və bu bəladan xilas olmaq üçün dövlətə öz vətəndaş dəstəyini göstərməyə çağırıb.
R.Ayxan istisna olmaqla, xəbər saytlarında hansısa bir şou müğənnisinin Koronavirusla Mübarizəyə Dəstək Fonduna maliyyə yardımları etməsi ilə bağlı məlumat əldə edə bilmədik. Məsələ burasındadır ki, hər hansı bir şou müğənnisi fonda vəsait köçürsəydi, ianə etsəydi, onu bütün şou-biznes, maqazin saytları, eləcə də sosial şəbəkələrdəki fanatları reklam edərdilər.
“...şou-biznesçiləri koronavirusla mübarizə kampaniyasında görmürük”
Məsələyə münasibət bildirən siyasi icmalçı, Əməkdar jurnalist Azər Həsrət “Bakı-Xəbər”ə bildirdi ki, şou əhlinin fonda ianə etməməsi məsələsi cəmiyyəti ciddi düşündürən suallardan biridir. “Şou əhlinin böyük əksəriyyətinin Koronavirusla Mübarizəyə Dəstək Fonduna maliyyə yardımları etməməsi cəmiyyətdə bir sıra haqlı suallar yaradır. Biz kimin toylara hansı qiymətə getdiyini bilirik. Onların arasında yarımsaatlıq toya 20 min manata gedənləri var. Təsəvvür edin ki, onlar ayda 10 min manatlarla pul qazanmış adamlardır və təbiidir, zəhmət çəkib qazanırlar, halal xoşları olsun. Amma hələ bu azmış kimi, cənab Prezident də onların bir çoxuna dövlət hesabına təmənnasız mənzil hədiyyə edib. Həmin adamlar bu gün ölkənin, dövlətin bu çətin vəziyyətində, faktiki olaraq, gözə görünmürlər. Yaxud da televiziyalar onların malikanələrindən verilişlər hazırlayır, onlar da yeyib içib, deyib gülürlər, oxuyurlar, “biz də belə dəstək oluruq” deyirlər. Sən öz malikanəni ona-buna nümayiş etdirməklə heç nəyə dəstək olmursan, cibindən pul-para çıxarıb 3-5 adama dəstəyin olsun. Onların çoxu bu dəstəyi göstərə bilmirlər. Əlbəttə, burada söhbət hamıdan getmir. Yəni əksər üzdə olan, televiziya kanallarında gözlərimizi döyənək edən, hansı kanalı açırsan orada olan şou-biznesçiləri koronavirusla mübarizə kampaniyasında görmürük. Yəni onlar nə fonda pul köçürürlər, nə hansısa kasıba əl tuturlar, nə də ehtiyacı olan birinin qapısını döyüb ona yardım edirlər”.
Bunun bizim cəmiyyət olaraq dəyərsiz adamlara layiq olmadıqları dəyəri verməyimizdən qaynaqlandığını qeyd edən A.Həsrətin sözlərinə görə, həmin adamlar da öz ictimai məsuliyyətlərini dərk etmirlər. “Düşünürəm ki, koronavirus pandemiyası arxada qalandan sonra Azərbaycan cəmiyyəti ciddi düşünməlidir. Düşünməlidir ki, o adamları yarımsaatlıq, 1 saatlıq 10 min manat verib toya nə üçün gətiririk? Niyə onların dalınca düşüb hansısa bir şadyanalıqda mütləq onların iştirakını arzu edirik, bunlar buna dəyərmi? Doğrudanmı bunlar bu qədər yüksək adamlardır?”
A.Həsrət hesab edir ki, xalqın, dövlətin ağrılı günlərində həmrəylik göstərməyən, dəstəyini əsirgəyən şou adamlarına, müğənnilərə dövlət tərəfindən mənzillər bağışlanmamalı, ictimaiyyət onlara diqqət göstərməməlidir.
İradə SARIYEVA
